Lufta/ Horrori në Bucha, të paktën 410 trupa rrugëve, gjendet një dhomë torture! Kuleba: Mariupoli është më keq! SHBA-BE: Hetim për krimet e luftës!l Rusia: Inskenim, do sjellim prova!

Shtëpia e Bardhë: Bucha është dëshmia e radhës e krimeve të luftës, Mizori tragjike dhe tronditëse 

Mizoritë e ndodhura në Bucha janë cilësuar si dëshmia e radhës e krimeve të luftës nga Rusia, sipas një reagimi të këshilltarit për Sigurinë Kombëtare Jake Sullivan.
Një mizori që Sullivian e përcaktoi si ‘tragjike dhe tronditëse’, por ‘jo befasuese’  në kuadër të asaj që SHBA-të kishin parashikuar edhe pse nuk i pëlqente një gjë e tillë. 

Kryebashkiaku i Mykolaivit ka thënë se 10 civilë janë vrarë dhe 46 janë plagosur gjatë bombardimit të qytetit në jug të Ukrainës.

Ushtria ukrainase ka publikuar përmes kanaleve të saj zyrtare videon e dhomës në Bucha, në të cilën pushtuesit rusë dyshohet se torturonin civilët ukrainas. Videoja tregon trupat e civilëve të pajetë brenda një bodrumi të qytetit 30 km larg Kievit. Nga ana tjetër, Federata Ruse vazhdon t'i mohojë akuzat dhe t'i cilësojë ato si "fake news" dhe "një tjetër provokim nga Kievi".

Qeveria ukrainase tha se 18 gazetarë janë vrarë në vend që nga fillimi i pushtimit rus. Ministria e Kulturës raportoi në mediat sociale se do të kryhen hetime për secilën nga vdekjet dhe krimet e tjera kundër gazetarëve.

Ministria shtoi se 13 gazetarë të tjerë janë plagosur, tetë janë rrëmbyer ose kapur robër dhe tre janë ende të zhdukur. Përveç kësaj, ai vuri në dukje se krime janë kryer kundër gazetarëve nga 11 vende, përfshirë Ukrainën.

Ministri i Jashtëm rus Sergei Lavrov ka ripërsëritur ditën e sotme deklaratën se imazhet e civilëve të vrarë në qytetin e Ukrainës janë një inskenim i bërë nga ukrainasit, pas tërheqjes së trupave ruse më 30 mars. Lavrov i ka quajtur inskenimet një provokim dhe se asnjë qytetar i Buçës nuk i është nënshtruar dhunës nga ushtria ruse.

Lavrov bëri të ditur se zyrtarët rusë do të paraqesin materiale në mbështetje të tezës së Moskës me qëllim që të ‘shpërndajë’ ato që ai i quan ‘gënjeshtra’.

Ministri i Jashtëm ukrainas, Dmytro Kuleba tha se masakra që kemi parë në Bucka është vetëm maja e ajsbergut, ai theksoi se Mariupol situata është edhe më e keqe.

Ministri e tha këtë në një konferencë të përbashkët për shtyp me kolegen e tij britanike Liz Truss, e cila u takua në Varshavë me kreun e diplomacisë polake, Zbigniew Rau.

Situata mbi ngjarjet e rënda të raportuara nga qyteti Bucha, në Ukrainë do të diskutohen nesër në Këshillin e Sigurimit të OKB-së.

Qeveria gjermane ka vendosur të shpallë 40 diplomatë me statusin “Non Grata”. Lajmin e ka bërë të ditur Ministrja e Jashtme gjermane Annalena Baerbock.

“Këta janë njerëz që kanë punuar çdo ditë këtu në Gjermani, kundër lirisë sonë dhe kundër kohezionit të shoqërisë sonë, ne nuk do ta tolerojmë më këtë. Vendimi i marrë për kundrejt diplomatëve iu komunikua Ambasadorit rus Sergei Nethayev pasditen e kësaj të hëne.

“Nëse amerikanët duan të hetojnë krimet e luftës, le të fillojnë me bombardimin e Jugosllavisë dhe pushtimin e Irakut".

Kështu ka deklaruar Zëdhënësja e Ministrisë së Jashtme ruse, Maria Zakharova, duke reaguar në këtë mënyrë mbi propozimin e Presidentit amerikan Joe Biden për krijimin e një gjykate për krimet e luftës të rusëve në Ukrainë.

