Kryemadhi: Këto ditë shiu do mbyllen, ditë të bukura do vijnë për shqiptarët! Në 13 prill dilni në protestë

Kryetarja e Lëvizjes Socialiste për Integrim, Monika Kryemadhi ka radhitur sot një sërë arsyesh pse sipas saj qytetarët shqiptarët duhet të dalin në protestë kundër qeverisë më 13 prill, në tubimin e organizuar nga opozita e bashkuar, tashmë joparlamentare.

Në një deklaratë nga selia e LSI-së, Kryemadhi tha se qeveria u ikën përgjegjësive të saj, ndërkohë që policia e shtetit sipas saj është e lidhur me krimin dhe në shërbim të bandave.

"13 prilli është  protesta e gjithë qytetarëve. Do të jetë protestë, ku të gjithë ne së bashku t’i japim fund tranzicionit dhe të ndërtojmë sistemin e vlerave dhe të përmbysim sistemin e antivlerave. Të përmbysim sistemin e krimit të organizuar, të përmbysim sistemin e njerëzve të kapur. Ditë të reja dhe të bukura do të vijnë për shqiptarët, këto ditë shiu do të mbyllen bashkë me errësirën bashkë me ligësinë e një njeriu që ka kapur këtë vend dhe të ardhmen e fëmijëve shqiptarë. Zoti i ruajtë të gjithë shqiptarët", tha Kryemadhi .

LEXO EDHE:
Adriatik Doçi: Deputetët e PD që kanë mbi 3 shtëpi me rrogë shteti, bie sfida e Berishës për Altin Dumanin

Deklarata e Monika Kryemadhit

Më lejoni që në emër të LSI-së të mbaj këtë qëndrim zyrtar përsa i përket situatës në vazhdim në vendin tonë. Ngjarja shumë e rëndë e Aeroportit Ndërkombëtar të Rinasit ka tronditur jo vetëm qytetarët shqiptarët, ku tregon pasigurinë, por ka tronditur, por ka tronditur dhe sigurinë në të gjithë rajonin. Sepse nëse një aeroport ndërkombëtar, i një vendi anëtar të NATO-s, mund të hyhet dhe mund të cenohet në mes të ditës nga bandat e krimit të organizuar është cenim i sigurisë kombëtare, por edhe cënim i sigurisë rajonale. Sot qytetarët shqiptarë ndihen të pasigurt, sepse Aeroporti Ndërkombëtarë i Rinasit, që duhet të jetë vendi i parametrave më të larta të sigurisë, paraqitet si një objekt i atakueshëm nga kriminelët sa herë që u duhet atyre për ta atakuar këtë institucion, por edhe sa herë që atyre u duhen para për tu bërë gati përpara zgjedhjeve të rradhës. Ndihen më shumë të pasigurtë qytetarët shqiptarë sepse kanë përballë një qeveri, e cila në vend që të marrë përgjegjësitë e saj që rëndojnë mbi të, fillon dhe justifikohet si gjithmonë. U ikën përgjegjësive të saj me një sjellje, cila jo vetëm nuk inkurajon qytetarët, por i dekurajon ata, në mënyrë të tillë duke u dhënë forcë, pushtet dhe mbështetje kriminelëve të cilët nuk ndihen aspak të rrezikuar nga forca e ligjit, por ndihen të mbështetur dhe të përkrahur nga qeveria dhe policia e saj, e cila sot “merr përsipër” për të mbrojtur qytetarët shqiptarë. Qytetarët e thjesht ndihen krejtësisht të pasigurt, sepse nuk shohin askënd që të jetë larguar nga detyra, apo të jetë hetuar, apo të jetë thirrur nga Prokuroria. Por përkundrazi qytetarët shqiptarë shohin që arrestohen nga Prokuroria, thirren nga Prokuroria ata të cilët luftojnë për të mbrojtur shtëpitë e tyre, të cilat i kanë ndërtuar me gjak, me djersë dhe kanë mbi 27 vjet që i paguajnë taksa shtetit shqiptar. Të gjithë vazhdojnë t’ja hedhin fajin njëri-tjetrit, nga ministri, nga drejtorët, nga policia, nga konçensionarët e kështu me rradhë, duke bërë deklarata boshe dhe duke bërë demagogjinë e rradhës. Një ngjarje e tillë e rëndë, që përsëritet vazhdimisht në këto vitet e fundit sa herë që kriminelët duan të hyjnë, të sulmojnë dhe të grabisin, tashmë është bërë një provë e qartë e dështimit të qeverisë. E dështimit të kësaj qeverie, që nuk përfaqëson qytetarët shqiptarë, nuk përfaqëson as Partinë Socialiste, por përfaqëson bandat, krimin e organizuar, trafikun e drogës. Kjo qeveri tashmë nuk është gjë tjetër veçse një provë e pandëshkueshmërisë së të gjithë këqijave të këtij vendi, duke filluar nga varfëria, nga korrupsioni, nga krimi i organizuar dhe nga kapja e shtetit në dorë të pesë vetëve, që në krye kanë kryeministrin e tyre Edi Rama. Shqiptarët nuk duan të dëgjojnë më, “po ndodh kështu si në të gjithë botën”, “bëhen dhe filma dhe në Hollivud me ngjarje të tilla”. Shqiptarët meritojnë siguri, shqiptarët meritojnë vëmendje, shqiptarët meritojnë punë, shqiptarët meritojnë që fëmijët e tyre të jetojnë në Shqipëri, të ndërtojnë të ardhmen e tyre dhe ta kenë Shqipërinë shtëpinë e tyre.

