Lufta/ Gaza, Ministria e Shëndetësisë: Mbi 24 mijë të vrarë që nga fillimi i luftës! SHBA rrëzon një raketë të rebelëve Houthi drejtuar luftanijes amerikane në Detin e Kuq!

Ushtria amerikane rrëzoi një raketë të lëshuar nga rebelët Houthi në Detin e Kuq që ishte drejtuar në një prej anijeve të saj luftarake. Mbështetësi i shquar i Houthi-t, Hussain Al-Bukhaiti tha për BBC se luftëtarët do të synonin luftanijet e SHBA-së dhe Britanisë së Madhe nëse sulmet në Jemen vazhdojnë.

Ndërkaq sekretari i mbrojtes britanike Grant Shaps deklaroi se rebelëve Houthi iu dhanë të gjitha paralajmërimet e mundshme që të ndalonin sulmet mbi anijet tregtare në Detin e Kuq, para se SHBA dhe Britania të godisnin objektivat e tyre në Jemen. Zyrtari britanik nuk bëri të ditur nëse do të ketë sulme të tjera, por tha se situata po monitorohet me kujdes. Shaps tha se ishte e rëndësishme të sigurohet tregtia e lirë ndërkombëtare duke mbrojtur anijet që lundrojnë në Detin e Kuq. Ndërkohë për shkak të pasigurisë së krijuar nga sulmet e grupit militant Huthi pas nisjes së luftës në Gaza, shumë kompani kanë reduktuar lundrimet e anijeve tregtare në detin e kuq, ku disa prej tyre si Tesla, Volvo i kanë pezulluar përkohësisht.

Një anije në pronësi të Shteteve të Bashkuara është goditur të hënën nga një raketë e shkrepur nga rebelët e lëvizjes jemenase, Houthis, në Gjirin e Adenit, njoftuan zyrtarët.

Komanda Qendrore e Shteteve të Bashkuara e konfirmoi sulmin dhe i fajësoi rebelët e Houthis për të.

"Anija ka raportuar se nuk ka të lënduar apo dëme të mëdha dhe po e vazhdon rrugëtimin", tha Komanda Qendrore.

Firmat e sigurisë Ambrey dhe Dryad Global thanë për Associated Press (AP) se anija e goditur ishte Eagle Gibraltar, një anije për transportimin e mallrave me shumicë.

Anija është në pronësi të Eagle Bulk nga Konektikati i Shteteve të Bashkuara.

Agjencia detare e Britanisë së Madhe, UKMTO, e cila i mbikëqyr ujërat në Detin e Kuq, tha se sulmi ndodhi rreth 177 kilometra në lindje të Adenit.

Houthis e kanë shënjestruar këtë korridor jetik nëpër të cilin kalojnë furnizimet me mallra dhe energji nga Azia dhe Lindja e Mesme në drejtim të Kanalit të Suezit dhe pastaj në Evropë.

Rebelët e Houthis, të cilët mbështeten nga Irani, thonë se sulmet në ngushticën jetike të transportit të mallrave përmes Detit të Kuq po bëhen ndaj anijeve të ndërlidhura me Izraelin, si përgjigje ndaj luftës në Rripin e Gazës./ REL

Ajo që po zhvillohet në Gaza është "zhvendosja më e madhe e popullit palestinez që nga viti 1948".

Kështu ka raportuar agjencia e Kombeve të Bashkuara për refugjatët palestinezë (UNRWA).

"Një brez i tërë fëmijësh është i traumatizuar, mijëra janë vrarë, gjymtuar dhe jetimë. Kjo është zhvendosja më e madhe e popullit palestinez që nga viti 1948”,- deklaron OKB.

Houthis

Sulmet nga rebelët jemenas pro-iranianë Houthi mbi anijet e lidhura me Izraelin në Detin e Kuq do të vazhdojnë, pavarësisht bastisjeve nga SHBA dhe Britani e Madhe. 

