Gjykata Kushtetuese: Njohim 3 anëtarët e betuar tek Meta...Nuk kemi kuorum për rezolutën e Kuvendit

TIRANË - Gjykata Kushtetuese ka dalë me një njoftim zyrtar për situatën me zgjedhjen e anëtarëve të rinj të këtij institucioni, ku thotë se nuk mund të marrë në shqyrtim rezoluten e miratuar sot nga Kuvendi përmes së cilës kërkohet të shmanget kriza kushtetuese për legjitimitetin e Gjykatës Kushtetuese. Në një njoftim zyrtar shpërndarë për mediat nga zyra e shtypit të Kushtetueses, thuhet se kjo gjykatë ende nuk e ka kuorumin për vendimmarrje për të zgjidhur konfliktin e kompetencave midis pushteteve apo shqyrtimin e kushtetutshmërisë së akteve të nxjerra nga organet e pushtetit publik.

Gjykata Kushtetuese njeh tre anëtarët e betuar mbrëmë tek presidenti, Elsa Toska, Fiona Papajorgji dhe Marsida Xhaferllarin. Kështu, Gjykata Kushtetuese njeh dekretin e presidentit për Marsida Xhaferllarin, dhe jo Arta Vorpsin, që u zgjodh automatikisht nga KED si anëtare për në Gjykatën Kushtetuese, pasi Meta nuk u shpreh brenda afatit ligjor 30 ditë. Vorpsi, në vend të së cilës u zgjodh me dekret Xhaferllari dhe u betua në presidencë ende pa u botuar dekreti në Fletoren Zyrtare, ditën e sotme i kërkoi Gjykatës Kushtetuese t'i njohë mandatin. Kështu, me reagimin e sotëm, Gjykata Kushtetuese në mënyrë indirekte i jep përgjigje edhe kësaj kërkese të Arta Vorpsit duke thënë se nuk mund ta shqyrtojë në mungesë të kuoruimit. 

"I jam drejtuar zyrtarisht Gjykatës Kushtetuese dhe drejtueses së saj dhe po pres fillimin edhe administrativisht të marrëdhënieve të punës", shkruante Vorpsi, ndërsa duhet theksuar se në këtë situatë, kryetare aktualisht është anëtarja më e vjetër e Gjykatës, Vitore Tusha.

Duke ju referuar këtij reagimi të fundit, Gjykata Kushtetuese ka 5 anëtarë, Vitore Tusha të cilës i ka mbaruar mandati dhe pret zëvendësimin, Besnik Muçi i zgjedhur i pari nga Meta (pa kaluar të dyja shkallët e vettingut pasi më 21 nëntor del para Kolegjit të Apelimit), dhe tre të betuarat mbrëmë, Elsa Toska, Fiona Papajorgji dhe Marsida Xhaferllarin. Për të pasur kuorumin Kushtetueses i duhen 6 nga 9 anëtarë.

Sot, Marsida Xhaferllari ka shkuar në punë si anëtare e Gjykatës Kushtetuese dhe eshtë pajisur me zyrë nga Administrata. Ndyshe ka ndodhur me Arta Vorpsin e cila ka shkuar në Gjykatën Kushtetuese si këshilltare.

Njoftimi i Gjykatës Kushtetuese

Jemi njohur me Rezolutën e miratuar nga Kuvendi i Shqipërisë sot, në datën 15.11.2019, për “Shmangien e krizës kushtetuese me synim legjitimitetin e Gjykatës Kushtetuese – detyrë imperative e organeve më të larta të shtetit”. 

Në citim të Kushtetutës, Gjykata Kushtetuese e Shqipërisë zgjidh mosmarrëveshjet kushtetuese dhe bën interpretimin përfundimtar të saj. Gjykata Kushtetuese i nënshtrohet vetëm Kushtetutës.

Për sa më sipër, lidhur me Rezolutën e miratuar nga Kuvendi i Shqipërisë, Gjykata Kushtetuese sqaron se, edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj. Për këtë arsye ajo nuk mund të ushtrojë kompetencat e saj thelbësore apo juridiksionale lidhur me zgjidhjen e konfliktit të kompetencave midis pushteteve apo organeve kushtetuese, si dhe as ato kompetenca që lidhen me shqyrtimin e kushtetutshmërisë së akteve të nxjerra nga organet e pushtetit publik.

Në këto kushte, Gjykata Kushtetuese si një institucion i pavarur, duke zbatuar Kushtetutën dhe ligjin e saj organik dhe legjislacionin në fuqi, si dhe praktikat administrative të ndjekura ndër vite, me qëllim sigurimin e kushteve normale për mbarëvajtjen dhe mirëfunksionimin e veprimtarisë së saj, është duke ndërmarrë të gjitha hapat e nevojshme administrative formale për fillimin e detyrës së tri anëtarëve të rinj, pas betimit të tyre para Presidentit të Republikës.

G.M./Shqiptarja.com

TAG:
• gjykata kushtetuese