Ndryshimet në qeveri, avokat Ngjela: Rama i hodhi ministrat si ushqim për SPAK-un për të shpëtuar veten

Avokat Spartak Ngjela i ftuar në emisionin “45 Minuta” të drejtuar nga Denis Minga në Report Tv për të komentuar lëvizjet në qeveri, u shpreh se Rama i largoi ministrat për dy arsye. “Protesta e studentëve, por edhe SPAK-u. Nuk besoj që do të jenë të gjithë këta ministra të akuzuar, por mbi 50% e tyre po, do të jenë objekt i SPAK-ut. Arsyeja që i ka eliminuar ka qenë kjo, por me këtë rast iu bënte edhe studentëve një lëshim, që nuk e përfillën. Ajo që duhet parë me vëmendje është problemi që në rast se ti si kryeministër heq gjysmën e qeverisë, ti nuk mbret, këta e dinë veten monark, nuk e njohin parlamentarizmin perëndimor. Kjo nuk është qeveri e një perandori që heq dhe vendos kë të dojë. Rama duhet të kishte dhënë dorëheqjen dhe të krijonte qeverinë tjetër. Rama ka hequr ministrat më të rëndësishëm dhe e konsideron si shëndoshje, jo krizë” u shpreh Ngjela.

Sipas avokatit, goditja e SPAK-ut do të fillojë nga shumica dhe pikërisht nga ministrat e larguar. “Ministrat e larguar do të jenë të akuzuarit e parë të SPAK-ut, disa nga ata, goditja fillon nga mazhoranca, jo opozita. Rama ua dha në tavë ministrat. Rama i hodhi, i nxori për të shpëtuar veten. Do fillojnë me kryeministrin që të shkojnë te Berisha? Nuk e di, besoj do të jetë e butë, sepse kështu ka ndodhur edhe në Rumani. I ke parë se cfarë gjyqtarësh kemi, që thonë mi ka dhënë gjyshi apo gjyshja, që nuk ka shtëpi, apo është në çadër, apo tezja e papunë, e kuptoni sa qesharakë. Ndërsa politikanët janë akoma më qesharakë. Prisni dhe do i shihni”.

Referuar ndryshimeve në qeveri, Ngjela sqaroi edhe arsyen se përse sipas tij Presidenti Meta nuk ka dekretuar deri tani shkarkimin e Bushatit dhe emërimin e Gent Cakës. “Për mendimin tim Rama, Bushatin nuk duhet ta mbante në qeverinë dytë, nuk kemi parë ndonjë diplomaci të rangut të lartë. Meta nuk po e dekreton, fakti që nuk është me interesin kombëtar dhe nuk po e dekreton, lë të kuptohet se është vendosur nga partnerët, janë të gjitha hamendësime. Do ta shikojmë cfarë angazhimi do të ketë shqiptari i Kosovës, nuk e njoh fare. Pse mërzitet Meta? Pse nuk shkarkon Bushatin Meta? Ai nuk do të vendosë një kosovar ministër të Brendshëm. Kush nuk e do që ministri i Jashtëm në Shqipëri të jetë nga Kosova? Beogradi i pari, Moska e dyta. Nëse ai është i Beogradit është turp për të gjithë” tha Ngjela.  Meta ka dekretuar vetëm 4 nga 9 ministrat dhe nuk ka shkarkuar ministrin e Jashtëm Ditmir Bushati (lexo këtu). 

TAG:
• spartak ngjela
• ndryshimet ne qeveri