Meta si ‘prokuror’, hap portal në Presidencë: Denonconi te unë presionet për zgjedhjet

TIRANË- Presidenti Ilir Meta njofton hapjen e një portal në presidencë ku qytetarët mund të denoncojnë presionet që u bëhen për zgjedhjet e 25 prillit, duke marrë atributet e prokurorisë. Në një kohë ku opozita ka akuzuar se po ndryshohen qendrat e votimit, mazhoranca e mohon, kreu i shtetit u është drejtuar me një thirrje qytetarëve. Ai shprehet se të gjithë duhet të kontrollojnë tani qendrën e tyre të votimit dhe të rinovojnë kartën e identitetit.

"U bëj thirrje të gjithë qytetarëve të verifikojnë që tani ku e kanë qendrën e votimit! U bëj thirrje të gjithë qytetarëve të rinovojnë kartën e identitetit, siç bëra unë! Nëse nuk i lënë apo u krijojnë probleme, do të hapet edhe një portal për qytetarët në Institucionin e Presidentit, që të informojnë për shqetësimet apo presionet që u bëhen për zgjedhjet", shkruan Meta. 

Përplasjet mes Presidencës dhe Mazhorancës kanë qenë të ashpra, të agravuara më tepër me afrimin e datës së zgjedhjeve. kryeministri Edi Rama ka akuzuar presidentin Ilir Meta se lëvizë pa protokoll duke zhvilluar takime natën, për të bërë fushatë për LSI-në. në përgjigje të këtyre akuzave, Meta tha se i zhvillon këto takime pasi janë ata vetë qytetarët që i kërkojnë për shkak se "janë braktisur nga qeveria".

B.K./Shqiptarja.com

TAG:
• edi rama
• Ilir Meta
• zgjedhjet parlamentare 2021