Korçë, shtëpi mbështetëse për
personat me probleme mendore

Në Ditën Botërore të Shëndetit, zv. Kryeministri, Niko Peleshi, Ogerta Manastirliu, Ministre e Shëndetësisë, Dr. Nazira Artykova, përfaqësuese e OBSH-së në Shqipëri dhe Drejtore e Zyrës Vendore të OBSH-së, si dhe përfaqësues të pushtetit vendor inauguruan shtëpinë e re mbështetëse në qytetin e Korçës, e cila është rikonstruktuar dhe pajisur, tërësisht me fonde të buxhetit të shtetit.

Zëvendëskryeministri tha: “Kjo është një qendër fantastike, sipas një koncepti shumë modern, me synim riaftësimin dhe rikthimin e në jetën normale të personave me probleme të shëndetit mendor. Dua të përgëzoj ministren që, padyshim, vjen me një model shumë të suksesshëm nga Qendra Spitalore “Nënë Tereza” dhe tani në drejtim të Ministrisë së Shëndetësisë”.

Gjatë fjalës së saj, ministrja Manastirliu, u shpreh se “grupi i sëmundjeve të shëndetit mendor është i treti për nga pesha që zë në barrën e sëmundshmërisë, pas sëmundjeve kardovaskulare dhe atyre tumorale”.

Ajo theksoi prioritetin e dikasterit që drejton për të shtuar kapacitetet e këtyre shtëpive mbështetëse por edhe për të rritur numrin e tyre, pasi ne besojmë se riintegrimi në jetesën në komunitet është investimi më i mirë që mund të bëjmë për të sëmurët me probleme të shëndetit mendor.

Rikonstruksioni dhe pajisja e shtëpisë mbështetëse në Korçë është financuar nga buxheti i shtetit me vlerë 42.8 milionë lekë. Në këtë shtëpi mbështetëse shërbimi akomodohen 12 banorë me probleme të shëndetit mendor, të cilët transferohen nga Spitalet Psikiatrik. Kujdesi i ofruar është multidisiplinar, me mjekë psikiatër, psikolog, punonjës social, inferimer, me qëllim përkujdesen dhe rehabilitimin e këtyre personave me probleme të shëndetit mendore. Në total janë 13 shtëpi mbështetëse në të gjithë vendin tonë në të cilat janë akomoduar 138 banorë me probleme të shëndetit mendor.

“Depresioni, le të flasim”
Këtë vit, Dita Botërore e Shëndetit është nën moton: “Depresioni, le të flasim”, të dhëna dhe fakte për depresionin”. Depresioni është shkaku kryesor i sëmundshmërisë dhe paaftësisë në mbarë Botën.

Sipas vlerësimeve të OBSH-së, numri i të prekurve nga depresioni është rritur në mënyrë dramatike në 10-vjeçarin e fundit. Sot në Botë janë rreth 300 milion njerëz që jetojnë me depresion. Stigma dhe mungesa e mbështetjes për personat që vuajnë nga problemet e shëndetit mendor ka nxitur OBSH-në të ndërmarrë fushatën “Depresioni, le të flasim”.



Redaksia Online
Al.N/Shqiptarja.com