Një polici tashmë e dorëzuar plotësisht, e çorganizuar përballë krimit dhe kriminelëve demostron jashtëzakonisht shumë, demostron rënien e shtetit dhe demonstron që një polici e tillë shërben bandave dhe nuk është më partnere e qytetarëve, nuk është më garantuese dhe rojtare e sigurisë së qytetarëve, por është kthyer në armike e qytetarëve dhe garanton dhe ruan krimin dhe bandat. Gjaku në fytyrën e qytetarëve të Bregut të Lumit është akuza më e madhe ndaj policisë së shtetit dhe ndaj kësaj qeveri të rënë. Protestat e banorëve të Unazës së Re për më shumë se pesë muaj është akoma një akuzë që qëndron dhe përballet përballë kësaj policie të ç’organizuar dhe kësaj qeverie grabitëse, që grabit pronat e qytetarëve, shtëpitë e qytetarëve për t’ja u dhënë bandave dhe trafikantëve për të pastruar paratë e tyre. Kjo gjë tashmë është bërë një provë, ku prona, liria dhe dinjiteti i shqiptarëve nuk është më vlerë për qeverinë, por përkundrazi këto virtyte tashmë janë kthyer në antivlera për qeverinë, ku për hir së të vërtetës këto janë vlerat e qytetarëve shqiptarë.

Shteti tashmë është vënë në dispozicion të krimit, trafiqeve dhe jo qytetarëve. Shteti  nuk është më në vijë të parë në luftën kundër krimit të organizuar. Por është në vijë të parë në luftën kundër qytetarëve të saj, kundër protestuesve të thjeshtë. Shteti grabit miliona me konçesione, në vend që të shpenzojë miliona për të ringritur Policinë përballë një krimi të organizuar që fuqizohet gjithmonë e më shumë. Përballë një krimi të organizuar që është më i pasur, që ka më shumë para, ne kemi një polici dhe policë të cilët paguhen më pak se ç’janë paguar në këto 30 vjet tranzicion. Kemi një polici të demotivuar, pagesat e të cilëve janë në kushtet e mbijetesës njerëzore. Kemi një qeveri që sot  i dëgjojmë që bëjnë deklarata qesharake ku ja hedhin fajin njëri-tjetri. Kemi një ministri të brendshme me një gjeneral që deklaron në Kuvend se është cënuar siguria, kemi dhe një ministri mbrojtje ku deklaron se nuk kemi cënim të sigurisë kombëtare. I vendosin shqiptarët përballë një gjeagjëze, e cila nuk ka zgjidhje kurrë. Por ka vetëm një përgjigje, kapja e shtetit. Kapja e shtetit është ajo e cila sot po jep efektet e saj. Sot Kuvendi ilegjitim do të miratojë një rezolutë, përsa i përket hapjes së negociatave. Në fakt ata deputetë që kanë pak dinjitet në atë parlament dhe ata me  eksperiencë, të cilët e kuptojnë rrugën pakrye që i ka futur Edi Rama, duhet të qartësojnë përfundimisht nëse qeveria shqiptare i ka hapur negociatat apo jo. Ju kujtoj deklaratën e qershorit të 2018, ku Edi Rama me shokë hapën shishet e shampanjës për të festuar hapjen e negociatave. Demagogjia dhe propaganda boshe për të lyer fasadat e godinave të kalbura ka mbaruar. Prandaj dhe 13 Prilli do të jetë protesta e të gjithë qytetarëve. Do të jetë protesta e bizneseve të vogla, të cilët po falimentojnë çdo ditë. Do të jetë protesta e shtresës së mesme, e cila po largohet çdo ditë. Do të jetë protesta e pensionistëve, ku pensionet e tyre nuk dalin as për të paguar dritat dhe ujin, e jo më për të paguar ilaçet. Sepse po nuk pagove dritat dhe ujin përfundon në birucat e krimit të organizuar. Ndërsa kriminelët shëtisin në mes të Tiranës si zot të këtij vendi. Do të jetë protesta e studentëve, kërkesat e të cilëve jo vetëm që nuk u realizuan, por shkuan më lart, i rritën tarifat e tyre. Do të jetë protesta e atyre pedagogëve apo dhe e atyre rektorëve të cilët Edi Rama i përdori për të shuar protestën e studentëve, për të kërcënuar studentët, për të kërcënuar pedagogë që përkrahën studentë dhe tashmë i çon në dyert e Prokurorisë për tu mbyllur karrierën e tyre me turp. Do të jetë protesta e atyre mjekëve dhe infermierëve, të cilët kanë filluar kurset e gjermanishtes për t’u larguar nga Shqipërisë, sepse nuk kanë më asnjë lloj garancie për profesionin e tyre dhe për sigurinë e jetës së tyre.

