Protesta/ Rrezikuan jetët e artistëve të huaj me molotovë te vila e Enver Hoxhës, arrestohen 4 militantë të PD! Policia çon në SPAK Klevis Balliun

Protesta e Partisë Demokratike mbrëmjen e djeshme u shoqërua me akte të shumta dhune dhe hedhje të molotovëve e fishekzjarrëve në drejtim të vilës së ish-diktatorit Enver Hoxha (sot qendër kulture), disa bizneseve private dhe koshave të plehrave.

Por ajo që kaloi pa marrë vëmendje gjatë protestës së djeshme, është se militantët e Berishës hodhën molotovë edhe pranë disa makinave të parkuara, duke rrezikuar shkrumbimin e tyre.

Në pamjet e siguruara nga Report TV, duket qartë në disa raste që militantët kanë hedhur molotovë pranë gomave të makinave që kanë qenë të parkuara në zonën e ish-Bllokut.

Ndërkohë në një fotografi të publikuar nga vetë Partia Demokratike, duken qartë 2 persona, të cilët ndodhen brenda ‘Vilës 31’ në momentin e sulmit me molotovë nga ithtarët e Berishës.

Pamje nga 'Vila 31' ku duken qartë 2 persona brenda gjatë sulmit

Kryeministri Edi Rama vizitoi “Vilën 31" ku një ditë më parë u hodhën bomba molotov dhe fishekzjarre nga protestuesit. Në godinë ndodheshin edhe artistët e huaj.

Rama shkoi të shihte nga afër jo vetëm dëmet e shkaktuara nga protestuesit, por edhe për të biseduar me artistët. Kryeministri u largua pas 20 minutash.

Në këtë vilë që sot shërben si qendër kulture me emrin ArtExplora, strehohen artistë nga e gjithë bota. Artistët alternohen çdo tre muaj. Në këtë periudhë janë të paktën 8 të tillë, nga 6 vende të ndryshme të botës, që banojnë e punojnë në këtë rezidencë. 

Në momentin e sulmit nga molotovët, i cili ishte edhe përmbyllja e protestës së PD, ndodheshin 7 artistë brenda godinës dhe 3 persona të tjerë, pjesë e stafit, të cilëve iu rrezikua seriozisht jeta. Artistët u terrorizuan, ndërsa vetë policia nuk e kishte parashikuar dot këtë skenar dhe nuk kishte marrë masa. Me ndihmën e tyre, artistët arritën të dilnin pa lëndime.

Ndërkohë kryeministri Edi Rama pasi ka dalë nga rezidenca e artistëve në vilën e ish-diktatorit Enver Hoxha, është shprehur se artistët ishin të traumatizuar nga sulmet e mbrëmjes së djeshme me molotovë nga militantët e Sali Berishës.

Përmes një postimi në rrjetin social ‘X’, Rama është shprehur se gjykatat që i lirojnë militantët e dhunshëm të Berishës, janë përgjegjës për këto vandalizma që sipas tij nuk ndodhin askund në Europë.

Reagimi i Ramës:

Sapo dola nga rezidenca e artistëve në ish-shtëpinë e diktatorit, ku prej kohësh tanimë fondacioni prestigjoz Art Explora mikpret të rinj të talentuar nga Shqipëria, Kosova e mbarë bota, të cilët i gjeta të traumatizuar nga çmenduria e barbarisë së mbrëmshme.

Një sulm i verbër i një grushti të verbërish të paguar për të frikësuar qytetin dhe njollosur Shqipërinë, nën udhëheqjen e një ligësire kriminale tetëdhjetë e kusur vjeçare, që mban nga pas ca hunj gardhi me status deputeti, e që vjen vërdallë si i marri i lagjes nëpër Tiranë, ndërkohë që s’ia var më thuajse askush!

Gjykatësit që i lirojnë këta zjarrvënës të rrezikshëm, sa herë arrestohen nga policia janë bashkëpërgjegjës për këto vandalizma të pandodhura askund në Europë me bekimin e nën hyqmin e një partie parlamentare, në selinë e të cilës nuk flitet për ide e programe, po bëhen vetëm plane dhune dhe bomba artizanale!

Turp për çdo gjykatës që rinxjerr në rrugë këta keqbërës të Shqipërisë dhe turp për qeverisjen e gjyqësorit që rri e vështron sikur Shqipëria nuk është edhe atdheu i saj!

Pas protestës së dhunshme të zhvilluar nga PD mbrëmjen e djeshme, kanë nisur hetimet edhe për një 16-vjeçar.

Përmes një njoftimi, Policia bën të ditur se të miturit iu gjet me vete municion i dyshuar për armë sportive.

Ndërkohë pas akteve të dhunës dhe molotovëve të hedhur te vila e Enver Hoxhës nga militantët e Berishës gjatë protestës së PD, Policia po kqyr pamjet filmike për të identifikuar personat e tjerë që mund të jenë përfshirë në këtë veprimtari kriminale.

Njoftimi i Policisë:

DVP Tiranë-Në lidhje me protestën e organizuar mesditën e djeshme, më datë 28.02.2026, në orën 18:00, thirrur nga subjekti politik Partia Demokratike, Sektori për Hetimin e Krimeve të Rënda, në vijim të veprimeve hetimore e procedurale, arrestoi shtetasit:

L. M., 20 vjeç, R. D., 33 vjeç, D. R., 21 vjeç dhe S. R., 36 vjeç, për veprat penale “Goditjet për shkak të detyrës”, “Prishja e qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr” dhe “Kundërshtimi i punonjësit të rendit publik”.

Nga veprimet hetimore të kryera dyshohet se këta shtetas, gjatë protestës, kanë ushtruar akte të dhunshme, kanë kundërshtuar punonjësit e policisë, si dhe kanë hedhur lëndë piroteknike dhe molotov në drejtim të punonjësve të policisë dhe të Vilës 31, në momentin kur në ambientet e saj ndodheshin persona brenda, shtetas të huaj, duke rrezikuar sigurinë e tyre. Si pasojë janë shkaktuar dëmtime në këtë godinë, si dhe janë dëmtuar 32 kosha mbeturinash të vendosura nga Bashkia Tiranë.

Në cilësinë e provës materiale janë sekuestruar objekte dhe sende të hedhura (molotovë dhe lëndë piroteknike), të cilat janë dërguar për ekspertime të mëtejshme kriminalistike.

Më tej, është proceduar në gjendje të lirë një shtetas i mitur, 16 vjeç, pasi iu gjet me vete municion i dyshuar për armë sportive.

Si dhe u referuan materialet në Prokurorinë e Posaçme Kundër Korrupsionit dhe Krimit të Organizuar, për shtetasin K. B., deputet, pasi ka shkelur ligjin nr. 9754, datë 14.06.2007 “Për Përgjegjësinë Penale të Personave Juridikë” si dhe për veprën penale “Organizimi dhe pjesëmarrja në grumbullime dhe manifestime të paligjshme”.

Gjithashtu, janë administruar pamjet filmike të protestës dhe vijon këqyrja e tyre për identifikimin e personave të tjerë të përfshirë në veprimtari kriminale.

Materialet procedurale do t’i kalojnë Prokurorisë, për veprime të mëtejshme.