Kosovë- Shënohet ulje e vdekshmërisë prenatale

/ATSH/.- Në Kosovë është përmirësuar shëndeti i nënës dhe fëmijës, dhe kjo vihet re sidomos në uljen e vdekshmërisë prenatale.
Kështu u tha në takimin e tetë të Komitetit Drejtues të Programit të Përbashkët të Agjencioneve (KDPPA). Ky takim u drejtua nga sekretari i përgjithshëm i Ministrisë së Shëndetësisë të Kosovës, Gani Shabani, ku pjesëmarrës ishte shefi i Ambasadës së Luksemburgut në Prishtinë, Pierre Weber dhe udhëheqës e zyrtarë të organizatave ndërkombëtare si Organizata Botërore e Shëndetësisë (OBSH), UNICEF dhe UNFPA, të cilat janë anëtare të këtij komiteti.
Sekretari Shabani tha se kur në takime raportohen aktivitete të zhvilluara me rezultate pozitive, dëshmohet se vetëm me angazhim dhe bashkëpunim mund të arrijmë rezultatet evidente.
"Na gëzon fakti se ka trende të përmirësimit të shëndetit të nënës dhe fëmijës, sidomos në uljen e vdekshmërisë prenatale (sipas rezultateve paraprake të raportit 2014 të KDPPA-së), vdekshmëria ka shënuar rënie", tha Shabani.
Në takim u evidentua se ka shumë sfida sa i përket shëndetit të nënës dhe fëmijës, por të cilat me një aktivitet të shtuar dhe bashkëpunim të vazhdueshëm të MSH-së dhe organizatave pjesëmarrëse në KDPPA, mund të kalohen.
Në takim, ndër të tjera u miratua Raporti për vitin 2014 dhe Plani i veprimit të Programit të Përbashkët të Agjencioneve (Partneriteti për Përmirësimin e Gruas dhe Fëmijës në Kosovë), për vitin 2015./Kosovapress/