Forcat ruse janë duke u përgatitur për të pushtuar Kharkivin. Lajmin e ka bërë të ditur Zëdhënësi i Ministrisë së Mbrojtjes të Ukrainës, Oleksandr Motuzyanyk.

“Përpjekjet kryesore të armikut janë fokusuar në përgatitjen për rifillimin e operacioneve sulmuese për të rrethuar forcat ukrainase dhe për të marrë në kontroll qytetin e Kharkivir, armiku po forcon trupat e rretheve ushtarake perëndimore dhe jugore, në rrethet operacionale të Slobozhansky dhe Donetsk. Këtë po e bën duke transferuar trupa nga rrethe të tjera ushtarake, duke përfshirë edhe njësitë rezervë”, tha Motuzyanyk.

Rajoni i Zhytomyr është çliruar nga pushtuesit rus. Lajmin e ka bërë të ditur Guvernatori i rajonit, Vitaliy Bunechko.

Megjithëse qyteti është çliruar ai i kërkon qytetarëve që të jenë shumë të kujdesshëm pasi rusët, duke u tërhequr, mund të kenë minuar ndërtesa dhe pyje.

Seanca e sotme plenare e Parlamentit Evropian filloi me një minutë heshtje të kërkuar nga Presidentja Roberta Metsola në kujtim të të gjitha viktimave në Ukrainë.

“ Për të kujtuar viktimat e Bucha-s, Irpin-it dhe të gjitha viktimat e luftës nga terrori dhe dhuna”, tha Metsola.

Që nga fillimi i pushtimit rus në Ukrainë janë regjistruar më shumë se 7000 krime lufte. Lajmi është bërë i ditur nga Prokurorja e Përgjithshme e Ukrainës Irina Venediktova. Ndërkohë grupet hetimore ende po vazhdojnë punën për zbardhjen e krimeve të tjera.

Ministri gjerman i Financave Christian Lindner tha se për momentin është i pamundur ndalimi i furnizimeve me gaz rus, njëkohësisht ai tha se Gjermania do të vazhdojë të mbështesë sanksionet mëtejshme ndaj Rusisë .

“Ne duam të bëhemi të pavarur nga importet e energjisë nga Rusia sa më shpejt të jetë e mundur dhe Gjermania do të mbështesë sanksione të mëtejshme ndaj Rusisë, por për momentin nuk është e mundur të shkurtohen furnizimet me gaz, ne duhet të bëjmë më shumë presion mbi Putinin, të izolojmë Rusinë dhe të ndërpresim të gjitha marrëdhëniet ekonomike", por për të arritur një embargo "ne duhet kohë, në këtë moment duhet të bëjmë dallimin midis naftës, qymyrit dhe gazit", tha Lindner.

Një thirrje e drejtuar Perëndimit është shkruar me gjakun e ushtarëve të Odessas.

Letra e shkruar nga disa ushtarë i  është dërguar Gjykatës Evropiane të të Drejtave të Njeriut. A

“Dobësia e liderëve të SHBA-së dhe vendeve të BE-së u kushton qindra jetë ushtarakëve dhe civilëve ukrainas çdo ditë. Për këtë arsye ne e shkruam drejtpërdrejt me gjak këtë apel në Gjykatën Evropiane të të Drejtave të Njeriut, sepse sot po ndalojmë një agresion të drejtuar ndaj jush duke paguar me jetën tonë. Ukraina ka nevojë që qielli të bëhet i sigurt”, shkruhej në letër, ndërsa kanë bërë thirrje për zonën e ndalim-fluturimit.

Trupat ruse kanë lëshuar sërish bomba thërrmuese në Mykolaiv kundër ndërtesave të banimit dhe infrastrukturës civile. Lajmin e dha kryebashkiaku Oleksandr Senkevych në Telegram.

Në këto fotografitë e tmerrshme, shihet qarta shkalla e mizorisë së Putin! Njerëz të pambrojtur dhe pa armë janë djegur plotësisht nga forcat ruse. Të tjerëve i kanë lidhur duart e më pas i kanë vrarë dhe i kanë lënë nëpër rrugët e qytetit.

Njerëzit po shpërndajnë sa më shumë foto nga Bucha për të mos lënë në “errësirë” fytyrën e vërtet të Putin.

