Vrulli i ndërtimeve duket se po ndalon. Shifrat e Institutit të Statistikave tregojnë se gjatë vitit 2025, bashkitë e vendit aprovuan 1158 leje të reja ndërtimi, me rënie në raport me vitin 2024 me 174 leje më pak.

Numri i lejeve të ndërtimit
Viti 2024      1,336 leje
Viti 2025      1,158 leje
Diferenca      -178 leje

Por kjo rënie duket se është vetëm në letra pasi INSTAT, prej një viti ngre shqetësimin për mungesën e të dhënave nga institucionet qendrore për lejet e ndërtimit që ato japin. Në raportin e fundit thuhet se shifrat e lejeve nuk mund të krahasohen me 2024-ën pasi nuk janë shifrat totale.

Kjo për shkak se institucionet shtetërore që miratojnë leje ndërtimi, siç është Këshilli Kombëtar i Territorit, që aprovon lejet për kullat apo resortet e mëdha nuk kanë raportuar të dhëna mbi lejet e aprovuara.

Bashkë me numrin më të ulët të lejeve të dhënave, ka rënë edhe sipërfaqja ndërtimore, nga 2.4 milionë metër katrorë në 2024-ën, 1.3 milionë metër në vitin 2025.

Sipërfaqja ndërtimore
Viti 2024             2,498,916 m²
Viti 2025             1,304,606 m²
Diferenca           -1,194,310 m²

Referuar raportit vlera e këtyre ndërtimeve të reja përllogaritet në rreth 738 milionë euro, nga 1 miliardë euro që ishte në vitin paraardhës (2024).

Vlera e ndërtimeve të reja
Viti 2024       1.064 mln euro
Viti 2025         738 mln euro
Diferenca       -326 mln euro

Ndërtimi është kthyer në një ndër industritë kryesore që po ndikon në rritjen ekonomike të vendit, paralelisht me tregun real estate dhe turizmin.