Ish-të përndjekurit politik: Gjyqtarët
e regjimit, jashtë sistemit të drejtësisë

Përfaqësues të shoqatave të ish-të përndjekurve politikë kanë protestuar paraditën e kësaj të mërkure, përpara Gjykatës së Lartë. 

Ish-të përndjekurit kërkuan largimin nga sistemi i drejtësisë të gjykatëve që kanë shërbyer gjatë regjimit komunist. 

Ata i bënë thirrje kryeministrit Rama që t'i mbajë larg drejtësisë së re, këta kamikazë të së kaluarës, siç i quajtën ata gjyqtarët dhe prokurorët që kanë shërbyer gjatë diktaturës. 

"Reforma në drejtësi duhet të pastrojë dhe të nxjerrë jashtë sistemit të drejtësisë të gjithë ata gjyqtarë, prokurorë të diktaturës komuniste të cilët janë përfshirë direkt në shkeljen e dhunimin direkt të lirive dhe të drejtave të njeriut. Këta prokurorë, gjyqtarë, që kanë 25-vite që e shkatërruan këtë sistem drejtësisë, duke korruptuar dhe duke degraduar në mënyrë sistematike. Nuk mund të ketë dy standarde z.Kryeministër, në një sistem demokracie, ata që krijuan dhe depërtuan në administratën shtetërore korrupsionin, këtë krim që po i merr frymën shoqërisë dhe e kanë paraqitur kombin tonë me imazhin më të keq në Europë. Ka tre vite që kjo mazhorancë nuk pranon në Gjykatën e Lartë, gjyqtarë, por i lë vendet vakant që të mbajë militantët e Partisë Socialiste. Z.Kryeministër, Gjykata Kushtetuese për një militantin tënd besnik, ish-prokurorin, tani anëtar i Gjykatës së Lartë pa mandat, Ardian Dvorani, e mbani në Gjykatë dhe e paguani me taksat e qytetarëve shqiptarë", u shpreh ish-i dënuari politik, Besim Ndregjoni. 

Ish-të përndjekurit theksuan se do të ngrihen në protesta për përjashtimin e gjyqtarëve që pretendohet se kanë shërbyer gjatë regjimit komunist.

"Do të ngriheni në protesta të fuqishme, derisa të shporren njëherë e përgjithmonë nga drejtësia shqiptare këta ish-diktatorë, kriminelë të diktaturës që i la diktatura si mbeturina të saj", tha Fatmir Hoxha, ish- i burgosur politik.  

Redaksia Online
l.q/Shqiptarja.com