"BE ka ngritur një ekip hetimor së bashku me Ukrainën për të mbledhur prova mbi krimet e luftës dhe krimet kundër njerëzimit”. Kështu deklaroi presidentja e Komisionit Evropian, Ursula von der Leyen, e cila sot pati një bisedë telefonika me Zelenskyn për masakrën e Buchës.

“BE-ja është e gatshme të shtojë përpjekjet e saj duke dërguar ekipe hetimore në terren në mbështetje të zyrës së prokurorit ukrainas. Imazhet e tmerrshme nuk mund dhe nuk do të mbeten pa përgjigje. Ata që kanë kryer këto krime të tmerrshme nuk do të mbeten pa u ndëshkuar”, tha ajo.

Presidenti ukrainas Volodymyr Zelensky vizitoi qytetin e Bucha, 37 kilometra larg kryeqytetit. Zelensky shkoi në spitalin e qytetit, ndërsa pa rrugën ku u shkatërruan makinat e blinduara ruse dhe foli me popullsinë vendase, duke përdorur fjalë si "krime lufte", "mizori" dhe duke e quajtur atë që ndodhi në qytet si ‘një nga gjenocidet më të mëdha’ që nga Lufta e Dytë Botërore’. Përveç kësaj, ai përsëriti nevojën e vazhdimit të dialogut për të arritur deri në fund të konfliktit: ‘Ukraina duhet të ketë paqe - theksoi ai -. Jemi në Evropën e shekullit të 21-të. Ne do të vazhdojmë përpjekjet tona si në nivel diplomatik dhe ushtarak’.

 Presidenti rus Vladimir Putin ka uruar serbin Aleksandër Vuçiç për fitoren e tij  në zgjedhjet presidenciale serbe. Në një telegram, Putin shprehu shpresën se Vuçiç do të vazhdojë të forcojë "partneritetin strategjik" midis Serbisë dhe Rusisë.

Pas gjithë luftës dhe masakrave që Rusia po kryen në Ukrainë, duket se Putin ka gjetur kohën për të uruar Vuçiç.

Zëvendëskryeministri polak Jaroslaw Kaczynski tha se Polonia do të ishte e gatshme të presë kokat bërthamore të SHBA-së dhe mbështeste forcimin e trupave të atij vendi në krahun lindor të NATO-s për parandalimin e një sulmi rus. Kjo është cilësuar nga Kremlini si rritje e tensioneve.

Ushtria ukrainase gjeti në Bucha një dhomë torture të përdorur nga ushtarët rusë me kufomat e pesë civilëve të përkulur përpara dhe duart e tyre të lidhura pas shpine

Lajmi bëhet i ditur nga agjencia UNIAN. Trupat ruse thuhet se përdorën bodrumin e një sanatoriumi lokal për fëmijë të quajtur "Radiant".

Batalioni që dyshohet se kreu krimet

Aktet çnjerëzore në Bucha në Ukrainë kanë edhe një emër konkret, përvecc atij të Vladimir Putinit, dhe është Omurbekov Asanbekovich.

Mediat e huaja kanë publikuar mëngjesin e sotëm informacione për identitetin e komandantit të të trupave ruse në Bucha, ku urdhëroi një masakër të tmerrshme. Sipas La Republica, njësia ushtarake 51460, brigada e 64-të e motorizuar e artilerisë e përfshirë në vrasjet e civilëve në qytetin ukrainas, komandohej nga nënkoloneli Omurbekov Asanbekovich.

Ky komandant akuzohet për masakrën njerëzore në qytetin e sapoçliruar.  Deri më tani raportohet se të paktën 410 persona civilë janë gjetur të ekzekutuar nëpër rrugët e Buchas në Ukrainë. Kjo konsiderohet masakra më e rëndë deri tani dhe ka shkaktuar zemërimin e mbarë botës, që ka reaguar e shokuar.

Ukraina akuzoi të dielën forcat ruse për kryerjen e një masakre në qytetin e Bucha, ndërsa vendet perëndimore reaguan ndaj imazheve të kufomave atje me thirrje për sanksione të reja kundër Moskës. Ministria ruse e mbrojtjes mohoi akuzat e Ukrainës, duke thënë se pamjet dhe fotografitë që tregojnë trupat në Bucha ishin "një provokim tjetër" nga qeveria ukrainase.

