Kuvendi miraton 'anti-shpifjen'! Shoqata e gazetarëve tregon hapat e radhës: Do e dërgojmë në Gjykatën e Strasburgut

TIRANE- Protesta e organizuar paraditen e sotme nga disa shoqata gazetarësh përpara selisë së Kuvendit për të ndaluar miratimin e paketës anti-shpifje, nuk ka arritur të pengojë votimin e saj, nga 82 deputetë. Ata kanë reaguar pas këtij vendimi duke dënuar veprimin e deputetëve, ndërsa i bëjnë thirrje presidentit Ilir Meta që të mos e dekretojë këtë projektligj.

Ata shprehen se do të nisin një fushatë të gjerë informimi dhe ndërgjegjësimi të publikut për lirinë e shprehjes dhe lirinë e medias, dhe se do të bëjnë projektligjet të pavlefshme përmes betejave ligjore në gjykatat shqiptare deri në Gjykatën Europiane të të Drejtave të Njeriut (Gjykatën e Strasburgut).

Deklarata e plote

Në përfundim të votimit nga ana e Kuvendit të Shqipërisë të projektligjeve “antishpifje”, rrjeti i organizatave shqiptare përfaqësuese të gazetarëve dhe të të drejtave të njeriut bën këtë deklaratë:

1-Ne dënojmë vendimin e sotëm të Kuvendit të Shqipërisë për të miratuar projektligjet në kundërshtim të hapur me Komisionin Europian dhe Zyrën e Komisioneres së Lartë për të Drejtat e Njeriut të Këshillit të Europës.

2-Ne i bëjmë thirrje Presidentit të Shqipërisë Ilir Meta të mos e dekretojë këtë projektligj.

3-Ne bëjmë të ditur se do të nisim një fushatë të gjerë informimi dhe ndërgjegjësimi të publikut mbi lirinë e shprehjes dhe lirinë e medias, pjesë e së cilës do të jetë angazhimi afatgjatë për të rrëzuar këto projektligje apo për t’i bërë ato të pavlefshme përmes betejave ligjore dhe qytetare në mbrojtje të lirisë së shprehjes, në gjykatat shqiptare apo në Gjykatën Europiane të të Drejtave të Njeriut.

4-Ne i bëjmë thirrje gazetarëve të vijojnë punën për të raportuar drejtë dhe saktë dhe të mos frikësohen nga ekzistenca e këtyre ligjeve regresive.

5-Ne angazhohemi të mbështesim çdo gazetar që mund të përballet me padrejtësitë që mund të prodhojë një ligj i tillë.

Lista e organizatave firmëtare:

Këshilli Shqiptar i Medias

Lidhja e Gazetarëve të Shqipërisë

Qendra Shqiptare MediaLook

Qendra Shqiptare për Gazetari Cilësore

Shoqata e Gazetarëve Profesionistë të Shqipërisë

Unioni i Gazetarëve Shqiptarë

BIRN Albania

Citizens Channel

Faktoje

Instituti Shqiptar i Medias

Civil Rights Defenders

Instituti Shqiptar i Shkencave

Komiteti shqiptar i Helsinkit

Qendra Res Publica

Grupi shqiptar në mbrojtje të të drejtave të njeriut

TAG:
• paketa antishpifje
• shoqata e gazetareve