Laguna e Patokut, Cali e Prenga
në gjyq, kërkohet ribërje e tenderit

Konflikti për të drejtën e shfrytëzimit të Lagunës së Patokut ndërmjet familjes Cali e Prenga është transferuar në Gjykatën Administrative në Tiranë 17 ditë pas përleshjes që pjesëtarët e dy fiseve patën në Laç më 4 shtator.

Nga kjo përplasje me armë e thika, e deri në dhunë fizike dy javë më parë mbetën 7 të plagosur ndërsa policia arrestoi nën akuzën e armbajtës pa leje dhe kanosjes deputetin Armando Prenga.

Nëpërmjet avokates, vëllezërit Cali njëherazi dhe peshkatarë në këtë lagunë, të cilën e kanë përdorur prej 10 vitesh, kërkuan ribërjen e tenderit të Ministrisë së Bujqësisë, e cila në mars të këtij viti ja dha licencën firmës “Teknki 01”.

“Kjo ishte seanca përfundimtare që lidhi me lagunën e Patokut dhe konkurrimi ndërmjet shoqërisë Cali dhe shoqërisë të shpallur fituese. Ne kërkojmë që kjo procedurë të shfuqizohet pasi është një procedurë e nxjerrë në kundërshtim me gjithë legjislacionin për peshkimin”, tha avokatja.

Përfaqësuesit e “Tenkni 01”, ku bëjnë pjesë dhe familjarët e deputetit Armando Prenga nuk ishin të pranishëm në seancë si palë e tretë, ndërsa Ministria e Bujqësisë dhe Avokatura e Shtetit nëpërmjet juristëve kërkuan lënien në fuqi të procedurave që kanë shpallur fituese firmën “Teknki 01”.

Në përfundim të seancës së konkluzioneve, gjykatësi Avni Sejdi njoftoi se vendimi për këtë proces do të jepet më 25 shtator në ora 13:00.




Redaksia Online
(f.s/shqiptarja.com)

TAG:
• avni sejdi