Italia do të marrë pjesë në tryezën e Bordit të Paqes të krijuar nga presidenti Donald Trump për planin e paqes në Gaza. Dhoma e Deputetëve në vendin fqinj miratoi me 183 vota pro dhe 122 kundër rezolutën e shumicës duke i hapur rrugë pjesëmarrjes së Italisë si vëzhguese në takimin e parë më 19 shkurt.

Ministri i Jashtëm Antonio Tajani tha në Kuvend se sot nuk ka alternativa konkrete dhe të zbatueshme ndaj planit amerikan. “Të mendosh ndryshe do të thotë të mos bësh llogaritë me realitetin”, u shpreh ai, duke theksuar se objektivi i Italisë mbetet krijimi i kushteve për dy shtete që bashkëjetojnë në paqe dhe siguri.

Sipas tij, mungesa e Italisë në një tryezë ku diskutohet paqja në Mesdhe do të ishte e pakuptueshme politikisht dhe në kundërshtim me frymën e Kushtetutës. Italia nuk do të jetë pjesë formale e Borditt ë Paqes për shkak të kufizimeve kushtetuese, por do të marrë pjesë si vëzhguese. Tajani shtoi se edhe Bashkimi Europian ka konfirmuar praninë, bashkë me vende kyçe të rajonit.

Opozita reagoi ashpër. Elly Schlein akuzoi qeverinë se po anashkalon Kushtetutën dhe po e kthen Italinë në “kalë Troje të Trump”. Sipas saj Georgia Meloni "nuk di t'i thotë jo Donald Trump-it". Zëra të tjerë e cilësuan nismën si goditje ndaj OKB-së dhe si një forum që rrezikon të zëvendësojë rregullat ndërkombëtare me raporte force.

Qeveria, megjithatë, mbron zgjedhjen e vet: sipas Tajanit, Italia duhet të jetë aty ku diskutohet paqja dhe ku mund të japë kontribut konkret për Gazën.