Një orë pas deklaratës së Partisë Demokratike, e cila tha se, ish rektori Kule dhe ai aktual Koni kanë bërë takime informate me ministrat dhe kryeministrin, Universiteti i Tiranës në një deklaratë të shpërndarë për mediat, ka reaguar duke hedhur poshtë këtë pretendim.

Në reagimin e posaçëm, Universiteti i Tiranës saktëson se takimet e rektorit në detyrë Dhori Kule dhe atij aktual Mynyr Koni kanë qenë zyrtare dhe se ministrat përkatës kanë marrë përgjegjësitë institucionale për kërcënimet e bëra nga Shullazi.

Universiteti sqaron se, Kule dhe Koni janë takuar me Saimir Tahirin dhe Lindita Nikollën, duke ndjekur kështu rrugën zyrtare për zgjidhjen e problemit.
 
Ja njoftimi për shtyp
Sqarim lidhur me lajmin e shpërndarë në disa media mbi takimin e zhvilluar me Ministrin e Brendshëm, Ministren e Arsimit dhe drejtuesit e Policisë së Shtetit me rektorin e Universitetit të Tiranës dhe dekanin e Fakultetit të Shkencave të Natyrës, kandidatin për rektor Mynyr Koni:

Në takimin zyrtar që rektori i UT-së dhe kandidati për rektor ka zhvilluar me Ministrin e brendshëm, Ministren e Arsimit dhe drejtuesit e lartë të Policisë së Shtetit, ju informojmë se ky takim ka qenë zyrtar dhe rruga e zgjedhur për t’u përballur me problematikën e shfaqur gjatë procesit zgjedhor në UT ka qënë vetëm ajo zyrtare.

Institucionet e përfaqësuara në këtë takim kanë marrë përsipër përgjegjësitë e tyre institucionale.
 
Redaksia Online
(F.T/shqiptarja.com)