POP 5

Lajmet më të lexuara të 5 minutave të fundit

Kultura

Ligji për Teatrin/ Veliaj-Metës: Vonesa s’e frenon punën, në shtator rivotohet, mirënjohës për aktorët

Kryetari i bashkisë Erion Veliaj ka komentuar sërish sot kthimin e ligjit nga Presidenti Ilir Meta për Teatrin Kombëtar.

TIRANE-Kryetari i bashkisë Erion Veliaj ka komentuar sërish sot kthimin e ligjit nga Presidenti Ilir Meta për Teatrin Kombëtar. Veliaj u shpreh se ligji do të rivotohet sërish në shtator, ndërsa renditi shumë prej investimeve në kryeqytet të cilat në fillim hasën në rezistencë, por që, më pas, dhanë rezultate.  “Do të presim me durim këto 40 ditë, teksa Parlamenti të mblidhet sërish për të kaluar Teatrin e ri. Por, gjithmonë pyetja që i bëj vetes është: këta që kundërshtojnë çdo gjë, a nuk ishin po këtu që thoshin mos ma prek liqenin, mos ma prek parkun? A është sot parku më i frekuentuar? Mjafton të shikojmë si është sistemuar këndi i lodrave, pista e biçikletave, pista e këmbësorëve, pista e vrapit dhe Amfiteatri i ri. Mjafton të shohim edhe si u mbollën 126 mijë pemë. Këto pemë u mbollën nga ata që thonë mos prek, apo nga ata që thonë se diçka ndryshon vetëm po u prek me dorë?!”, deklaroi ai.

Kryebashkiaku i shprehu mirënjohjen gjithë komunitetit të artistëve, të cilët mbështetën projektin për t’i dhënë shoqërisë dhe qytetit një godinë të re, të denjë për të funksionuar si Teatër Kombëtar. “U jam shumë mirënjohës të gjithë aktorëve që mbështetën teatrin e ri, gjithë shoqërisë që mbështet zhvillimin e Tiranës. Për të gjithë ata njerëz që mund të kenë ende dyshime, duhet t’i bëjnë një pyetje vetes kur shikojnë kundërshtarët e projekteve të bashkisë dhe të qeverisë në televizor: Këta që kundërshtojnë çdo gjë, çfarë kanë bërë për mua? Kanë ndërtuar ndonjë çerdhe? Kanë ndërtuar ndonjë shkollë? Kanë mbjellë këta ndonjë pemë? Kanë hequr plehrat nga rruga? A kanë bërë këta diçka konkrete që ma ka ndryshuar mua jetën? Po ashtu, le t’i bëjnë të njëjtën pyetje vetes për ne që jemi duke punuar: Këta, a ishin po ata që bënë sheshin “Skënderbej”? Që bënë Pazarin e Ri? Që bëjnë çerdhet, kopshtet, shkollat? Që bëjnë këndet e lodrave?”, tha Veliaj.

Sipas tij, Tirana do të vazhdojë të ndryshojë dhe pavarësisht ndonjë vonese të vogël prej pak ditësh, askush nuk do të frenojë punët publike. “Gjasat janë që ata që po ndërtojnë dhe transformojnë Tiranën, do të vazhdojnë ta bëjnë diçka të tillë apo jo? Përgjigja është po; ne do të vazhdojmë ta ndryshojmë Tiranën dhe një handikap i vogël prej pak ditësh nuk do të na frenojë që të vazhdojmë me një kënd lodrash këtu. Edhe këtu mund të kemi protesta sepse ritmi i punëve të bashkisë është që në çdo ditë po hapet një kantier i ri. Do ta vazhdojmë këtë gjatë gjithë verës. Por, pyetja është: A do t’i prekim gjërat me dorë? Do vëmë dorë në këtë vend që Shqipëria të lulëzojë?”, vijoi Veliaj, duke shprehur bindjen se shumica dërrmuese, jo vetëm e aktorëve, por edhe e qytetarëve, e duan ndryshimin. Ai komentoi edhe letrën e Voltana Ademit dhe Mziut për Metën kundër ligjit të Teatrit.

“Unë besoj se shumica dërrmuese, jo vetëm e aktorëve dhe e tiranasve, por shumica dërrmuese e qytetarëve nga Kamza, nga Shkodra, që panë atë karikaturë të djeshme, duan që në fakt Kamza të bëhet si Tirana dhe jo Tirana si Kamza; duan që Shkodra të bëhet si Tirana dhe jo anasjelltas. Ndaj, besoj se Tirana nuk ka nevojë të marrë leksione nga ata që janë të mbytur në ujë dhe nga ata që janë të mbytur në plehra. Tirana ka nevojë që të vazhdojë të bëjë ato punë të mira që ka bërë. Të vazhdojë me progresin, me energji pozitive dhe optimizëm”, tha Veliaj.