Do të jetë protesta e mësuesve shqiptarë, të cilët ndihen më të rrezikuar se kushdo tjetër, që janë nën efektin e njerëzve të paaftë, mediokër të arsimit shqiptar që po e shkatërrojnë  çdo ditë e më shumë. Do të jetë protesta e të papunëve, të cilët po gjejnë mënyra të trafikut të njerëzve për t’u larguar nga Shqipëria dhe për t’i çuar në ilegalitet për të punuar në vendet e BE. Do të jetë protesta e atyre nënave të veshura me të zeza, të cilat nuk gjejnë sot akoma fëmijët e tyre që janë zhdukur nga droga dhe krimi i organizuar. Do të jetë protesta e të gjithë atyre prindërve, që duan të krijojnë një të ardhme të sigurt për fëmijët e tyre. Do të jetë protesta e fermerëve dhe e blegtorëve, të cilët po vazhdojnë dhe po mbajnë me sakrifica të papara fermat e tyre edhe pse shteti i shikon si armiq. Do të jetë protesta e te gjithëve, do të jetë protesta e shqiptarëve, do të jetë protesta e të gjithë atyre njerëzve, të cilët ndihen shqiptar e duan vendin e tyre dhe duan të mbyllin njëherë e përgjithmonë këtë tranzicion të hidhur dhe të dhimbshëm prej  30 vitesh.  Do të jetë protesta e të gjithë atyre që duan të bëjnë një pakt, një pakt kombëtar, një pakt të sinqertë, ku të shikojmë në sy njëri-tjetrin për të krijuar axhendën e ardhme të Shqipërisë, një axhendë të së ardhmes së shqiptarëve, një axhendë që garanton sigurinë, garanton lirinë, garanton të drejta të barabarta, garanton një sistem drejtësie të barabartë, garanton një shëndet publik për të gjithë shqiptarët të barabartë, garanton një arsim të barabartë, garanton çdo gjë që të gjithë të jenë të barabartë përballë shtetit. Do të jetë protestë, ku të gjithë ne së bashku t’i japim fund tranzicionit dhe të ndërtojmë sistemin e vlerave dhe të përmbysim sistemin e antivlerave. Të përmbysim sistemin e krimit të organizuar, të përmbysim sistemin e njerëzve të kapur. Ditë të reja dhe të bukura do të vijnë për shqiptarët, këto ditë shiu do të mbyllen bashkë me errësirën bashkë me ligësinë e një njeriu që ka kapur këtë vend dhe të ardhmen e fëmijëve shqiptarë. Zoti i ruajtë të gjithë shqiptarët

TAG:
• monika kryemadhi
• protesta e 13 prillit

Sondazhi i ditës:

Si ka qenë për ju viti 2024?

• I mirë

  44%

• I keq

  22.8%

• As i mirë as i keq

  33.2%

Vota total: 1490

Votat totale janë unike

• Sondazhi i ditës:

  Si ka qenë për ju viti 2024?

  I mirë I keq As i mirë as i keq