Ndërkombëtarët i dënuan molotovët te vila 31, Berisha ‘harron’ revoltën për Ballukun! Premtoi shembje të Kuvendit, sot vetëm një grusht militantësh e sprai blu në protestë

Në shkallët e selisë së Partisë Demokratike, Sali Berisha paralajmëroi protestën e radhës kombëtare më 22 mars, ditë që përkon me festën e Nevruzit. Berisha tha se kryengritja paqësore, siç i cilëson ai protestat e tjera të opozitës, do të vijojë deri në fitoren përfundimtare.

“Më 22 mars e gjithë Shqipëria në Tiranë. E gjitha Tirana në rrugë, vazhdojmë kryengritjen tonë paqësore deri në fitoren vendimtare”, tha Berisha.

Sapo u mbyll seanca plenare në Kuvend ku u votua me 82 vota kundër kërkesës së SPAK për arrestimin e Ballukut, Berisha iu bashkua protestës së opozitës para parlamentit. Ai tha se sot Rama shënoi vetëvrasjen e tij politike. Ai iu drejtua protestuesve duke thënë se sot është autorizim i plotë për kryengritjen më të fuqishme, duke thënë se “është pranvera jonë”.

“Burra e gra guximtarë që keni lënë çdo gjë për të përfaqësuar zërin e shqiptarëve në një ditë të zezë të historisë sonë. Keni ardhur në mbrojtje të Kushtetutës, të dinjitetit njerëzor, të interesave të çdo qytetari shqiptar nga një organizatë kriminale që përdor pushtetin e grabitur për të mbrojtur vjedhjet dhe krimet e veta. Sot Edi Rama kreu i organizatës kriminale shënoi vetëvrasjen e tij politike, fundin e tij politik. Firmosi të drejtën e shqiptarëve për ta nxjerrë me të gjitha mjetet nga pushteti i krimit. Sot ai nuk votoi për lubi Ballukun, votoi për veten e tij, për vjedhjet që ka bërë, krimet e shëmtuara që ka kryer. Në historinë kombëtare s’ka pasur njeri me standarde më të ulëta njerëzore se ky njeri. Theksoj prapë, është puna, qëndresa, protesta, kryengritja juaj që bëri që sot ai të dalë para mbarë shqiptarëve si qeveritari më i poshtëruar në historinë kombëtare, si qeveritar i më i poshtëruar në Europë. S’ka qeveritar në Europë që të ketë vjedhur me qindra herë pasurinë e qytetarëve. S’ka qeveritar në Europë që për të mbrojtur krimin të mbyllë dyert. Kjo që ndodhi sot është autorizim i plotë për kryengritjen më të fuqishme të qytetarëve shqiptarë kundër tij. Është kushtrim i plotë të vazhdojmë të pamposhtur kryengritjen tonë paqësore deri në largimin e tij nga pushteti. Kjo që ndodhi sot është apel për ndërgjegjen e çdo shqiptari që e do këtë vend të bashkohet për të larguar qeveritarin më të poshtëruar, Edi Ramën. Le të vazhdojmë ne këtë betejë. Edi Rama mendon se mbylli dosjen e tij duke votuar kundër heqjes së imunitetit, por dosja e tij s’mbyllet kurrë. Në varrin e tij do të shkruhet këtu prehet një kryehajdut. Kjo është pranvera jonë!

Pasi mazhoranca socialiste rrëzoi me 82 vota kundër këkerkesën e SPAK për heqjen e imunitetit të deputetes Belinda Ballukut me qëllim arrestimin e saj, protestuesit e Partisë Demokratike kanë nisur përplasjen me forcat e policisë të cilët kanë rrethuar Kuvendin.

Militantët e Sali Berishës kësaj radhe janë mbledhur në pjesën e jashtme të Parlamentit. Godina është e rrethuar nga forca të shumta policie ndërsa brenda po lexohen raportet e PD dhe PS, pro dhe kundër kërkesës së SPAK për marrjen e autorizimit për arrestimin e Belinda Ballukut.