Imazhet nga qyteti, 37 km (23 milje) në veriperëndim të qendrës së qytetit të Kievit, dolën pasi Ukraina tha të shtunën se forcat e saj kishin rimarrë kontrollin e të gjithë rajonit të Kievit dhe kishin çliruar qytetet nga trupat ruse.

Sekretari i Shtetit i SHBA, Antony Blinken i përshkroi imazhet si "një grusht në stomak", ndërsa Sekretari i Përgjithshëm i Kombeve të Bashkuara Antonio Guterres bëri thirrje për një hetim të pavarur.

Ministrja e Jashtme gjermane Annalena Baerbock tha se Rusia duhet të paguajë për "krimet e luftës". Kryeministri britanik Boris Johnson tha se qeveria e tij do të rrisë sanksionet, si dhe mbështetjen ushtarake dhe humanitare për Ukrainën.

Varri ku ishin hedhur trupat

Një kryebashkiake e Motyzhyn në Ukrainë u rrëmbye më 23 mars, u ekzekutua dhe më pas u hodh në një gropë në një pyll së bashku me burrin dhe djalin e saj. Kryebashkiakia Olga Sukhenko, bashkëshorti i saj Igor dhe djali Aleksandër u rrëmbyen dhe fati i tyre ishte i panjohur derisa trupat e tyre u gjetën të shtunën të mbuluar me dhe pas shtëpive që ushtarët rusë i kishin përdorur si kazerma të improvizuara. Një trup i katërt u gjet gjithashtu, por ende nuk është identifikuar. Raportet thanë se të gjithë ishin qëlluar.

Sipas “The Sun”, trupat ruse që pushtuan Motyzhyn, 30 milje në perëndim të Kievit, fillimisht u përpoqën të fitonin mbështetjen e zyrtarëve lokalë, por pas refuzimit i ekzekutuan.

‘Është e vështirë të thuhet se si, pas gjithë asaj që është bërë, do të kemi negociata me Rusinë. Kjo është në një nivel personal. Por si president, duhet ta bëj. Çdo luftë duhet të përfundojë’. Këto janë fjalët e presidentit ukrainas Volodymyr Zelensky për CBS. Zelensky tha se ai është i përkushtuar për vazhdimin e bisedimeve të paqes me Rusinë pavarësisht masakrave të kryera.

Patriarku rus Kirill po mbron luftën. Në një festë dje me forcat e armatosura, ai tha: ‘Ne jemi një vend që e duam paqen’ dhe ‘nuk kemi dëshirë për luftë’. ‘Por ne e duam atdheun tonë dhe do të jemi të gatshëm ta mbrojmë atë në mënyrën që vetëm rusët mund ta mbrojnë vendin e tyre’. Për Patriarkun e Moskës ‘shumica e vendeve të botës janë tani nën ndikimin kolosal të një force, e cila sot, për fat të keq, është kundër forcës së popullit tonë’. ‘Atëherë edhe ne duhet të jemi shumë të fortë. Kur them ‘ne’, para së gjithash kam parasysh forcat e armatosura, por jo vetëm. I gjithë populli ynë sot duhet të zgjohet’.

Burimet e mediave ukrainase kanë publikuar mëngjesin e sotëm informacione për identitetin e komandantit të supozuar të trupave ruse në Bucha, përgjegjës për masakrën në qytetin e sapoçliruar. 

Sipas aktivistëve të InformNapalm, njësia ushtarake 51460, brigada e 64-të e motorizuar e artilerisë e përfshirë në krimet e luftës në Bucha, komandohej nga nënkoloneli Omurbekov Asanbekovich, detajet e kontaktit privat të të cilit raportohen gjithashtu.

Varri masiv i zbuluar në Bucha në Ukrainë pas largimit nga aty të trupave ruse është parë nga hapësira.

Maxar Technoogies, një kompani që mbledh dhe publikon imazhet satelitore të Ukrainës, ka raportuar se më 10 mars u panë shenjat e para të gërmimit për një varr masiv në Kishën e Shën Andreas të Parë,  në qytetin e Bucha.

“Mbulimi më i fundit më 31 mars tregon vendin e varrit me një llogore afërsisht 45 këmbë të gjatë në pjesën jugperëndimore të zonës afër kishës,” vuri në dukje Maxar Technologies.

