Mblidhet në PD 'Rithemelimi', Berisha merr rolin e kreut të partisë, sulmon Kim: S'na e përcakton ajo kryetarin e partisë! Negociata për Presidentin? Vetëm nëse emrin e propozojmë ne

Sali Berisha thotë se pas vendimit të gjykatës së Tiranës që njohu ndryshimet e 11 Dhjetorit vendimet e Komisionit të Rithemelimit janë të detyrueshme për zbatim.

"Unë kam thënë që është organ legjitim, komisioni është plotësim legjitim. Kryesia është e shkarkuar, nuk kemi kryesi, ish-kryetari është i shkarkuar dhe më vonë i larguar. Drejtues, udhëheqës është komisioni i rithemelimit, grupi parlamentar padyshim që ka legjitimitet. Por, kuvendi i 11 dhjetorit është jashtë çdo lloj diskutimi nga grupi parlamentar, vendimet janë të detyrueshme për zbatim", u shpreh Berisha.

Berisha ka pasur edhe një koment për faktin përjashtimin e tij nga grupi parlamentar. Për Berishën, vendimi i 9 shtatorit për përjashtimin e tij është varrosur dhe e konsideron veten pjesë te grupit.

"Jam pjesë e grupit, vendimi i 9 shtatorit u varros në mënyrë më demokratike me datën 11 dhjetor. Këto gjëra s'kanë asnjë lidhje, nuk jam përjashtuar", vijoi ai.

Sali Berisha ka komentuar nëse do të votonte Luzlim Bashën për president.

"A ka mundësi mos bëni shaka, ai e përgënjeshtroi mos të merremi me gjëra të tilla", tha Berisha për gazetaren e Report Tv Danjela Maloku.

Ish-kryeministri Sali Berisha në një deklaratë për mediat foli pas mbledhjes së Komisionit të Rithemelimit edhe për çështjen e Presidentit të Republikës.

“Se çfarë qëndrimi do të mbajmë do të përcaktohet nga Këshilli Kombëtar i PD i cili do të zgjidhët nga Kuvendi i 30 prillit. Nëse do të propozojë opozita për presidentin e ri dhe se cili do të jetë qëndrimi do merret vendimi nga  organet më të larta. PD si opozitë e vërtetë nuk pranon asnjë propozim të Edi Ramës. Në se Rama vendos që presidentin ta propozojë PD ose opozita atëherë do të nisim konsultimet me institucionet e PD”, tha Berisha.

Ish-Kryeministri Sali Berisha në prononcimin për mediat pas takimit të Komisionit të Rithemelimit në Selinë blu, u pyet nga gazetarja e Report Tv Danjela Maloku për deklaratat e djeshme të Yuri Kim dhe nëse rrezikon PD të shpallet non grata me atë në krye.

"Kryetari i PD-së u shkarkua me datën 11 dhjetor me 4446 votat e delegatëve dhe 44 mijë votat e anëtarëve. Askush nuk ka tjetër tagër të caktojë kryetarin e PD. Një përpjekje e dështuar për të ndërhyrë në shkelje flagrante të Konventës së Vjenës në sovranitetin e një force të lirë politike.  E përsëris publikisht këtu se kurrë, as kryetarin dhe as Kryesinë, askush nuk do ta përcaktojë përveç anëtarëve të PD”, tha Berisha.

Pas mbledhjes me Komisionin e Rithemelimit Sali Berisha tha se kanë marrë listat e zgjedhjeve të kaluara dhe do i dërgohet kryesisë.

"U diskutua gjerësisht për listat me të cilat do votohet me gjatë këtyre javëve për kryesitë për kryetarët dhe tani disponohet lista të vitit 2019, të qershorit të vutit 2021 dhe të referendumit të 18 dhjetorit 2022. Lista do u dërgohet kryesive të PD-së të cilat do jenë ato që do japin votën përfundimtare për listën me të cilët do votojnë anëtarët e PD-së. Kam besim të plotë se ekziston vendosmëri për të bërë gjithçka që çdo anëtar i PD të votojë për kryetarin e degës dhe për kryetarin e grup seksionet e me radhë. Në mbledhje u diskutuat probleme të tjera dhe me këtë rast edhe njëherë dua të garantoj cdo anëtar të PD se formulari i shpërndarë nuk ka asnjë qëllim përveç pajisje me dokumentet e PD dhe jo për qëllime votimi", tha Berisha.

Pas marrjes së nga Komisioni i Rithemelimit, në selinë blu u hoqën dyert e blinduara. Sot deputeti Flamur Noka, në rolin e ekspertit i ka treguar me detaje Sali Berishës pastrimin e ambientit dhe hyrjeve brenda zyrave në PD nga dyert e blinduara.