'Janë rritur pagat'/ Meta- Ramës: Ka ndodhur në kohën e Berishës, jo tënden! Ti ose s'di nga ekonomia ose gënjen

TIRANË- Presidenti Ilir Meta i ka kthyer përgjigje kryeministrit Edi Rama i cili tha se gjatë qeverisje së tij janë rritur pagat.

Për kreun e shtetit, i cili edhe sot është "zhveshur" nga posti që mban, duke veshur "kostumin" e një opozitari, Rama ose nuk njeh ekonominë ose gënjen, duke sjellë shifra të kundërta me atë që ka publikuar kreu i qeverisë. Meta vijon duke thënë se pagat janë rritur  3.7 herë më shumë në periudhën 2006-2013 kur në pushtet ishte Sali Berisha, "dashuria e tij e hershme", krahasuar me periudhën 2013-2020.

"Pyetjes a janë rritur pagat, Kryeministri i përgjigjet me një krahasim të fondit të pagave, që në fillim të vitit 2021 krahasuar me vitin 2006, fondi i pagave pritet të kalojë nga 45.5 miliard lekë, në 71.1 miliard lekë ose një rritje 56%. I kujtojmë se është një fatkeqësi që Kryeministri i vendit ose nuk e njeh ekonominë ose gënjen.

Fondi i pagave nuk është tregues për rritjen e pagave. Zoti Kryeministër, sipas të dhënave të INSTAT, paga mesatare në sektorin shtetëror në vitin 2006 është 28822 lekë, ndërsa në vitin 2013 arrin në 52150 lekë ose një rritje prej 81% me një rritje vjetore mesatarisht 11.6%.

Ndërsa në tremujorin e dytë të vitit 2020 paga mesatare arrin në 63826 lekë ose një rritje krahasuar me vitin 2013, në 22%, me një rritje mesatare vjetore prej 3.1%. Pra si shikohet pagat janë rritur mesatarisht për çdo vit 3.7 herë më shumë në periudhën 2006-2013, krahasuar me periudhën 2013-2020. Qytetarët shqiptarë meritojnë transparencë maksimale dhe jo mashtrime elektorale", shkruan Meta.

B.K./Shqiptarja.com

TAG:
• edi rama
• Ilir Meta