TIRANE - Përfaqësues të Aleancës Kundër Importit të Plehrave deklarojnë se gjatë takimit me kryetarin e Kuvendit Ilir Meta, mesditën e sotme, morën sinjale se LSI-ja do të ndajë të njëjtin shqetësim me presidentin Nishani, lidhur me ligjin që lejon importin e mbetjeve.

Në përfundim të takimit në zyrën e Metës, përfaqësues të AKIP bënë të ditur se kreu i Kuvendit i la të kuptonin se pa konsensusin me shoqërinë civile nuk do të ketë ligj. Sipas ambientalistit Sazan Guri, i vetmi konsensus me shoqërinë civile është vota kundër ligjit të mbetjeve.

Sipas njoftimit të Kuvendit, 'kryetari Meta nënvizoi se do të dëshironte që miratimi i ligjit për mbetjet  të mund të shteronte të gjitha mundësitë e dialogut, mirëkuptimit dhe konsensusit me shoqërinë civile, përfaqësuesit e industrisë ricikluese dhe opinionin publik, me qëllim që ligji t’i shërbejë interesit të qytetarëve, imazhit të Shqipërisë, rritjes ekonomike të vendit, zhvillimit të turizmit, bujqësisë dhe të rrisë punësimin e të ndikojë pozitivisht në mbrojtjen e mjedisit dhe shëndetin e jetës së qytetarëve'.

Edhe pak ditë më parë kryetari i Kuvendit Ilir Meta theksoi rëndësinë e nxitjes së dialogut, lidhur me ligjin e kontestuar që lejon importin e mbetjeve. Kreu i LSI-së theksoi se miratimi i ligjit, në kushtet e një konfliktualiteti, edhe qoftë ky i stisur nga opozita, nuk është pozitiv.
 
Ligji për menaxhimin e integruar të mbetjeve u miratua me 63 vota të maxhorancës, ndërsa deputetët e PDIU­së nuk morën pjesë në votim. Por ligji u kthye sërish në Kuvend nga Presidenti Nishani.
(er.nu/shqiptarja.com)