Trump telefonatë me von der Leyen: BE të respektojë marrëveshjen tregtare deri më 4 korrik ose tarifat do të rriten! CNN: Irani do t’i përgjigjet sot propozimit të SHBA-së

“Pata një telefonatë të shkëlqyer me Presidenten e Komisionit Evropian, Ursula von der Leyen. Diskutuam shumë tema, përfshirë faktin se jemi plotësisht të bashkuar që Irani nuk mund të ketë kurrë një armë bërthamore. Ramë dakord që një regjim që vret popullin e vet nuk mund të kontrollojë një bombë që mund të vrasë miliona.” shkroi Presidenti i SHBA-së Donald Trump këtë në Truth .

Trump i tha Bashkimit Evropian në një telefonatë me Ursula von der Leyen se “Kanë kohë deri më 4 korrik për të respektuar marrëveshjen tregtare të vitit të kaluar, përndryshe mallrat e tyre do t’i nënshtrohen tarifave më të larta”.

“Diskutuam për shumë tema, përfshirë unitetin tonë të plotë në bindjen se Irani nuk mund të pajiset kurrë me armë bërthamore. Ramë dakord që një regjim që vret popullin e vet nuk mund të kontrollojë një bombë të aftë të vrasë miliona njerëz. Kam pritur me durim që BE-ja të përmbushë detyrimet e saj që rrjedhin nga marrëveshja historike tregtare e nënshkruar në Turnberry, në Skoci, marrëveshja më e madhe tregtare e të gjitha kohërave! U bë premtimi që BE-ja do të respektonte pjesën e saj të marrëveshjes dhe, siç ishte parashikuar, do të eliminonte tarifat doganore! Pranova t’i jap kohë deri në 250-vjetorin e vendit tonë, përndryshe, fatkeqësisht, tarifat do të rriteshin në mënyrë marramendëse”, tha Trump.

Foto: Ebrahim Rezaei

Irani nuk do ta rihapë Ngushticën e Hormuzit dhe asnjë anije cisternë nafte nuk do të lejohet të kalojë pa autorizimin e tyre.

Kështu deklaroi Ebrahim Rezaei, zëdhënës i Komitetit Parlamentar Iranian për Sigurinë Kombëtare dhe Politikën e Jashtme.

 "Ata nuk do të jenë në gjendje të kalojnë as edhe një litër naftë përmes Ngushticës së Hormuzit pa lejen e Republikës Islamike", tha Rezaei, duke shtuar se "nëse amerikanët shohin edhe lëshimin më të vogël ose tërheqjen prej nesh, ata me siguri do të bëhen edhe më të guximshëm".

Sekretari i Shtetit i SHBA-së, Marco Rubio, ka miratuar shitjen e qindra sistemeve mbrojtëse, interceptorëve dhe armëve vendeve të Lindjes së Mesme. Sipas Bloomberg News , marrëveshja vlerësohet në 25.8 miliardë dollarë.

Ministri i Jashtëm i Italisë, Antonio Tajani, është shprehur se raketa që goditi kontigjentin Italian të UNIFIL në Liban u lëshua nga Hezbollahu.

Komentet Tajani i bëri në Wiesbaden, teksa foli për sulmin, i cili për fat të mire nuk solli pasoja në njerëz.

"Raketa që ra, për fat të mirë pa dëmtuar askënd, në kompleksin e misionit italian UNIFIL, ishte një raketë që ishte në duart e Hezbollahut", tha Ministri i Jashtëm Antonio Tajani.

"Unë besoj se është e drejtë të ndërpriten si financimi ashtu edhe armët që i shkojnë Hezbollahut", shtoi Tajani, duke shtuar se grupi libanez "nuk mund të vazhdojë të luajë rolin që po luan aktualisht".

Shtetet e Bashkuara të Amerikës po shqyrtojnë rifillimin e Operacionit ‘Projekti Liria’ për të drejtuar anijet tregtare jashtë Ngushticës së Hormuzit, ndoshta që këtë javë, raporton Wall Street Journal.

Operacioni u pezullua pak pasi nisi, pa dhënë arsye bindëse për këtë veprim. Ndërkohë negociatat mes palëve janë duke vijuar me ndërmjetësimin e Pakistanit, për gjetjen e një zgjidhjeje që do t’i jepte fund konfliktit mes Iranit dhe SHBA-së.

Me gjurmuesit e vendndodhjes të fikur për të shmangur sulmet iraniane, Emiratet e Bashkuara Arabe dhe blerësit në kohët e fundit kanë kaluar disa cisterna të ngarkuara me naftë të papërpunuar përmes Ngushticës së Hormuzit.

