Nga 18-22 maj 'Turi i 83-të Çiklistik i Shqipërisë'/ Policia harton planin e masave, ja rrugët që do të bllokohen për pesë ditë

Nga data 18 deri më 22 maj 2026 rrugët e Shqipërisë do të mirëpresin Turin e 83-të Çiklistik të Shqipërisë ku pritet të marrin pjesë 20 skuadra elitare nga Shqipëria, Ballkani dhe Evropa. Ky është një moment kyç jo vetëm për sportin, por edhe për imazhin e vendit.

Policia ka hartuar një plan masash teksa ka njoftuar rrugët të cilat do të bllokohen sipas etapave të këtij aktiviteti. 

Bllokimet e rrugëve do të nisin të hënën, në kuadër të etapës së parë, duke nisur nga ora 12:00. Çiklistët pjesëmarrës do të nisen nga Tirana dhe do të përfundojnë garën në Lezhë.

Për etapën e dytë të rrethit të 83-të Çiklistik të Shqipërisë rrugët që bllokohen janë në Lezhë, Vorë, Golem, Rrogozhinë dhe deri përfundimi në Elbasan.

Etapa e 3 ka nisjen në Elbasan dhe përfundimin në Vlorë. Etapa e 4 është riviera shqiptare që nis në Vlorë dhe shkon në tunelin  e Llogarasë, Himarë, Kuç, Lepenicë, Kotë e sërish kthimi në Vlorë, ndërsa etapa e fundit është Vlorë-Fier.

Përveç etapës së fundit që nis në 10, bllokimi i rrugëve për të gjithë etapat e tjera nis në orën 12:00.

"Aktiviteti, i ndarë në 5 etapa, do të zhvillohet në territorin e Republikës së Shqipërisë, më datat 18, 19, 20, 21 dhe 22 maj 2026, dhe do të organizohet në bashkëpunim me Federatën Shqiptare të Çiklizmit, Ministrinë e Turizmit, Kulturës dhe Sportit, Komitetin Olimpik Kombëtar Shqiptar, si dhe me bashkitë përkatëse. Në aktivitet do të marrin pjesë skuadra çiklistike nga Shqipëria, vendet e Ballkanit dhe Europa.

Nisur nga fakti se Turi i 83-të Çiklistik i Shqipërisë do të përshkojë disa nga akset dhe qytetet kryesore të vendit, Policia e Shtetit ka hartuar një plan të posaçëm masash, i cili do të angazhojë strukturat vendore të Policisë, shërbimet e Policisë Rrugore dhe strukturat mbështetëse, me objektiv garantimin e rendit publik dhe sigurisë rrugore, eskortimin e çiklistëve dhe mbarëvajtjen e aktivitetit gjatë gjithë itinerarit.

Policia e Shtetit apelon për mirëkuptimin dhe bashkëpunimin e qytetarëve gjatë zhvillimit të aktivitetit, si dhe rekomandon përdorimin e akseve alternative në segmentet ku do të ketë kufizime të përkohshme të qarkullimit. Strukturat e Policisë së Shtetit do të jenë maksimalisht të angazhuara për garantimin e sigurisë dhe mbarëvajtjen e këtij eventi sportiv ndërkombëtar", thuhet në njoftim.

Qëllimi këtë vit ka qenë rritja e standarteve organizative, pjesmarrja e lartë ndërkombëtare dhe ekspozimi mediatik, për ta dërguar këtë sport në një fazë të re profesionalizimi. Për këtë arsye Turi i 83-të Çiklistik i Shqipërisë do të ketë një transmetues live si shenjë e demostrimit të interesit publik dhe afrimin e brezave të rinj që të merren me çiklizëm.