Irani ka refuzuar propozimin amerikan me 14 pika për një memorandum që synonte t’i jepte fund konfliktit dhe t’i hapte rrugë negociatave intensive mes palëve në luftë që prej 28 shkurtit. Teherani iu përgjigj draftit amerikan me një letër disa faqëshe, ku paraqet kushtet e veta, por pa përmendur çështjen e programit bërthamor iranian dhe rezervat e uraniumit të pasuruar.

Presidenti amerikan Donald Trump reagoi duke e cilësuar përgjigjen e Iranit “totalisht të papranueshme”. Duke folur për mediat amerikane, ai tha se Amerika po monitoron nga afër rezervat iraniane të uraniumit, të cilat sipas tij “së shpejti mund të bien në duart e amerikanëve”.

Trump kishte paralajmëruar më herët se Teherani do t’i kthente përgjigje planit amerikan për memorandumin e paqes, por reagimi i Iranit rezultoi larg pritshmërive të Uashingtonit. Sipas raportimeve të “The Wall Street Journal”, që citon burime të njohura me përmbajtjen e dokumentit, përgjigjja iraniane nuk përmbush kërkesën kryesore të Amerikës mbi fatin e programit bërthamor dhe rezervat e uraniumit shumë të pasuruar.

Këto çështje pritej të diskutoheshin gjatë 30 ditëve të negociatave intensive që do të pasonin firmosjen e memorandumit. Në vend të kësaj, Teherani propozon ndalimin e armiqësive dhe rihapjen graduale të Ngushticës së Hormuzit për trafikun tregtar.

Irani mbrojti vendimin për të refuzuar draftin amerikan përmes zëdhënësit të Ministrisë së Jashtme iraniane, Esmaeil Baqaei, që deklaroi se propozimet e Teheranit ishin “të arsyeshme dhe bujare”.

“Gjithçka që kemi propozuar në tekst ishte e arsyeshme dhe bujare. Jo vetëm për interesat kombëtare të Iranit, por për të mirën dhe përparimin e rajonit dhe të botës. Palët amerikane vazhdojnë të këmbëngulin në kërkesat e tyre të padrejta”, tha ai, sipas mediave iraniane.

Shtetet e Bashkuara synonin që memorandumi me 14 pika të shërbente si bazë për negociata të plota mes dy vendeve, me qëllim zgjidhjen e çështjeve që mbajnë ende larg Uashingtonin dhe Teheranin.

Ndërkohë, kryeministri izraelit Benjamin Netanyahu deklaroi në një intervistë për CBS se “në Iran ka ende punë për t’u bërë”, duke theksuar se Teherani vazhdon të ketë kapacitete raketore dhe bërthamore.

Netanyahu foli edhe për mundësinë e rrëzimit të regjimit aktual iranian, duke thënë se një zhvillim i tillë do të çonte në dobësimin e grupeve aleate të Teheranit në Lindjen e Mesme, si Hezbollah, Hamas dhe Houthi.

 

Rendit zhvillimet sipas orarit:
Ora 15:53
Drejtuesi i kompanisë që zhvilloi sistemin: Kupola e Hekurt Izraelite është 99% efektive, thuajse perfekte

1778507654_rdyiii.jpg

Sistemi izraelit ‘Kupola e Hekurt’ ka qenë pothuajse 99% efektiv kundër raketave që vijnë nga Hamasi dhe Hezbollahu dhe ka kapur shumicën e atyre të qëlluara nga Irani, sipas drejtuesit të kompanisë që e zhvilloi sistemin.

Yuval Steinitz, kryetar i kompanisë shtetërore Rafael Advanced Defence Systems Ltd, tha se që nga sulmet e 7 tetorit 2023, rreth 40,000 raketa janë qëlluar drejt Izraelit nga grupet militante në Gaza dhe Liban.

"Iron Dome i kapi shumicën e tyre me një shkallë suksesi që nuk është 100%, por afër 100%. Është rreth 98%, madje 99%, kështu që nuk është perfekte, por pothuajse perfekte", tha Steinitz.

Ndërkohë, Irani ka qëlluar rreth 1,500 raketa balistike drejt Izraelit gjatë luftës aktuale dhe një raundi të mëparshëm luftimesh në vitin 2024.

Sipas Steinitz, vetëm disa dhjetëra prej tyre nuk u rrëzuan nga Kupola e Hekurt.

R.Xh/Shqiptarja.com

Ora 15:43
Mediat iraniane: Vetëm një cisternë nafte ka kaluar në Ngushticën e Hormuzit në 24 orët e fundit, me lejen e Marinës sonë

1778254152_StraitHormuzDB05042026A.jpg

Në 24 orët e fundit, vetëm një anije cisternë nafte ka kaluar nëpër Ngushticën e Hormuzit, dhe e ka bërë këtë me lejen e Marinës Iraniane.

Lajmin e raportoi media iraniane IRIB, e cila theksoi se anija aktualisht është duke u drejtuar për në Vietnam.

Këtë mëngjes, agjencia iraniane e lajmeve Tasnim raportoi se Agios Fanourios I, një supertanker (VLCC) i ngarkuar me naftë bruto irakiane dhe i drejtuar për në portin e Nghi Son në Vietnam, kaloi dje nëpër Ngushticën e Hormuzit dhe aktualisht ndodhet në Gjirin e Omanit.

Raportet e mëparshme tregonin se anija, që mbante flamurin maltez, kishte kaluar nëpër Ngushticë ndërsa kishte fikur sinjalet e saj të vendndodhjes për të shmangur sulmet iraniane. Sipas një raporti të sotëm nga Tasnim, anija kaloi nëpër Ngushticë në koordinim me Iranin.

R.Xh/Shqiptarja.com

Ora 15:35
BE vendos sanksione ndaj pushtuesve izraelitë dhe organizatave të tyre

1778421906_flamuriibe.avif

Foto: Flamuj të BE-së

Ministrat e Jashtëm të Bashkimit Evropian ranë dakord për një raund të ri sanksionesh ndaj pushtuesve izraelitë dhe organizatave të akuzuara për mbështetje të aktiviteteve të paligjshme të vendbanimeve në Bregun Perëndimor.

Ministri i Jashtëm francez, Jean-Noel Barrot, njoftoi se BE-ja po vendos masa ndëshkuese ndaj organizatave izraelite që, sipas tij, mbështesin “kolonizimin ekstremist dhe të dhunshëm” në Bregun Perëndimor, si dhe ndaj drejtuesve të tyre.

“Bashkimi Evropian po vendos sanksione sot ndaj organizatave kryesore izraelite, fajtore për mbështetjen e kolonizimit ekstremist dhe të dhunshëm të Bregut Perëndimor. Këto akte shumë serioze dhe të patolerueshme duhet të ndalen pa vonesë”, shkroi Barrot në platformën sociale X.

Ai shtoi se BE-ja ka miratuar gjithashtu sanksione ndaj “udhëheqësve kryesorë të Hamasit”.

Sipas Barrot, Franca dhe partnerët evropianë synojnë të mbështesin zgjidhjen me dy shtete, ku Izraeli dhe Palestina të jetojnë “krah për krah në paqe dhe siguri”.

Vendimin e konfirmoi edhe shefja e politikës së jashtme të BE-së, Kaja Kallas, e cila deklaroi se ministrat e jashtëm “miratuan sanksione ndaj kolonëve izraelitë për dhunën kundër palestinezëve”.

“Ishte koha e duhur që të kalonim nga bllokimi në arritjen e qëllimit. Ekstremizmi dhe dhuna kanë pasoja”, shkroi Kallas në X.

Xh.K/Shqiptarja.com