Shtetasi serb, Vllado Staniç, u dënua me një vit burgim për pjesëmarrje në luftën e 2015-s në territorin e Ukrainës. Më 15 korrik të këtij viti, Staniç ishte arrestuar në Aeroportin e Beogradit “Nikolla Tesla”, dhe më pas ai pranoi para autoriteteve se kishte marrë pjesë në luftë.
Siç shpjegoi gjykatësja, më 9 shtator, Staniçit iu shqiptua dënimi minimal për akuzën për pjesëmarrje në luftë apo konflikt të armatosur në një shtet të huaj, për shkak se luftës iu bashkua si pjesë e një grupi. Koha e kaluar në paraburgim do t'i llogaritet në dënim.
Përveç dënimit me një vit burgim, Staniçit iu konfiskuan edhe dokumentet e udhëtimit. Ai është liruar nga burgu dhe do të ftohet që më vonë të vuajë dënimin. Avokatja e Staniçit, Katarina Ninkoviç, tha për Shërbimin e Ballkanit të Radios Evropa e Lirë se do të apelojë vendimin.
![](https://shqiptarja.com/template/img/NO_ALFA_Kuadrate shqiptarja.png)
“Ne besojmë se këtu nuk ka ndonjë krim të vërtetë sepse në kohën kur u krye krimi, klienti im nuk e dinte se kjo ishte shkelje penale. Kjo pasi, vepra penale për pjesëmarrje në luftë apo konflikt të armatosur është futur në legjislacion më 2014. Ai e kreu krimin më 2015 gjashtë muaj pasi legjislacioni ishte prezantuar”, tha ajo.
Sipas aktakuzës, në mars të vitit 2015 Staniç në mënyrë vullnetare iu bashkua forcave pro-ruse në lindje të Ukrainës si pjesë e formacionit paramilitar të Regjimentit Hussar.
Sipas raportimeve, në një qytet në Donbas – që është nën kontrollin e forcave pro-ruse – ai kishte kontrolluar të gjithë makinat dhe pasagjerët që hynin në atë zonë. Ai ka shërbyer në një pikë kontrolli, duke mbajtur të veshur uniformën e të ashtuquajturës Republikë Popullore të Luhanskut dhe Donjeckut, u tha në aktakuzë./REL
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)