Pas një seance maratonë prej 12 orësh debati dhe diskutimi, Kuvendi miratoi rreth orës 22.10 projektligjet e përfshira në rendin e ditës.
Kështu, Kuvendi miratoi të enjten me 86 vota pro, 22 kundër dhe asnjë abstenim ndryshimet në ligjin "Për organizimin dhe funksionimin e qeverisjes vendore", që synojnë përshtatjen e tij me ndarjen e re territoriale me 61 bashki.
Projektligji, që u kundërshtua nga opozita, parashikon heqjen e termit 'komunë' dhe 'këshill komune', ndërsa e përcakton si parim detyrues konsultimin midis organeve të qeverisjes vendore dhe institucioneve qëndrore për çdo projekt.
Në seancën e sotme, Kuvendi miratoi me 87 vota pro dhe  20 kundër  edhe ndryshimet e kodit zgjedhor, në kuadër të zgjedhjeve vendore të 21 qershorit. Objekt i ndërhyrjeve në ligjin zgjedhor është përshtatja e tij me ndarjen e re territoriale dhe rritja e pjesëmarrjes së grave në proceset zgjedhore. Ndërsa me 87 vota pro dhe 19 kundër deputetët votuan për hyrjen menjëherë në fuqi të këtij projektligji.
Gjithashtu, parlamenti miratoi me 86 vota pro dhe 20 kundër  dhe një ndryshim në Kodin Doganor, si dhe ratifikimin e marrëveshjes së grantit, ndërmjet qeverisë shqiptare dhe BERZH-t për strategjinë e taksimit rrugor në Shqipëri.
vijon... /atsh/