Presidenti francez Emmanuel Macron tha se ai ishte "pro" sanksioneve të reja të BE-së kundër Rusisë, sanksioneve ndaj naftës dhe qymyrit. ‘Ka indikacione shumë të qarta të krimeve të luftës’, në qytetin e Bucha, dhe është "pothuajse e sigurt që ushtria ruse ishte e pranishme". “Në ditët në vijim duhet të ketë një marrëveshje evropiane, këtë dua unë”, shtoi ai, duke shpjeguar se këtë diskutim do ta fillojë me Gjermaninë.

Videot e civilëve të vdekur të marra në qytetin ukrainas të Bucha janë "urdhëruar" nga Shtetet e Bashkuara si pjesë e një komploti për të fajësuar Rusinë, tha dje zëdhënësja e Ministrisë së Jashtme ruse, Maria Zakharova.

"Kush janë mjeshtrit e provokimit? Sigurisht që Shtetet e Bashkuara dhe NATO," tha Zakharova

Presidenti francez Emmanuel Macron bëri thirrje për sanksione të reja kundër Rusisë pas masakrës së Buçës dhe foli për nevojën e koordinimit me aleatët evropianë. 

"Ka indikacione shumë të qarta të krimeve të luftës në Ukrainë," tha ai pas një mesazhi në Twitter në orët e fundit. 

"Ushtria ruse duket përgjegjëse dhe ata që janë përgjegjës do të duhet të paguajnë," shtoi ai.

Korridoret humanitare janë planifikuar gjithashtu sot nga Mariupol në Zaporizhia me makinë, domethënë privatisht, si dhe nga disa qytete të rajonit të Luhansk. Këtë e ka bërë të ditur shefja e Ministrisë së Riintegrimit Iryna Vereshchuk.

Ndërkohë 15 autobusë për evakuimin e njerëzve tanë tashmë janë nisur nga Zaporizhia për në Mariupol. Delegacioni i Kryqit të Kuq planifikon të vazhdojë për në Mariupol nga Mangushi me 7 autobusë.  Në 24 orët e fundit, Ukraina ka arritur të evakuojë pothuajse 3 mijë njerëz nga Mariupol dhe rajoni i Luhansk, disa nga zonat më të prekura nga bombardimet ruse.

Mariupol, ku besohet se janë bllokuar rreth 150,000 njerëz, ka qenë nën rrethim për ditë të tëra dhe përpjekje nga Kryqi i Kuq për të sjellë në një autokolonë ndihmash humanitare dështoi. 

Moska vazhdon të mohojë çdo përgjegjësi përballë masakrës së Buchës dhe sot shpreson që të mbajë një mbledhje urgjente të Këshillit të Sigurimit të Kombeve të Bashkuara, ndërsa e quan si ‘provokim ekstremist ukrainas’.

Dmitry Polyansky, zëvendës Përfaqësuesi i Rusisë në Këshillin e Sigurimit, shkroi në Twitter: ‘Ky është një provokim i urryer i ekstremistëve ukrainas në Bucha, Rusia ka kërkuar një takim të Këshillit të Sigurimit të OKB-së të hënën më 4 prill’.

Zëdhënësja e Ministrisë së Jashtme ruse Maria Zakharova tha: “Kush janë organizatorët e këtij provokimi? Shtetet e Bashkuara dhe NATO, natyrisht, "tha Zakharova në një intervistë në televizionin shtetëror rus. “Vetë fakti që qëndrimet kundër Rusisë u shfaqën menjëherë pas publikimit të imazheve të Buçës, më duket se është provë se ata ishin ata që kurdisën këtë histori”.

‘Na ndihmoni, por jo me heshtje’. Ky është apeli i presidentit ukrainas Volodymyr Zelensky drejtuar publikut të ndarjes së çmimeve Grammy, përmes një mesazhi të transmetuar gjatë ceremonisë. 

Presidenti ukrainas, i veshur me një bluzë të gjelbër ushtarake dhe duke folur në anglisht, kërkoi që "heshtja e vdekjes" e të gjithë njerëzve të vrarë nga Rusia "të mbushet me muzikë". 

Menjëherë më pas, me John Legend, dy artistë ukrainas dhe një poeteshë, Lyuba Yakimchuk, performuan në një nga momentet më emocionuese të mbrëmjes së Oscars Amerikane për muzikë.