TIRANE-Komisioni i Pavarur i Kualifikimit vendosi shkarkimin e gjyqtares së Kushtetueses Altina Xhoxhaj. Edhe pse solli prova të reja, Komisioni deklaroi sot se gjyqtarja nuk e kalon procesin e Vettingut, pasi nuk justifikon pasurinë.

Komisioni mori në shqyrtim dokumentacionin, kreu kontrollin, hetim administrativ, dëgjoi subjektin  dhe mori në konsideratë llogaritjen e likuiditetit bazuar në deklaratat e subjektit. Seancën e konsiderojmë të përfunduar dhe procesin e rivlerësimit. Në përfundim trupa gjykuese vendosi; Me shumicë votash shkarkimin nga detyra të Altina Xhoxhajt, gjyqtare në Gjykatën Kushtetuese

Vendimi i Komisionit të Pavarur të Kualifikimit

KPK në seancën e parë arriti në konkluzionin se Xhoxhaj ka bërë deklarime të pavërteta dhe nuk justifikon burimin e të ardhurave të saj për apartamente e truall në Tiranë dhe te Gjiri i Lalzit, si dhe nuk justifikon shumën prej 4.4 milionë lekë. Altina Xhoxhaj duket se e ka pritur këtë vendimmarrje, pasi ndryshe nga hera e parë sot nuk ishte e pranishme duke zgjedhur që të përfaqësohet me avokatin.

Me shkarkimin e anëtares Altina Xhoxhaj, gjykata Kushtetuese mbetet me katër anëtarë duke mos marrë asnjë vendim.  Më herët u shkarkua gjyqtari Fatos Lulo, Besnik Imeraj dha dorëheqjen, ndërsa vetëm Vitore Tusha e kaloi. Javën tjetër para Vettingut do të dalë gjyqtari tjetër i Kushtetueses Fatmir Hoxha.  Sot Komisioni i Pavarur i Kualifikimit dha edhe një tjetër vendim për prokuroren  Fatjona Memçajn, e cila e kaloi duke u rikonfirmuar.