POP 5

Lajmet më të lexuara të 5 minutave të fundit

Kultura

Mblidhet kuvendi mbarëkombëtar, Shllaku: Gjuha standarde nuk rrezikohet nga gegërishtja

Rreth 90 studiues nga mbarë trevat shqiptare janë bërë bashkë këto ditë në Tiranë për të diskutuar për gjuhën, historinë edhe kulturën. Sekretari organizativ i këtij Kuvendi, Sazan Guri e  konsideron të rëndësishme këtë iniciativë për të thënë të vërtetat e pathëna në këto disiplina.

Studiues të fushave të ndryshme nga Shqipëria, Kosova, Mali i Zi dhe Maqedonia janë mbledhur këto ditë në Kuvendin Ndërkombëtar “Vazhdimësia historike-gjuhësore dhe etnokulturore” për të zbuluar rrënjët tona. Referuesit e pranishëm në Muzeun Historik Kombëtar e konsiderojnë këtë kuvend, si një përpjekje shumë serioze, për të konceptuar pluralizmin në kulturë, si diçka që nuk u përket vetëm akademive dhe fakulteteve, por që mund të iniciohet edhe nga iniciativa të pavarura. Një nga sekretarët organizativ këtij Kuvendi, Sazan Guri shpjegon më gjerësisht arsyet e këtij organizimi mbarëkombëtar.

 “Qëllimi është ai që ka thënë profesor Çabej, se ‘dimë se çfarë kemi marrë, por nuk dimë se çfarë kemi dhënë’. Është zbuluar, që gjuha ilire ka vazhduar si e thënë, si e shkruar me arbrit, e më pas me shqiptarët. Ne këtë duam që të evidentojmë, të gërmojmë, të gërvishtim edhe të themi ato që janë të pathëna, apo që kanë qenë të detyruara nga akademitë e shteteve fqinje” shprehet studiuesi Sazan Guri.  

Shkrimtari edhe përkthyesi Primo Shllaku mendon se aktualisht qytetërimi shqiptar është në rrezik, për shkak se kujtesa kombëtare e shqiptarëve ndodhet e sulmuar nga shqiptarët edhe të huajt.

“Ajo që është më e rrezikshmja, është se shkencat tona, sidomos ato mbi kujtesën edhe shpirtin e kombit kanë hyrë në një indeks negativ. Ajo që është më e keqja është amullia. Institucionet tona, që duhet që ta gërmonin kujtesën edhe të nënvizonin momente të rëndësishme për t’i shërbyer gjuhës, por flenë gjumë. Unë nuk e shikoj të pafajshme, por të qëllimshme, sepse po shikoj se po kërkojnë që të kalojnë disa breza edhe të amnistohet, të harrohet komunizmi, e të nisim nga zero. Kjo është fatkeqësia më e madhe. Ky grupim, kjo iniciativë e këtij kuvendi “Rrënjët tona” do të përflitet si shumë nacionalist, por aty ku kemi mbërrit ne, kemi nevojë për serum të fortë edhe për nacionalizmin”, shprehet shkrimtari edhe përkthyesi Shllaku.

Më tej Shllaku shton se me kemi bërë shumë faje historike, edhe prej kësaj kemi një rrallim të kulturës sonë.

“Konsiderata e gabuar edhe shumë rrezikshme, se gjuhën shqipe e kërcënon gegërishtja dhe jo gjuhët e huaja ndërkohë që është anglishtja, që po e kërcënon shqipen, jo pjesët e saj organike. Të gjitha këto na tregojnë se kultura shqiptare po kalon një gjendje pleqërie me shumë skleroza. Unë mendoj se gjuha shqipe, nëse do të isha kryeministër i Shqipërisë, do të thoja që ta hapim edhe një herë, ta përziejmë në kushtet e reja gjeopolitike edhe gjeokulturore, ku Evropa garanton lëvizjen e lirë. Kongresi i vitit ‘72 u bë në një kohë, kur unë për të shkuar në Gjirokastër më duheshin tre ditë. Pra mund të vdisja pa shkuar kurrë në Gjirokastër. Sytjanat prej teneqeje që na kanë vënë ‘72, nuk po na lë që të dukemi aq bukur, na ka shtrënguar edhe po na vret”, vijon Shllaku.

Kuvendi Mbarëkombëtar do të vazhdojë deri në datë 12 në Muzeun Historik Kombëtar.

 

/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    20 Nëntor, 13:18

    Vrasja e 14 vjeçarit, çfarë duhet të bëjë Shqipëria me TikTok e Snap Chat?

Lajme të tjera



×

Lajmi i fundit

Max Verstappen shpallet kampion bote në Formula 1, titulli i katërt në karrierë

Max Verstappen shpallet kampion bote në Formula 1, titulli i katërt në karrierë

24 Nëntor, 09:10