Kjo u raportua nga një zëdhënës i grupit Mohammed Abdulsalam, duke përsëritur kërkesat për t'i dhënë fund luftës në Gaza dhe lejimin e hyrjes së ndihmave humanitare në Gaza.

Foto nga Gaza

Qindra qytetarë të Gazës kanë sulmuar kamionë me ndihma humanitare në Gaza, sipas videove të publikuara në rrjetet sociale. Ata sulmuan kamionët për të marrë miell dhe nevoja të tjera humanitare.

Ndërkohë, Emiratet e Bashkuara Arabe vazhdojnë të dërgojnë ndihma humanitare për civilët palestinezë në Rrip për të 70-tën ditë radhazi.

Emiratet kanë dërguar 140 avionë, dy anije dhe 209 kamionë nga Egjipti, të cilët kanë transportuar deri më tani 14.302 tonë ndihma.

Vladimir Putin dhe Ebrahim Raisi

Moska dhe Teherani do të nënshkruajnë një marrëveshje të madhe ndërqeveritare, njoftoi ministria e mbrojtjes pas bisedimeve telefonike mes Sergei Shoigu, dhe homologut të tij iranian, Mohammad Astani.

“Palët theksuan përkushtimin e tyre ndaj parimeve themelore të marrëdhënieve ruso-iraniane, duke përfshirë respektimin e pakushtëzuar të sovranitetit dhe integritetit territorial të njëri-tjetrit, i cili do të konfirmohet në marrëveshjen e madhe që po përgatitetmidis Federatës Ruse dhe Republikës Islamike të Iranit”, thuhet në deklaratë.

Shoigu vuri në dukje se Moska dhe Teherani po rrisin përpjekjet e përbashkëta për një botë të barabartë multipolare. Gjithashtu, palët diskutuan për çështje aktuale të bashkëpunimit ushtarak dhe ushtarako-teknik dhe dhanë mendime për çështjet e sigurisë rajonale.

Puna për një traktat të ri të madh midis Rusisë dhe Iranit u bë i njohur në shtator të vitit 2022, kur Vladimir Putin dhe Presidenti i Republikës Islamike, Ebrahim Raisi, diskutuan këtë çështje në margjinat e samitit të SCO-së në Samarkand.

Hossein Amir-Abdollahian

Ministri i Jashtëm i Iranit, Hossein Amir-Abdollahian u bëri thirrje zyrtarëve amerikanë “të mos lidhin sigurinë dhe interesat kombëtare të SHBA me fatin e kryeministrit të Izraelit, i cili po bie”.

Thirrjen, Abdollahian e bëri një konferencë të përbashkët për shtyp televiziv me homologun e tij indian në Teheran, raporton Al Jazeera.

Ai u tha gjithashtu Shteteve të Bashkuara se nuk mund të bëjnë thirrje për përmbajtje ndërsa mbështesin luftën e Izraelit në Gaza. Amir-Abdollahian kërkoi një zgjidhje diplomatike të konfliktit në enklavën e rrethuar.

Foto nga vendngjarja në Izrael

Të paktën 18 persona u plagosën pasi një makinë u përplas me një turmë në lagjen Ra’anana pranë Tel Aviv. Mediat lokale thanë se ngjarja e rëndë ka lidhje më një sulm me thikë të raportuar pak më parë.

Një grua 70-vjeçare, një 34-vjeçar dhe një djalë 16-vjeçar janë në gjendje të rëndë, raportojnë mediat greke.

“Pas një incidenti të rëndë në Raanana, forcat e policisë janë në vendngjarje dhe kanë nisur hetimet për ngjarjen e rëndë. I bëjmë thirrje publikut të qëndrojë vigjilent dhe të ndjekë udhëzimet e policisë.”, tha Policia e Izraelit në një postim në X (

Sipas raportimeve, i dyshuari sulmoi me thikë një shofer para se të vidhte makinën dhe të përplaste 3 persona. Më pas ai vodhi një makinë tjetër, dhe eci në rrugën Ahuza duke u përplasur me të paktën një grup tjetër njerëzish.

