Kundërshtari i Veliajt për Tiranën takim me banorët: Diskutuam problemet e harruara nga Bashkia

Kandidati i partisë 'Bindja Demokratike, Arben Skënderi ka nisur fushatën elektorale. Lagjja "Ali Demi" ka qenë ndalesa e tij e parë, ku është ndalur të komunikojë me banorët, ku në fokus kanë qenë problematikat me të cilat përballet kjo zonë. 

Ai ka pasqyruar këtë takim me banorët nëpërmjet një postimi në rrjetet sociale, bashkangjitur së cilës ka postuar edhe disa foto. Ai shkruan se është njohur nga banorët për problemet që Bashkia e Tiranës, nën drejtimin e Veliaj, i ka lënë pa zgjidhje.

"Pasditen e sotme e kaluam në lagjen Ali Demi, ku zhvilluam disa takime miqësore me banorët e zonës. Një diskutim lidhur me problematikat e zonës, çështjet ku kursi i bashkisë ka harruar prej kohësh të drejtohet dhe cili duhet të jetë fokusi real për përmirësimin e jetës së banorëve të njësisë nr.1. Duke folur nga afër me banorët u munduam të kuptojmë në pak minuta se cilat janë sfidat e vogla të përditshmërisë, të cilat mund të përmirësohen me administrimin e drejtë dhe të ndershëm të Bashkisë të Tiranës", shkruan Skënderi.

Më herët, kryebashkiaku aktual Erion Veliaj prezantoi përpara banorëve të njësisë nr.2 në kryeqytet premtimet elektorale për 4 vitet e ardhshme. 

B.K./Shqiptarja.com

TAG:
• Arben Skënderi
• Bindja Demokratike
• Fushate elektorale