Kryemadhi me strukturat e LSI: Bashkinë e Fierit nuk e drejton kryetari por gruaja e tij

Kryetarja e Lëvizjes Socialiste për Integrim, Monika Kryemadhi, ishte në Fier ku zhvilloi një takim me strukturat e partisë në këtë qytet. Përveç akuzave drejtuar qeverisë, kryeministrit dhe ministrave, Kryemadhi ka akuzuar sot edhe kryetarin e Bashkisë së Fierit, socialistin Armando Subashi, se nuk ka bërë aq sa duhet për qytetarët e Fierit. Kryemadhi tha para strukturave të LSI në Fier, se bashkia e Fierit, nuk drejtohet nga “kryetari” por nga “gruaja” e tij.

“Ju e dini vetë shumë mirë dhe e ndjeni këtu në Fier sesi socialistët për të shkuar dhe për të mbaruar një punë Bashkinë e Fierit nuk e mbarojnë dot sepse ne e dimë të gjithë dhe e thotë i gjithë Fieri që Kryetari i Bashkisë së Fierit nuk është Kryetari, por është gruaja e Kryetarit, e thonë fierakët vetë.”-tha Kryemadhi.

Pjesë nga deklarata e Monika Kryemadhit në Fier:

Mendimi ynë është që nuk është më koha për të bërë rolin e intelektualit dhe rolin e kritizerit, thjesht duke vëzhguar apo duke kritikuar apo duke konstatuar probleme, por tashmë ne duhet të marrim në dorë fatet tona për të zgjidhur problemet në të cilat kalon Shqipëria. Në fakt me thënë të drejtën parada kishte vetëm një element, që në këto vite ekonomia shqiptare ka pasuruar vetëm disa persona dhe ka varfëruar 98% të shqiptarëve. Vetëm 2% e shqiptarëve janë pasuruar, ku janë klientët e Edi Ramës, ministrat e Edi Ramës dhe për të shpëtuar fytyrën e vetë rrëzoi qeverinë e tij të re që ishte pa tepsi dhe pa kazan, dhe ngriti një qeveri tjetër që është qeveri UFO-sh, që nuk kanë asnjë lloj identiteti apo përfaqësie se çfarë do të na sjellin apo do të përfaqësojnë në vendin tonë.  ajo që mendoj unë që është shumë e rëndësishme është sensibilizimi, është sensibilizimi dhe zgjimi i ndjenjës se protestës.Unë jam e bindur që socialistët janë më të zemëruar se demokratët apo se anëtarët e partisë sonë. Pse janë më të zemëruar? Janë të zemëruar se e kanë ndjerë veten të shfrytëzuar, të përdorur, të konsumuar dhe në fund të ditës janë njerëz që janë që janë më pak të shpërblyer nga pushteti i tepsisë së Edi Ramës. Ju e dini vetë shumë mirë dhe e ndjeni këtu në Fier sesi socialistët për të shkuar dhe për të mbaruar një punë Bashkinë e Fierit nuk e mbarojnë dot sepse ne e dimë të gjithë dhe e thotë i gjithë Fieri që Kryetari i Bashkisë së Fierit nuk është Kryetari, por është gruaja e Kryetarit, e thonë fierakët vetë. 

//Shqiptarja.com

TAG:
• monika kryemadhi
• Armando subashi