PD/ Ikën Paloka, Julia Emiri zgjidhet kryetare e Këshillit Kombëtar! Për Kryesinë e re konkurrojnë 61 kandidatë për 20 vende

Këshilli Kombëtar i Partisë Demokratike, votoi mbrëmjen e kësaj të mërkure për të zgjedhur drejtuesin e vet të ri, dhe 20 anëtarët e zgjedhur të kryesisë së re, ku shumica dërrmuese e 61 emrave në garë për 20 vende, përfaqësojnë figura të reja. Drejtimi i Këshillit iu besua Julia Emirit, pjesmarrëse aktive dhe folëse në tubimet para kryeministrisë. Me protestat qytetare në shesh, Berisha shprehet i sigurt se kryeministrit Rama i ka ardhur fundi, dhe PD-së do i hapet rruga e pushtetit

“Është menduar që Këshilli Kombëtar të drejtohej nga një zonjë”, tha kryedemokrati Sali Berisha.

Julia Emiri dhe Silva Hasa, figura jo shumë aktive politikisht, por që vijnë nga angazhimi në PD, e para në protesta dhe e dyta ish-kandidate për deputete në zgjedhjet e vitit 2025 në Qarkun e Fierit, ishin dy emrat në garë për drejtuesen e re të Këshillit, e cila pason një figurë të njohur në PD, Edi Palokën. Me diferencë nga hasa që mori vetëm 83 vota, posti iu besua Julia Emirit, e dalluar së fundmi për pjesmarrjen aktive në protestat qytetare para kryeministrisë, jo vetëm si aktore, por dhe si folëse.

Për herë të parë, pas ndryshimeve statutore, për 20 anëtarët e zgjedhur të Kryesisë, u votua në tre fletë të veçanta, njëra me vetëm gra, për 6 vende, një tjetër vetëm me burra për 8 vende, dhe një tjetër me pjestarë rinorë, prej nga do të zgjidhen 3 te rinj e tre të reja. 

Krahasuar me anëtarët aktual të zgjedhur, 61 kandidatët në garë, në pjesën dërrmuese, janë figura të reja.

Përzgjedhja e sekretariatit dhe nënkryetarëve do të përcaktojë më pas dhe pjesën tjetër të kryesisë e cila përbëhet nga anëtarët ex officio.

Votimi i sotëm u parapri nga një fjalë e kryetarit Berisha, i përqëndruar sërish të protestat që po mbahen në shesh prej më shumë se një muaji.

Edhe një herë kreu i PD-së i përsëriti të tijëve, të mos ndikohen nga slogantet “Berisha në burg”, apo ato që e cilësojnë opozitën të shitur, por ta mbështesin protesën me të gjitha mënyrat.

“Thirrja ime është, mbështetje masive me të gjitha mënyrat kësaj lëvizje që do t’i japë Edi Ramës së shpejti vendin e merituar”, tha Berisha.

Sipas Berishës, plagët e vërteta kryeministrit ia kishin hapur protestat e opozitës, prandaj tani

“Do ecim të sigurt drejt misionit tonë, rikthimit të votës së lirë të shqiptarëve dhe opozitës në pushtet”, vijoi Berisha.

R.Xh/Shqiptarja.com

TAG:
• PD
• sali berisha
• stresi
• keshilli kombetar i PD
• kryesia e PD