Ndërkohë që kryebashkiaku theksoi se Parkut të Madh të Liqenit do t’i shtohet një kënd i ri rekreativ, për të gjitha moshat. “Një nga arsyet pse kemi sot këto gërr-vërret e vogla është sepse kemi njerëz që janë rritur keq, nuk janë mësuar të luajnë në skuadër, nuk janë rritur duke menduar pozitivisht, nuk janë rritur që të shikojnë më të mirën, por ku të gjejnë hapësira për t’i përçarë njerëzit, për t’i ndarë ata, për t’i thënë jo progresit, për t’u trembur nga gjërat e reja. Kjo është arsyeja pse kemi këtë debat sot”, deklaroi Veliaj.

Kryetari i Bashkisë së Tiranës garantoi se Tirana do të rikuperojë kohën e humbur dhe premtoi se ai dhe bashkia do të punojnë që kryeqyteti të vazhdojë në drejtimin e duhur.  “Në fund të vitit do kthehemi këtu e do gjejmë një tjetër kënd lojërash të transformuar, e do themi: Sa mirë që nuk humbëm kohë! Ne vërtet po humbasim 40 ditë kohë, por ama do ta rikuperojmë edhe kohën e humbur. Në një qytet që ka humbur vite të tëra, çdo ditë është e çmuar dhe për këtë kemi keqardhje, por ama do ta rikuperojmë me shumë guxim. Dua të falenderoj të gjithë ata që duan që Tirana të ecë përpara dhe t’ju premtoj që përsa më përket mua, dhe gjithë miqve tanë, kolegëve, do të punojmë fort që Tirana të vazhdojë në drejtimin e duhur”, tha Veliaj.

Lidhur me këndin e ri që kanë nisur punimet, Kreu i Bashkisë u shpreh se brenda një viti kjo zonë do të shndërrohet në këndin e dytë më të madh të lodrave në Tiranë, pas atij te liqeni në pjesën e Amfiteatrit. “Sot është pastruar, është mbjellë, është krijuar një minipyll dhe kemi ruajtur këtë oaz në mes për ta kthyer në kënd lodrash, që do të jetë këndi i dytë më i madh i lodrave në Tiranë pas atij te liqeni”, tha ai.

Shumë prej banorëve që jetojnë në zonën e Kopshtit Zoologjik, Kopshtit Botanik apo Liqenit të Thatë do të kenë mundësi që të shfrytëzojnë një kënd fantastik lodrash. Sheshi i ri rekreativ po ndërtohet në një nga hapësirat e papërdorura të Parkut të Liqenit, në zonën jugore të tij me një sipërfaqe totale 5500 metra katror. Sipas bashkisë, ky investim harmonizohet edhe me investimet e tjera të Bashkisë së Tiranës, si pistat e reja dhe  shëtitorja e re perimetrale jug-perëndimore te Parku i Madh.

//Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Ben tironci: 28/07/2018 13:44

    KRRICI I RAMES ESHTE NERVOZUAR PO PERGJIGJEN DO TA MARRE KUR TE BEHEN VOTIMET POPULLI I TIRONES ESHTE LODHUR ME PREMTIMET BOSHE TE ERION VELISE ASGJE NUK PO BEN PER SHUMICEN E TIRONSVE VETEM LLAFE DUKE U HEDHUR NGA NJE KOCKE FUKARENJEVE PER TU LEPIRE ERION VELIA I PERKET KLASES SE BANDES TE HAJDUTEVE DHE DROGAXHINJEVE TE KOKAVE TE PS DHE NUK ESHTE PER POPULL TE VOTOSH SOT PER ERION VELINE ESHTE TI BESH GROPEN VETES

    Përgjigju
  • Sondazhi i ditës:
    26 Dhjetor, 08:05

    Si ka qenë për ju viti 2024?

Lajme të tjera



×

Lajmi i fundit

Gili dhe Redoni tërhiqen nga gara, Egli në lot, ja si reaguan banorët e tjerë

Gili dhe Redoni tërhiqen nga gara, Egli në lot, ja si reaguan banorët e tjerë

26 Dhjetor, 14:58