Kërcënohet gazetari i Report Tv, Armand Braho: Shantazh në krye të detyrës nga shoferi i Bashkisë Pogradec, s’tërhiqem nga misioni im për të vërtetën

KORÇË- Gazetari i Report Tv në Korçë, Armand Braho është përballur sot me një incident të rëndë, ku është kërcënuar nga një punonjës i Bashkisë së Pogradecit gjatë ushtrimit të detyrës si gazetar për pasqyrimin e një aktiviteti.

Gazetari Braho ka bërë edhe një reagim mbi këtë incident të rëndë, ku thotë se është kërcënuar dhe ofenduar nga Ylli Blacëri, me detyrë shofer në Bashkinë e Pogradecit. Braho thotë se kjo ishte një përpjekje për të penguar dhe ushtruar presion ndaj tij për shkak të misionit të tij si gazetar.

Për rastin në fjalë, gazetari Braho i është drejtuar organeve kompetente me një kallëzim për shoferin e Bashkisë Pogradec, Ylli Blacëri, i njohur ndryshe me pseudonimin “Ylli Cepi”.

Në deklaratën e tij, gazetari Braho thekson se Bashkia e Pogradecit përfshin shumë njerëz të tillë që si gjuhë komunikimi kanë vetëm dhunën dhe rrugaçërinë, por thekson se nuk do të tërhiqet nga misioni i tij për të thënë gjithnjë të vërtetën.

“Padyshim, kjo histori shantazhi nuk përfundon këtu. Unë, as në këtë rast, nuk do të tërhiqem nga puna ime e përditshme dhe gjurmimi i të vërtetës, në një qytet ku po lulëzon korrupsioni dhe aferat publike. Elementë të tillë dhe gjuha rrugaçërore e mbushur me kërcënime, e përdorur nga ana e tyre, më bëjnë më të fortë”, shkruan Braho.

Redaksia e Report TV dhe Shqiptarja.com dënon ashpër kërcënimin ndaj gazetarit Armand Braho. Ky akt i papranueshëm është një sulm ndaj lirisë së fjalës dhe misionit të gazetarit për informimin e qytetarëve.

Rasti në fjalë u dënua edhe nga deputetja demokrate Ina Zhupa, e cila i bëri thirrje Prokurorisë që të vendosë para ligjit ata që cenuan gazetarin Braho në krye të detyrës.

Edhe Shoqata e Gazetarëve Europianë në Shqipëri dënoi kërcënimin ndaj gazetarit Armand Braho, duke e quajtur një akt të paprecedentë. AEJ Shqipëri i bën thirrje Policisë së Shtetit dhe të Drejtësisë që të hetojnë me përparësi këtë incident dhe të ndëshkojnë çdo individ që cënon pavarësinë dhe sigurinë e gazetarëve.

Reagimi i plotë i gazetarit të Report Tv, Armand Braho

Të nderuar miq, bashkëqytetarë dhe kolegë!

Ditën e sotme, personalisht jam hasur me një rast të paprecedent dhe jashtë çdo logjike njerëzore dhe ligjore. Shtetasi Ylli Blacëri, i njohur me pseudonimin “Ylli Cepi” dhe me detyrë shofer në Bashkinë e Pogradecit, më ka ofenduar dhe kërcënuar gjatë një aktiviteti të mbajtur pranë Bashkisë në Pogradec. Ky akt është ndërmarrë nga personi në fjalë si një mënyrë për të më penguar dhe presionuar për shkak të detyrës sime. Në këto kushte, i jam drejtuar Komisariatit të Pogradecit, ku kam bërë kallëzim penal për këtë shtetas, i cili ka ndërmarrë një akt hajvanërie dhe vagabondizmi duke fyer një gazetar që është në krye të detyrës.

Në dukje, individë të tillë, me detyra minimaliste në administratën publike dhe që ndërmarrin akte të dhunshme, nxjerrin në pah arrogancën që qytetarët e Pogradecit hasin çdo ditë. Akte të tilla, për mua personalisht, janë sinjale që tregojnë se në vende si Pogradeci, detyra ime si gazetar duhet të intensifikohet dhe të nxjerrë në pah shkeljet apo abuzimet që mbrohen nga persona të tillë.

Sot kam një thirrje për institucionin e Policisë së Shtetit dhe Institucionet e Drejtësisë, të cilat duhet të japin një shembull të denjë për individë të tillë, që tentojnë të shtypin fjalën e lirë dhe misionin e shenjtë të gazetarit. Qartësisht, nuk pres ndonjë reagim nga Bashkia e Pogradecit, e cila përfshin shumë njerëz të tillë që si gjuhë komunikimi kanë vetëm dhunën dhe rrugaçërinë. Padyshim, kjo histori shantazhi nuk përfundon këtu. Unë, as në këtë rast, nuk do të tërhiqem nga puna ime e përditshme dhe gjurmimi i të vërtetës, në një qytet ku po lulëzon korrupsioni dhe aferat publike. Elementë të tillë dhe gjuha rrugaçërore e mbushur me kërcënime, e përdorur nga ana e tyre, më bëjnë më të fortë.

Falënderim dhe vlerësim për të gjithë miqtë që kanë reaguar për situatën dhe për ata që më kanë komunikuar në këto momente. Yllin dhe “yjet e ditëve të shkurtra” po ia lë ligjit, ndërsa fokusi im do të vazhdojë të jetë vetëm informimi i drejtë i qytetarëve.

Me respekt dhe përulësi,

Armand Braho

Rendit zhvillimet sipas orarit:

Të Fundit Të Parat

SI.E./Shqiptarja.com

TAG:
• Bashkia Pogradec
• pogradec
• Ylli Blacëri
• Korce
• armand braho