Organizohet në MPJ konferenca “Shërbimi publik dhe administrata publike në shtetin e së drejtës në Evropë”

Qendra e Ekselencës në Ministrinë e Punëve të Jashtme në bashkëpunim me Ministrinë e Shtetit për Inovacionin dhe Administratën Publike dhe Ministria e Decentralizimit dhe Administratës Publike të Republikës Franceze organizuan sot konferencën "Shërbimi publik dhe administrata publike në shtetin e së drejtës në Evropë".
Në fokus të aktivitetit ishte forcimi i bashkëpunimit me Administratën Publike franceze dhe shkëmbimin e eksperiencave me qëllim zhvillimin e praktikave më të mira për reformimin, konsolidimin dhe modernizimin e administratës publike shqiptare në përputhje me prioritet kyçe në kuadër të procesit të anëtarësimit në BE.
Në kuadër te vizitës zyrtare dy Ministret Harito dhe Lebranchu nënshkruan Marrëveshjen Administrative për Administratën Publike mes Ministrisë për Inovacionin dhe Administratën Publike të Shqipërisë dhe Ministrisë së Decentralizimit dhe Administratës Publike të Republikës Franceze.
Kjo marrëveshje ka si qëllim forcimin e bashkëpunimit me Administratën Publike të Republikës së Francës në kuadër të reformës së administratës publike duke përfshirë aspekte institucionale, juridike, teknike, administrimin e burimeve njerëzore, sistemet e vlerësimit të performancës së nëpunësve dhe sistemin e informatizuar të administrimit.
Në fjalën e tij në Konferencë, Ministri Bushati u shpreh se, "Shqipëria, si një vend që aspiron anëtarësimin në BE, ka ndërmarrë hapa të rëndësishëm në përmirësimin e shërbimit publik. Në rrugëtimin tonë drejt shtet-ndërtimit demokratik kemi nevojë për përvojën e vendeve me institucione të konsoliduara. Çka duhet të përftojmë nga përvoja franceze e shërbimit publik që ENA mishëron si koncept global i formimit të nëpunësit civil nuk është doemos një metodë për të përftuar elita, por një udhërrëfyes për të ngritur përgjegjshmërinë, paanshmërinë dhe efiçencën e pandërprerë të administratës në parime individuale. Vetëm duke punuar mbi individin që lakmon shërbimin e Shtetit, mund të arrijmë në një Shtet aq të paanshëm sa të miklohet vetëm nga interesi i përbashkët". /atsh/