VIDEO/ Papa pritet me entuziazëm në Ditën Botërore të Rinisë në Lisbonë

Në paraqitjen e tij të parë publike në kryeqytetin e Lisbonës me rastin e Ditës Botërore katolike të Rinisë papa Francesku u brohorit me entuziazëm nga të rinjtë si të ishte një rockstar.

Gjatë takimit të kreut të Kishës Katolike me pjesëmarrësit në qendër të Lisbonës mbizotëronte një frymë e çlirët dhe të rinjtë valëvisnin flamujt e vendeve nga kishin ardhur. Dhjetra mijëra pelegrinë kishin pritur me orë të tëra mbërritjen e papës. Shumë pjesëmarrës kërcenin e këndonin nën shoqërimin e muzikës që buçiste nga altoparlantët. Autoritetet portugeze bëjnë fjalë për rreth 500.000 pjesëmarrës.

Në fillim të Ditës Botërore katolike të Rinisë në Portugali papa takoi 13 të mbijetuar nga dhuna e abuzimeve seksuale prej etërve shpritërorë. Papa, sipas Vatikanit, "ka dëgjuar me intensitet rrëfimet e tyre" Sipas një raporti të komisionit të pavarur në Portugali që nga viti 1950 janë abuzuar nga pjesëtarët e kishës, kryesisht nga priftërinjtë, të paktën 4815 fëmijë.

Sipas "Vaticannews" në fjalën e tij në këtë takim papa ka theksuar, se britmat e dhimbjes së viktimave duhet të dëgjohen gjithmonë.

Në Ditën Botërore të Rinisë, eventi më i madh katolik në botë, priten rreth një milionë pjesëmarrës, kryesisht të rinj. Programi gjashtë ditor përmban veprimtari të shumta kulturore dhe diskutime si dhe orë lutjeje dhe mesha.

Në programin e papës 86 vjeçar gjatë këtij eventi madhështor janë rreth 20 dalje publike dhe takime. Papa u takua edhe me 15 të rinj nga Ukraina, të cilëve ai u siguroi se do t'u qendrojë pranë, sikurse vë në dukje Vatikani.

Në një fjalim përpara studentëve, papa u bëri thirrje akademikëve të rinj për angazhim shoqëror.Të shtunën (05.08) kreu i Kishës Katolike do të vizitojë vendin e shenjtë Fatima në veri të Lisbonës. Të dielën papa do të mbajë në një park në periferi të Lisbonës meshën përmbyllëse të Ditës Botërore të Rinisw./DW

M.T/r.k./Shqiptarja.com

TAG:
• papa Francesku
• Lisbone
• kisha katolike