Kryeministria ka anuluar tryezën e konsultimit për pagat e magjistratëve, e parashikuar të mbahej sot, pasi magjistratët refuzuan të merrnin pjesë. GJKKO, Gjykata e Lartë, Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve thonë se nuk morën pjesë në diskutimet për një skemë të re pagash, pasi ligji i ri që u miratua nga Kuvendi tashmë është dërguar në Gjykatën Kushtetuese dhe se duhet pritur vendimmarrja e saj përpara se kjo çështje të diskutohet me qeverinë.

Megjithatë, magjistratët theksojnë se refuzimi i kësaj tryeze nuk nënkupton mbylljen e dialogut mes institucioneve. Në një përgjigje drejtuar Kryeministrisë, kreu i Gjykatës së Lartë Sokol Sadushi thotë se në kushtet kur çështja e pagave të magjistratëve është në duart e Gjykatës Kushtetuese, diskutimi për këtë temë do të ishte i pavend.

“Për një çështje kushtetuese tashmë të shtruar për gjykim, fjala i përket Gjykatës Kushtetuese. Për rrjedhojë, dialogu për këtë objekt mund të jetë substancial dhe efektiv pasi ajo të jetë shprehur”, thuhet në përgjigjen e Gjykatës së Lartë.

Ndërsa GJKKO, në një reagim për Report Tv sqaron se i ka kthyer përgjigje Kryeministrisë se nuk marrin pjesë në atkim, pasi janë në pritje të vendimit të Kushtetueses.

“Ditën e premte më datë 25.09.2026 GJKKO i ka kthyer përgjigje zyrtare që nuk do të marrë pjesë në takim pasi është në pritje të vendimit të Gjykatës Kushtetuese”, thuhet në reagimin e GJKKO.

Të njëjtin argument sjell edhe Unioni i Gjyqtarëve të Shqipërisë si edhe Shoqata Kombëtare e Gjyqtarëv, të cilat thotë se nuk mund të marrin pjesë në një tryezën për pagat deri në përfundimin e procesit të nisur nga shoqatat e magjistratëve në Kushtetuese.

“Deri në një vendimmarrje të Gjykatës Kushtetuese në lidhje me padinë e paraqitur nga shoqatat e magjistratëve, është e pamundur për ne pjesëmarrja në tryezën e konsultimit të datës 28 shtator 2026”, thotë Unioni i Gjyqtarëve.

“Shoqata vlerëson se nuk do të ishte e përshtatshme pjesëmarrja e saj në një diskutim institucional mbi të njëjtën çështje përpara përfundimit të këtij procesi”, thekson Shoqata Kombëtare e Gjyqtarëve.

Në të njëjtën linjë është Shoqata e Prokurorëve, e cila kërkon që tryeza të shtyhet deri në një qëndrim të Gjykatës Kushtetuese, në mënyrë që diskutimi me qeverinë të zhvillohet mbi një kuadër të qartë kushtetues.

“Duke pasur parasysh se çështja objekt i konsultimit lidhet drejtpërdrejt me një proces kushtetues të iniciuar nga shoqatat e magjistratëve pranë Gjykatës Kushtetuese, kërkojmë që një tryezë e tillë të vlerësohet të zhvillohet pas një qëndrimi të Gjykatës Kushtetuese mbi çështjen”, thotë Shoqata e Prokurorëve.  

Kryeministria lë të hapur mundësinë për zhvillimin e takimit në një datë tjetër, por magjistratëve ua bën të qartë se puna për hartimin e ligjit të ri për pagat do të nisë nga nesër.

"Duke ju falënderuar për komunikimin dhe sqarimet e përcjella lidhur me kërkesën për shtyrjen e takimit të sotëm, mirëkuptojmë këtë kërkesë, ndonëse vlerësojmë se dialogu dhe bashkëpunimi ndërinstitucional ndërmjet aktorëve të ndryshëm të sistemit të drejtësisë mbetet i rëndësishëm dhe, në parim, i pavarur nga procese të tjera që mund të zhvillohen paralelisht.

Në çdo rast, mbetemi të hapur për vijimin e dialogut dhe për dakordësimin e një date tjetër për zhvillimin e takimit. Dëshirojmë t'ju bëjmë me dije se duke filluar nga dita e nesërme, do të vijojmë punën për hartimin e ligjit të ri mbi pagat, mbi të cilin ishte përgatitur edhe një parashtrim i përgjithshëm, me synimin për ta shtruar si pjesë të diskutimit dhe dialogut të përbashkët gjatë takimit. Duke ju falënderuar për bashkëpunimin, mbetemi në pritje të dakordësimit për një datë të përshtatshme për vijimin e dialogut", thuhet në Përgjigje. 

Shoqatat e ndryshme të magjistratëve iu kundërvunë hapur qasjes së shumicës, e cila nuk ndërmori asnjë veprim që të miratonte një formulë të re brenda 31 korrikut të këtij viti, siç udhëzonte Gjykata Kushtetuese. KLGJ dhe KLP ndërmorën vendime të posaçme duke miratuar ato vetë nivelin e pagave për muajin gusht, duke iu referuar vendimit të GJK. Situata çoi në një përplasje mes ekzekutivit dhe institucioneve të Drejtësisë. Ministria e Financave nuk miratoi veprimet e Thesarit për kalimin e pagave sipas vendimeve të KLGJ dhe KLP-së. Magjistratët u përgjigjën duke kallëzur në SPAK, ministrin e Financave dhe duke vënë në lëvizje gjykatën administrative e cila urdhëroi anullimin e vendimit të ministrit, dhe kalimin e pagave për gjykatat e prokuroritë në të gjithë vendin.

Në parlament, shumica miratoi më 18 shtator, me 84 vota pro formulën e re të pagave të magjistratëve që përcakton se paga referuese e magjistratëve do të jetë sa 38% e pagës së Presidentit të Republikës nga 36% që ishte, me një rritje prej rreth 8500 lekësh. Rritja me 8500 lekë e pagës referencë është 9-fish më e vogël se ajo që vetë magjistratët thonë se ka vendosur GJK. Tre ditë më pas, më 21 shtator, shoqatat e gjyqtarëve dhe prokurorëve dorëzuan në Kushtetuese kërkesën për pezullimin e formulës së miratuar nga parlamenti dhe shfuqizimin e saj. Relator i çështjes është caktuar Sandër Beci dhe kërkesa e magjistratëve do të shqyrtohet në Kolegjin me anëtarë Sandër Beci, Fjona Papajorgji dhe Sonila Bejtja, që çështja të trajtohet duhet që të tre të votojnë unanimisht.