Policia tha se dyshuari që kreu sulmin terrorist në Ra’anana është një palestinez nga qyteti i Hebronit në Bregun Perëndimor dhe është arrestuar.

Erdogan

Në një lëvizje të pazakontë, Presidenti turk Erdogan ka refuzuar të marrë pjesë në Forumin Ekonomik Botëror të këtij viti, duke thënë se as Turqia nuk do të përfaqësohet në Davos.

Presidenti turk u ka kërkuar zyrtarëve të vendit të tij që të anashkalojnë Forumin Ekonomik Botëror të këtij viti në Davos për shkak të qëndrimit të organizatorëve ndaj luftës së Izraelit kundër Hamasit, sipas burimeve.

Ministri turk i Financave, Mehmet Simsek, kishte planifikuar të merrte pjesë në takimin vjetor derisa Erdogan, i cili ka kritikuar sjelljen e Izraelit në luftën kundër Hamasit në enklavën palestineze të Gazës anuloi vendimin.

Klaus Schwab, themeluesi dhe drejtori ekzekutiv i forumit, dënoi “sulmet terroriste të Hamasit kundër Izraelit” pasi grupi vrau rreth 1200 njerëz në një sulm të befasishëm më 7 tetor 2023.

Ndërsa Schwab gjithashtu bëri thirrje për marrjen e masave për të mbrojtur popullsinë civile të Gazës.

Foto nga dërgesat e gazit përmes Detit të Kuq

Katari ka pezulluar dërgimin e cisternave që transportonin gaz natyror të lëngshëm përmes ngushticës Bab el-Mandeb pasi sulmet ajrore të udhëhequra nga SHBA kundër objektivave Houthi në Jemen ngritën rreziqe në rrugën ujore. 

Të paktën pesë anije LNG të drejtuara nga Katari janë ndalur që nga e premtja, sipas të dhënave të gjurmimit të anijeve të përpiluara nga gazeta Bloomberg.

Një pauzë e zgjatur në furnizimet nga furnizuesi i dytë më i madh i LNG në Evropë ngre rreziqe ashtu si moti i dimrit mbërtheu kontinentin.

Foto nga Gaza pas bombardimeve izraelite

Sulmet e fundit të Izraelit në Rripin e Gazës e çuan numrin e të vdekurve në më shumë se 24 mijë persona që nga fillimi i luftës.

Ky numër përfshin më shumë se 10,400 fëmijë, ose mbi 1% e popullsisë së fëmijëve të enklavës së rrethuar.

Të paktën 61 mijë njerëz janë plagosur gjithashtu në enklavë, me shumë që luftojnë për të gjetur kujdes shëndetësor ose ilaç për të trajtuar plagët e tyre.

Po ashtu raportohet se më shumë se 8 mijë njerëz janë ende të zhdukur.

Ministri i Jashtëm kinez, Wang Yi

Ministri i Jashtëm kinez, Wang Yi, bëri thirrje për një konferencë gjithëpërfshirëse dhe autoritative të paqes izraelito-palestineze dhe një afat kohor për zbatimin e një zgjidhjeje me dy shtete. 

Duke folur me gazetarët pas bisedimeve me ministrin e jashtëm egjiptian Sameh Shoukry në Kajro gjatë fundjavës, Wang tha se komuniteti ndërkombëtar duhet të "dëgjojë" me kujdes shqetësimet legjitime në Lindjen e Mesme. 

Vërejtjet e tij u raportuan nga agjencia shtetërore e lajmeve Xinhua.

Foto nga Gaza pas bombardimeve izraelite

Një bastisje e forcave izraelite në qytetin verior të Gazës, e cila ndodhi këtë mëngjes, vrau të paktën 33 persona dhe plagosi dhjetëra të tjerë. 

