Qeveria s’mund të bjerë më një protestë, është diçka që nuk ka ndodhur në 35 vite. Kështu ka deklaruar anëtari i Këshillit Kombëtar të PD, Ilir Alimehmeti, teksa ka komentuar protestën kombëtare të PD të zhvilluar pak ditë më parë.

I ftuar në emisionin ‘Frontline Interview’ në Report Tv, Ilir Alimehmeti ka deklaruar ndryshimi politik është një proces i gjatë dhe nuk realizohet brenda një dite.

Alimehmeti u shpreh se mesazhet e dhëna në protestën e fundit ishin të qarta, por theksoi se nevojitet kohë dhe vazhdimësi për të arritur rezultate konkrete. Ai solli si shembull situatën në Serbi, ku pavarësisht protestave masive, qeveria vijon të jetë në pushtet.

‘Nëse dikush pret që qeveria të bjerë më një protestë kjo është diçka që nuk ka ndodhur në 35 vite. Ky është një proces nuk do të bëhet çdo gjë në një ditë, do të kalojnë edhe ditë të tjera. Mesazhet ishin të qarta në atë protestë. Po të shohësh ka protesta masive në Serbi dhe qeveria është akoma aty nuk e realizojnë dot vetëm protestat, por duhet që të kombinohet edhe me objektivat e partnerëve strategjikë. Në Bullgari u rrëzua qeveria’, tha ai.

Alimehmeti shtoi se partia ndodhej në një gjendje përgjumjeje dhe kishte nevojë për një zgjim politik.

‘Unë kam qenë që në 2023 ku jam shprehur hapur që ne na duhet një pajtim kombëtar në opozitë, faktorët që duan të kontribuojnë kundër PS, pra për të rrëzuar Ramën. Mund të kemi mendime të ndryshme por objektivin e kemi të njëjtë. Mendoj se mund të kishte një mbledhje kryesie për ta bërë këtë s’kishte pse të ishte diskutim në publik. Po ne kishim një situatë përgjumje në PD dhe kishte nevojë për një zgjim. Në radhë të parë u bë zbritja në bazë, duhej që të bëhej analiza zgjedhore dhe kjo u arrit sepse tashmë janë ngritur grupet e punës. Ishte e nevojshme që të mblidhej Këshilli Kombëtare dhe u bë, ishte e nevojshme që të bëhej një protestë e kombëtare dhe u bë, pra zgjimi u arrit. Tani ka nevojë që të shkojë drejt alternativës qeverisëse’, tha ai.

Ai ka komentuar edhe marrjen e Belinda Ballukut, si të pandehur nga SPAK. Alimehmeti tha u veprua vetëm sepse çështja rrezikonte parashkrimin, çka solli ndërhyrjen në momentin e fundit. Sipas Alimehmetit, pritshmëritë e qytetarëve ndaj drejtësisë janë shumë të larta.

 ‘Janë afera që janë aty prej shumë vitesh, Balluku ndodhi tani sepse për një muaj parashkruhej, u veprua në moment të fundit. Mund të ishte shfrytëzuar shumë më para. Drejtësia shërben për të parandaluar, pas një ministri do të vijë një tjetër dhe jo të vijë me mendjen të kapim ça të kapim, por të thotë këtu drejtësia funksionon dhe s’ka më të pandëshkueshëm. Populli shqiptar pret shumë nga drejtësia. Ne i mbështesim institucionet por jo të jemi në këtë lloj niveli, ku është në sy të të gjithëve vjedhja’, tha ai.