Pas largimeve të fundit nga LSI, Kryemadhi: Socialistët e gjejnë veten te ne! Rama shfaqje teatrale me fushatën e vaksinimit

Kryetarja e LSI-së Monika Kryemadhi është takuar pasditen e sotme me strukturat e kësaj force në Shkodër, nga ku ka thënë se socialistët e gjejnë veten pranë LSI-së dhe se sipas saj qeveria e shkatërroi emrin e PS-së.

Kjo deklaratë e Kryemadhit vjen në një kohë kur shumë figura të rëndësishme të kësaj partie janë larguar nga LSI drejt PS. Ndërkaq Kryemadhi ka treguar edhe emrat e kandidatëve për deputetë në krye të listës së LSI-së në këtë qark. Bëhet fjalë për Edmond Ndoun dhe Agron Çelën.

“Unë sot e kam filluar ditën që në qytetin e Lezhës, ku pimë kafen e mëngjesit me shokët tanë, me Viktor Tushën, me Petrit Gjonin, me Agustin Markun ish kryetarin e PS-së së Lezhës, me ish kryetarin e PS-së së Zejmenit, apo edhe shumë të tjerë, që janë miqtë tanë. Kanë qenë miqtë e mi të vjetër në Partinë Socialiste dhe tani janë miqtë e rinj në LSI, por përsëri ngelen miq të vjetër. Të ripërsëris atë që tha edhe Goni, në fakt tashmë nuk ka dallim LSI dhe socialist, sot jemi të gjithë bashkë.

LEXO EDHE:
Përplasjet me Metën, Kryemadhi: Nisi për atë paçavuren e kallëzimit për përgjimet! E gënjejnë një grup njerëzish që nga rrogëtar në presidencë, bëhen me rrogë në PL

Të gjithë socialistët e gjejnë veten pranë LSI-së, sepse Rilindja shkatërroi emrin e Partisë Socialiste duke degraduar në arrogancë, në atë shfaqje të shëmtuar që pamë, kur 3-4 ditë më përpara, tre çereku i Shkodrës, i Laçit dhe i Lezhës ishin kthyer si Venecia, më toka, rrugë dhe shtëpi të përmbytura dhe ndërkohë shikoni ministrat e qeverisë që darkonin në restorante luksoze. Por nuk është vetëm ky problemi”, tha Kryemadhi.

Në këtë takim ajo ka përsëritur akuzat ndaj qeverisë, e cila sipas saj shkatërroi ekonominë shqiptare dhe e ktheu atë në duart e 2-3 oligarkëve.

“Dëgjojmë sesi ai do të fokusohet për punësimin e të rinjve dhe të rejave, ky njeri që jo vetëm nuk punësoi, por mbylli me qindra mijëra biznese në Shqipëri, shkatërroi ekonominë shqiptare dhe e ktheu atë në duart e 2-3 oligarkëve, të cilët nuk janë as oligarkë me punë, janë oligarkë të emëruar”, tha ajo.

Kryemadhi ka komentuar dhe procesin e vaksinimit dhe të rindërtimit, të cilat sipas saj po përdoren nga Rama për të bërë shfaqje.

“Shikojmë shfaqjet teatrale ndonjëherë janë tragjikomike, kur shikojmë që aty ku janë mbi 300 shtëpi të prishura, inaugurohet një apo 2 shtëpi që edhe ato nuk kanë qenë të prishura por është e ndonjë kryetari të rilindjes  i cili merr përsipër për të aktruar në ndonjë shfaqje të madhe. Ashtu sikurse shikojmë fasadën tjetër që fillon fushata e madhe e vaksinimit dhe bravo që filloi por problemi qëndron që vaksina më e madhe për shqiptarët është vota më 25 prill kundër varfërisë, papunësisë,  arrogancës, talljes që qeveritarët bëjnë me shqiptarët”, shtoi kryetarja e LSI.

/r.k./Shqiptarja.com

TAG:
• LSI
• PS
• monika kryemadhi
• zgjedhjet parlamentare 2021