‘Shtëpia e pavarësisë’, ndizen emrat e firmëtarëve në Vlorë! Rama: Homazh i denjë për ta, atraksion për turistët

VLORË- Pas përfundimit të punimeve në Parkun e Shtëpisë së Pavarësisë, park ky që lidh pjesën e brendshme të qytetit me Lungomaren, tashmë janë ndezur edhe emrat e firmëtarëve të pavarësisë, në oborrin e shtëpisë muze.

Pa shoqërinë e kryebashkiakut Dritan Leli, kryeministri Edi Rama u ndal gjatë vizitës së tij në Vlorë për të parë nga afër këtë park.

“Këtu kemi firmëtarët e pavarësisë të kthyer në xixëllonja, që shkëlqejnë çdo mbrëmje dhe që janë të pranishëm në çdo mëngjes e gjatë gjithë ditës patjetër”, - nënvizoi Kryeministri, teksa përshkoi në këmbë këtë hapësirë të re të qytetit.

LEXO EDHE:
Jorgo Goro mbetet në burg, Apeli i Posaçëm refuzon lirimin

 “Është një homazh mendoj i denjë dhe i shërben gjithë vizitorëve edhe atyre që vijnë nga Kosova, nga Maqedonia e Veriut, nga diaspora, por edhe fëmijëve sepse është si libër i hapur i faqes, në faqen ku janë gjithë firmëtarët e pavarësisë. Është një park i bukur dhe me këtë punë i kemi vënë një qershi mbi tortë po themi dhe tani ka marrë dhe ngjyra çdo gjë” – shtoi kreu i qeverisë.

Rama, tha se ky park i ri jo vetëm do t’i shërbejë qytetarëve, por është edhe një atraksion më shumë për turistët vendas e të huaj që pushojnë në qytetin bregdetar.

B.K./LR/Shqiptarja.com

TAG:
• shtepia e pavaresise
• Vlore
• edi rama