Lufta në Gaza/ Ministri Katz: Nëse arrihet një marrëveshje me Hamasin ne do të pezullojmë operacionin Rafah! Media: Izraeli pret përgjigje brenda 48 orëve

Israel Katz

Ministri i Jashtëm izraelit, Israel Katz tha se Izraeli do të shtyjë operacionin ushtarak në qytetin jugor të Gazës, Rafah, nëse arrihet një marrëveshje që garanton lirimin e pengjeve izraelitë të mbajtur nga Hamasi.

"Nëse ka një marrëveshje, do të pezullojmë operacionet në Rafah",- është shprehur ai. 

Izraeli pret një përgjigje nga Hamasi në 48 orët e ardhshme, në lidhje me propozimin që i ka bërë për të arritur për një marrëveshje armëpushimi dhe lirimin e pengjeve.

Sipas mediave izraelite, kushtet e propozimit i janë transmetuar Hamasit në Gaza përmes delegacionit egjiptian, të udhëhequr nga shefi i inteligjencës Abbas Kamel, i cili dje zhvilloi pesë orë bisedime me negociatorët izraelitë.

Izraeli pret që Hamasi të lirojë 33 pengje të gjallë që plotësojnë të ashtuquajturat kritere 'humanitare' - gra, fëmijë, burra mbi 50 vjeç dhe të sëmurë - por Hamasi pretendon se ka vetëm 20 pengje që plotësojnë këto kritere.

Propozimi parashikon gjithashtu një fazë të mëvonshme të negociatave, në të cilën do të diskutohet fundi i luftës dhe lirimi i të gjithë pengjeve të tjerë.

Ushtarë britanik

Trupat britanike mund të dërgohen në Gaza për të ndihmuar në dërgimin e ndihmave nëpërmjet një rruge të re detare, raporton BBC.

Ndërsa SHBA ka thënë më parë se forcat e saj nuk do të zbarkojnë në enklavën palestineze, Britania e Madhe besohet se po shqyrton dërgimin e trupave britanike kur korridori i ndihmës humanitare të hapet muajin e ardhshëm, por për momentin nuk ka një vendim të prerë.