PD organizon sot protestë duke kërkuar arrestimin e Ballukut, ndërsa kanë paralajmëruar se në rast se rrëzohet kërkesa e SPAK, godina e Kuvendit do të konsiderohet si mburojë për  të korruptuarit dhe do duhet të shembet.

Xhamia e Namazgjasë është pjesë e kordonit të sigurisë për protestën e PD para Kuvendit. Siç shihet nga pamjet, xhamia është rrethuar me barriera metalike, ndërsa pas tyre ndodhen edhe punonjës të policisë.

Herën e fundit, as objekti fetar nuk u kursye nga molotovët e protestuesve të PD, teksa brenda ndodheshin besimtarë që po kryenin ritet e tyre pasi është edhe muaji i Ramazanit.

Berisha ka mbërritur në selinë e PD duke thënë “këta janë shqiptarët e vërtetë”. Ndërsa gazetarët e pyetën a është ky kilometri i fundit dhe se çfarë do të ndodhë sot, ai s’u përgjigj.

Deputetët e PD kanë nisur të grumbullohen në selinë blu, ndërsa pas pak minutash do të nisë protesta e opozitës për të kundërshtuar qëndrimin e PS për mosarrestimin e Belinda Ballukut.

Mes deputetëve shihen Luçiano Boçi, Belind Këlliçi, Flamur Noka, Edi Paloka, Ivi Kaso etj.

Përgatitjet për protestën e opozitës para dhe brenda Kuvendit kanë nisur. Përballë gardhit të policisë po vendoset një podium i vogël dhe një ekran që demonstruesit të ndjekin zhvillimet e seancës plenare.

Deri më tani nuk ka grumbullim të protestuesve, por vetëm kalimtarë që vijojnë rutinën e tyre.

Mbetet për t’u parë skenari që opozita do të ndjekë, por në krye të demokratëve që ndodhen jashtë, do të qëndrojnë Gazment Bardhi e Klevis Balliu, të dy të përjashtuar me 10 ditë nga Kuvendi pas gjuhës së papërshtatshme në seancën e fundit. Ndërkohë i përjashtuar për 20 ditë është edhe Agron Shehaj, pasi refuzoi të linte sallën ndërsa fliste për banorët e Rrjollit.

Pritet një tentativë e demokratëve për të hyrë në Kuvend, ndërsa pritet të shihet nëse opozita do t’u qëndrojë fjalëve për një tubim paqësor dhe me gjuhë simbole apo do të zgjedhë sërish molotovët.

Masat për protestën e PD brenda e jashtë Kuvendit kanë bërë që gardistët të zhvendosen në tarracën e godinës.

Pak orë para se të nisë seanca plenare dhe protesta e opozitës, policia ka marrë masat e nevojshme.

Efektivët janë grumbulluar në hyrje të parlamentit, ndërsa kanë marrë me vete pajisjet si fikëset e zjarrit dhe mburojat. Mësohet se 1500 prej tyre janë në gatishmëri për protestën.

Sipas burimeve, protesta e PD do të zhvillohet brenda dhe jashtë dyerve të parlamentit duke kundërshtuar qëndrimin e mazhorancës për mosarrestimin e Belinda Ballukut.

Mbrëmjen e shkuar, policia e rrethoi Kuvendin me kangjella. Pas gardhit metalik, ka një kordon sigurie me policë të Rendit dhe dhjetëra forca të ndërhyrjes së shpejtë. Brenda ambienteve të Kuvendit, gjenden edhe makineritë me ujë me presion, si edhe zjarrfikëse.

Gjithashtu është bërë e ditur se se nga ora 06:00 deri në përfundim të tubimit, do të kufizohet lëvizja në rrugën “George W. Bush”. Po ashtu sipas Policisë, në varësi të zhvillimit të tubimit, edhe rrugë të tjera mund të bllokohen. Por Policia thekson se qytetarët dhe mjetet mund të qarkullojnë në rrugë alternative.