Kjo u raportua nga gazeta Al Jazeera. Në pjesën veriore të Gazës, sipas OKB-së, kujdesi mjekësor është jashtëzakonisht i kufizuar, pasi nuk ka më spitale plotësisht funksionale në zonë.

Forcat izraelite në Gaza

Ushtria izraelite po vazhdon të bëjë presion në zonën Khan Yunis në pjesën jugore të Gazës. 

Kështu deklaroi zëdhënësi ushtarak ku sipas të cilit ushtarët parandaluan një përpjekje të Hamasit për të transportuar armë në një kamion, i cili më pas u shkatërrua, për milicitë e tij ende të pranishëm në zonë. 

Gjithashtu në Khan Yunis, ushtria bastisën komandën qendrore të fraksionit islamik ku u zbuluan armë të ndryshme. Sipas raportimeve në Gazën veriore u vranë pesë ushtarë.

Shtëpia e Bardhë

Shtëpia e Bardhë deklaroi se “është koha e duhur” që Izraeli të zvogëlojë intensitetin e luftës së tij në Gaza, duke ekspozuar dallimet në rritje midis aleatëve të ngushtë.

Duke folur për televizionin CBS, zëdhënësi i Këshillit të Sigurisë Kombëtare të Shtëpisë së Bardhë, John Kirby tha se Shtetet e Bashkuara kanë folur me Izraelin “për një kalim në operacione me intensitet të ulët” në Gaza.

“Ne besojmë se është koha e duhur për atë tranzicion dhe ne po flasim me ta për ta bërë këtë”, tha ai në Face the Nation.

Megjithatë, kryeministri Benjamin Netanyahu është zotuar të vazhdojë përpara me forcë të plotë derisa Hamasi të shkatërrohet dhe të gjithë robërit të lirohen.

Penny Wong

Ministrja e Jashtme Australiane, Penny Wong, do të vizitojë Lindjen e Mesme këtë javë për të “mbështetur përpjekjet diplomatike ndërkombëtare drejt një paqeje të qëndrueshme”, sipas një deklarate në faqen e saj zyrtare.

Ajo do të vizitojë Jordaninë, Emiratet e Bashkuara Arabe, Territoret Palestineze dhe Izraelin, ku do të takohet me familjet e pengjeve dhe të mbijetuarve të sulmeve të Hamasit të 7 tetorit.

Wong do të bëjë thirrje për lirimin e të gjithë pengjeve dhe “të përcjellë mbështetjen e Australisë për sigurinë e Izraelit dhe të drejtën e saj për të mbrojtur veten përballë terrorizmit, duke theksuar se mënyra se si e bën këtë gjë ka rëndësi", huhet në deklaratë.

Ajo do të përsërisë gjithashtu mbështetjen e Kanberrës për “të drejtën e palestinezëve për vetëvendosje dhe përkushtimin për përmbushjen e nevojave humanitare në Gaza dhe Bregun Perëndimor me zyrtarë në Territoret Palestineze.

Joe Biden

"Sot është një moment historik shkatërrues dhe tragjik: 100 ditë robëri për më shumë se 100 njerëz të pafajshëm, përfshirë 6 amerikanë, të cilët ende mbahen peng nga Hamasi në Gaza, në këtë ditë të tmerrshme, unë përsëris edhe një herë premtimin tim për të gjithë, për pengjet dhe familjet e tyre: Ne jemi me ju. Ne kurrë nuk do të ndalemi së punuari për të sjellë amerikanët në shtëpi".

Kështu deklaroi presidenti amerikan Joe Biden në një deklaratë të botuar 100 ditë luftë pas 7 tetorit. 