Kjo është një përpjekje për të lëvizur naftën e mbetur në Gjirin Persik nga konflikti i Lindjes së Mesme, sipas burimeve të industrisë dhe të dhënave të transportit detar, shkruan Reuters.

Vëllimet janë një pjesë e vogël e eksporteve tipike të Emirateve të Bashkuara Arabe para luftës SHBA-Izrael kundër Iranit, por ato tregojnë rreziqet që prodhuesi dhe blerësit janë të gatshëm të marrin përsipër për të çliruar shitjet e naftës.

Prodhuesit e tjerë të Gjirit, Iraku, Kuvajti dhe Katari ose i kanë ndaluar shitjet, ose kanë ulur ndjeshëm çmimet për të tërhequr blerësit e painteresuar, ose po transportojnë vetëm përmes Detit të Kuq në rastin e Arabisë Saudite.

Kryeministrja Giorgia Meloni është shprehur se Italia është e përkushtuar për të ndihmuar për uljen e tensioneve në Lindjen e Mesme.

Komentet Meloni i bëri pas takimit në Romë me kryeministrin e Polonisë, Donald Tusk, në një deklaratë të përbashkët për shtyp.

"Gjithashtu patëm një shkëmbim të gjerë pikëpamjesh mbi çështjet kryesore aktuale ndërkombëtare, duke filluar me zhvillimet e fundit në Lindjen e Mesme dhe pasojat e tyre për Evropën. Italia dhe Polonia janë të dyja të përkushtuara për të nxitur uljen e tensioneve në rajon, për të kufizuar ndikimin ekonomik të krizës në familjet dhe bizneset tona", tha mes të tjerash Meloni.

"Ne jemi gjithashtu veçanërisht të vëmendshëm ndaj nevojave të partnerëve tanë në Gjirin Persik", shtoi kryeministrja. Meloni tha se dëshironte të "shfrytëzonte këtë mundësi për të treguar afërsinë dhe solidaritetin e Italisë me Emiratet e Bashkuara Arabe pas sulmeve të pajustifikueshme që kanë pësuar nga Irani, përfshirë edhe orët e fundit".

Një analizë e CIA-s, arrin në përfundimin se Irani mund t'i rezistojë bllokadës detare amerikane për të paktën tre deri në katër muaj përpara se të përballet me vështirësi më të rënda ekonomike, thanë për Washington Post katër persona të njohur me dokumentin.

Analiza, e përgatitur nga komuniteti i inteligjencës amerikane, zbuloi gjithashtu se Teherani ruan aftësi të konsiderueshme raketash balistike, pavarësisht javëve të bombardimeve intensive nga Shtetet e Bashkuara dhe Izraeli.

Sipas një zyrtari amerikan, Teherani ruan afërsisht 75 përqind të rezervave të tij të paraluftës të lançuesve celularë dhe afërsisht 70 përqind të rezervave të tij të raketave para luftës.

Zyrtari shtoi se ka prova se regjimi ka arritur të rikuperojë dhe rihapë pothuajse të gjitha objektet e tij të magazinimit nëntokësor, të riparojë disa raketa të dëmtuara dhe madje të montojë raketa të reja që ishin pothuajse të përfunduara në fillim të konfliktit.

Zëdhënësi i Ministrisë së Jashtme të Pakistanit, Tahir Andrabi, ka deklaruar se së shpejti pritet një marrëveshje mes Iranit dhe SHBA-së për t’i dhënë fund luftës.

"Ne presim një marrëveshje sa më shpejt të jetë e mundur", tha sot zëdhënësi i Ministrisë së Jashtme të Pakistanit, Tahir Andrabi, duke folur për negociatat.

"Shpresojmë që palët të arrijnë një zgjidhje paqësore dhe të qëndrueshme që do të kontribuojë jo vetëm në paqen në rajonin tonë, por edhe në paqen ndërkombëtare", shtoi ai.

Zëdhënësi, megjithatë, nuk pranoi të jepte detaje specifike mbi një afat kohor, duke theksuar se Pakistani nuk do të zbulonte detaje mbi përpjekjet diplomatike në vazhdim.

"Ajo që mund t'ju them, dhe kjo është ajo që kam thënë më parë, është se ne mbetemi pozitivë, mbetemi optimistë dhe shpresojmë që një marrëveshje të arrihet sa më shpejt të jetë e mundur", shtoi ai.

Libani dhe Izraeli do të zhvillojnë bisedime të mëtejshme në Uashington më 14 dhe 15 maj.

Lajmin e raportoi France Press, duke cituar një zyrtar amerikan.

