Kamëz, konflikt me Bashkinë
për një lokal: dy të plagosu

KAMEZ - Dy persona kanë mbetur të plagosur gjatë një konflikti mes Policisë Bashkiake të Kamzës dhe pronarëve të një lokali në qendër të Kamzës. Konflikti ka nisur pasi ndërtimorët kanë shkuar për të shembur lokalin në pronësi të kushërinjve Bori.

Sipas dëshmisë ekskluzive për TV A1Report të Genti Borit, i cili ka mbetur i plagosur në këtë konflikt të Bashkisë me kushëririn e tij, shkak për këtë përplasje është bërë fakti që ai nuk ka pranuar të japë objektin e tij për ngritjen e një pallati.

Sipas tij, pas kësaj ngjarje fshihet kreu i Bashkisë së Kamzës, Xhelal Mziu, pasi nipi i tij kërkon truallin për të bërë pallat. “Nuk patëm pakt me arkitektin e Bashkisë së Kamzës për të bërë një pallat gjigand, qendër biznesi”.

Në dëshminë e tij për A1 Report, Genti Bori thekson se është goditur nga një person me levë në kokë, ndërsa policia nuk ka ndërhyrë për ta ndaluar atë. “Ata kanë dhjetë ditë që më vijnë, kam mesazhe, telefonata”, tregoi ai për A1Report. “Nuk kishin vendim prishjeje - vazhdoi ai më tej - Po të kishin vendim prishjeje, i thashë, fute fadromën në kat të tretë”.

Të njëjtën dëshmi ka dhënë për A1Report edhe një tjetër dëshmitar në vendngjarje.

Bashkia Kamëz pas konfliktit deklaroi se çdo veprim i ndërmarrë nga ana e saj është në përputhje me ligjin dhe se pronarët ishin njoftuar më parë për vendimin e Inspektoratit për prishjen e ndërtimeve pa leje.

(jd/im/shqiptarja.com)

TAG:
• Bashkia Kamez