"Që kur Hamasi sulmoi brutalisht Izraelin më 7 tetor, administrata ime ka ndjekur diplomaci agresive për të sjellë pengjet në shtëpi. Ne pamë rezultatet e para të kësaj përpjekjeje në fund të tetorit, kur dy amerikanë u ribashkuan me të dashurit e tyre. Në nëntor, duke punuar ngushtë Në koordinim me Katarin, Egjiptin dhe Izraelin, ne ndërmjetësuam një pauzë shtatë-ditore në luftime që çuan në lirimin e 105 pengjeve - duke përfshirë një djalë 4-vjeçar amerikan - dhe na lejuan të derdhim në Gaza ndihma shtesë jetike humanitare", tha Biden.

Ebrahim Raisi

Presidenti iranian, Ebrahim Raisi kritikoi të dielën sulmet e fundit amerikane në Jemen gjatë një telefonate me një zyrtar të lartë Houthi, duke pretenduar se ato zbuluan “natyrën agresive” të vendit.

SHBA kreu sulme kundër objektivave Houthi në Jemen javën e kaluar në përgjigje të sulmeve të grupit të mbështetur nga Irani ndaj anijeve të Detit të Kuq, të cilat sipas saj janë hakmarrje kundër Izraelit për luftën e tij në Gaza, raporton CNN.

“Pa dyshim, veprime të tilla kundër njerëzve që kanë rezistuar ndaj agresionit të huaj për vite me radhë dhe tani po luajnë një rol efektiv në mbrojtjen e popullit palestinez, refuzohen dhe dënohen nga kombet lirikërkuese të botës”, tha Raisi.

Foto e tre pengjeve izraelite

Hamasi ka publikuar fotot e tre pengjeve të mbajtur në Rripin e Gazës 100 ditë pas rrëmbimit të tyre. 

Ata janë Noa Argamani, 26 vjeç, Yossi Sharabi, 53 dhe Iti Sabirsky, 38. Kjo është raportuar nga faqja e internetit Haaretz e cila flet për "luftë psikologjike" nga ana e Hamasit. 

Hamasi shtoi se fati i të treve do të zbulohet sot. Noa Argamani ishte rrëmbyer nga milicët në festivalin Supernova rave në shkretëtirën e Negevit. 

Në videon e publikuar shihet rrëmbimi i studentes izraelite, teksa ajo ndahej nga i dashuri me lot në sy dhe duke bërtitur për ndihmë.

Videoja prej dhjetë sekondash bëri xhiron e botës, ku shihet vajza duke hipur në pjesën e pasme të një motoçiklete dhe duke u dërguar në Rripin e Gazës.

Foto nga Gaza

Gazeta Al Jazeera deklaron se forcat izraelite sulmuan kampusin e Universitetit Kombëtar An-Najah në Nablus, Bregu Perëndimor, duke arrestuar të paktën 25 studentë që po organizonin një protestë.

I cituar nga transmetuesi arab, rektori i universitetit tha se të gjitha komunikimet ishin ndërprerë brenda dhe rreth kampusit dhe se të gjithë studentët e pranishëm kishin marrë një mesazh me tekst nga forcat izraelite duke u thënë atyre të "dorëzimin menjëherë".

Benjamin Netanyahu

Kryeministri izraelit, Benjamin Netanyahu, tha se "askush nuk do të na ndalojë" të shkatërrojmë Hamasin, ndërsa lufta në Gaza kaloi kufirin 100-ditor. 

Komentet e tij - të raportuara nga CNN - sugjerojnë se Izraeli nuk do të pajtohet me Gjykatën Ndërkombëtare të Drejtësisë, ku është akuzuar për gjenocid dhe mund të urdhërohet të ndalojë ofensivën e tij. 

“Askush nuk do të na ndalojë, as Haga, as boshti i së keqes dhe askush tjetër”, tha ai. 

Ministri izraelit i Mbrojtjes, Yoav Gallant i bëri jehonë premtimeve të Netanyahut, duke thënë se ushtria izraelite "po lufton luftën më të drejtë në historinë tonë" dhe nuk do të ndalet derisa të mposht Hamasin.