Tiranë-  Kryeministri Edi Rama priti vizitorët e fluturimit të parë direkt të linjës Izrael-Shqipëri, një event ky i veçantë, duke u shtruar edhe një darkë të gjithëve të shoqëruar me momente festive, këngë dhe valle me motive popullore të vendit tonë.

Kreu i qeverisë vlerësoi miqësinë e hershme Shqipëri-Izrael, teksa theksoi se do forcohet edhe më tej, në kuadër të Shqipërisë Turistike, që do lehtësojë bashkëpunimin në shumë fusha.

“Mirë se vini në Shqipëri! Kënaqësi të mikprisja vizitorët e fluturimit të parë të linjës direkte Izrael - Shqipëri, që do të mundësojë forcimin e lidhjes mes dy popujve që historia i ka lidhur ngushtë në orët më të vështira të kohërave, si edhe do t’i shtojë Shqipërisë Turistike një burim të ri rritjeje, ndërkohë që do të lehtësojë bashkëpunimet në të gjitha fushat”, u shpreh kryeministri me një video-postim në rrjetin social Facebook sot (2 prill).

Dhe para të pranishmëve ai mbajti një fjalë të shkurtër, duke shtuar se “jam i sigurt se kur të shkoni në vendin tuaj, do doni të riktheheni përsëri”.

“Qëllimi ynë është të jemi horizonti dhe vendi juaj dhe jam i sigurt se kur të ktheheni në vendin tuaj, do të dëshironi të riktheheni përsëri”.

Postimi i kryeministrit Rama në Facebook