"Do të ketë bisedime midis Libanit dhe Izraelit të enjten dhe të premten e javës së ardhshme në Uashington", tha një zyrtar i Departamentit të Shtetit në kushte anonimiteti.

Kryeministri i Izraelit, Benjamin Netanyahu, ka thënë se nuk ka "imunitet" për armiqtë e Izraelit, pasi një komandant i Hezbollahut u raportua se u vra në kryeqytetin e Libanit, Bejrut.

Sipas mediave të huaja, Forcat Mbrojtëse të Izraelit thanë se vranë Ahmed Ali Balout, komandantin e Njësisë së Forcës Radwan të grupit militant të mbështetur nga Irani, në një sulm në periferitë jugore të Bejrutit dje.

Sulmi ishte i pari i Izraelit në kryeqytetin libanez që nga armëpushimi i shpallur muajin e kaluar.

Benjamin Netanyahu tha se komandanti i Hezbollahut "mendonte se mund të vazhdonte të drejtonte sulme kundër forcave tona dhe komuniteteve tona nga selia e tij sekrete terroriste në Bejrut".

Ai shtoi: “U them armiqve tanë në mënyrën më të qartë të mundshme: Asnjë terrorist nuk ka imunitet.”

Hezbollahu, i cili kontrollon periferitë jugore të Bejrutit, ende nuk ka lëshuar ndonjë deklaratë mbi sulmin apo statusin e komandantit.

Në orët e fundit, Hezbollahu ka lëshuar disa raketa dhe dronë të mbushur me eksploziv drejt trupave izraelite të stacionuara në Libanin jugor.

Lajmin e bëri me dije ushtria izraelite duke shtuar se raketat dhe disa dronë u rrëzuan, ndërsa disa dronë shpërthyen në afërsi të forcave izraelite.

Sipas IDF-së, asnjë nga sulmet nuk shkaktoi lëndime.

Presidenti i Iranit tha se ka zhvilluar një takim dy orë e gjysmë me Mojtaba Khamenein, sipas mediave lokale, duke shënuar takimin e parë të raportuar mes një zyrtari të lartë iranian dhe udhëheqësit të ri suprem të vendit.

Masoud Pezeshkian iu referua nevojës për të “forcuar unitetin, besimin dhe solidaritetin brenda strukturës udhëheqëse të vendit.”

Khamenei nuk është parë publikisht që nga emërimi i tij në mars, pas sulmeve amerikano-izraelite që vranë babanë dhe paraardhësin e tij, Ajatollahun e ndjerë Ali Khamenei, gjë që ka nxitur spekulime mbi shëndetin dhe vendndodhjen e tij.

Të gjitha deklaratat publike që i atribuohen udhëheqësit të ri suprem janë lexuar nga prezantues në televizionin shtetëror, dhe kjo është hera e parë që raportohet se një zyrtar i lartë qeveritar është takuar me të personalisht.

Koha e këtij takimi është gjithashtu domethënëse, pasi vjen mes optimizmit në rritje mes zyrtarëve se Uashingtoni dhe Teherani janë pranë arritjes së një mirëkuptimi.

Pezeshkian tha se Khamenei kishte marrë pjesë në takim “me një frymë të bazuar në thjeshtësi, përulësi, sinqeritet dhe respekt të ndërsjellë, çka e bëri atmosferën plotësisht të drejtpërdrejtë, të hapur dhe të shoqëruar me një ndjenjë afërsie dhe besimi”.

“Kur zyrtari më i lartë i vendit ndërvepron me njerëzit dhe zyrtarët me një etikë të tillë, përulësi dhe frymë të orientuar nga populli, kjo sjellje mund të bëhet natyrshëm një model edhe për sistemin administrativ dhe drejtues të vendit”, citohet të ketë thënë presidenti iranian.

Pavarësisht optimizmit të kujdesshëm për mundësinë e një marrëveshjeje, Pakistani ka sqaruar se për momentin nuk është planifikuar një bisedim i drejtpërdrejtë mes Shteteve të Bashkuara dhe Iranit.

“Nuk ka marrëveshje për takime të mundshme të drejtpërdrejta mes iranianëve dhe amerikanëve”, tha një burim pakistanez për Al Arabiya.

Presidenti i Shteteve të Bashkuara, Donald Trump, ka konfirmuar se i ka kërkuar Teheranit një përgjigje të shpejtë ndaj propozimit të tij me 14 pika. Kundëroferta mund të vijë madje edhe sot. Por për momentin diskutimet mbi Ngushticën e Hormuzit janë ende në vazhdim.