Çdo shqiptar do të ‘fusë’ në portofolin e tij çdo ditë mesatarisht 33 euro, përgjatë 12 muajve të ardhshëm, me rritje prej gati 2 euro krahasuar me një ditë të 2025-ës. Ky është parashikimi i bërë nga Ministria e Financave në projektbuxhetin e 2026-ës, ku është planifikuar që të ardhurat për frymë të arrijnë në 991 euro në muaj.

Në relacionin e buxhetit 2026 thuhet se të ardhurat për frymë do të kapin vlerën e 11 mijë e 899 euro nga 11 mijë e 260 euro këtë vit, me rritje prej 639 euro. Ky përmirësim sipas qeverisë do të vijë nga rritja ekonomike e parashikuar në 4%, ulja e nivelit të papunësisë në 7.6% nga 8.5% aktualisht, si dhe nga rritja e pagave. Mbi këto pritshmëri, qeveria pret edhe shtim të konsumit, si një nga kontribuuesit kryesor të rritjes ekonomike të vendit.

Me ambicien për të shtuar jo vetëm shifrat në sasi por edhe ato në vlerë të turistëve, pra jo vetëm numrat e pushuesve por edhe të ardhurat që vijnë prej tyre, qeveria beson se turizmi do të jetë kontribuuesi kryesor në rritjen ekonomike të pritshme në 4% në vitin që vjen. Rol të rëndësishëm do të ketë edhe sektori i ndërtimit, i cili po njeh hov jo vetëm në më shumë kantiere të reja por edhe në çmime.

Prodhimi i Brendshëm Bruto në 2026-ën planifikohet në rritje me 1.4 miliardë euro, nga 26.9 miliardë euro këtë vit në 28.3 miliardë euro në vitin që vjen. Shqiptarët do të jenë më të pasur se këtë vit, por do të kenë edhe më shumë borxhe për të paguar. Borxhi publik në 2026-ën do të jetë sa 53.6% e Prodhimit Kombëtar, ose 15.1 miliardë euro. Nëse këtë vlerë e përpjesëtojmë me 2.4 milionë banor që ka Shqipëria, rezulton se çdo qytetar ngarkohet me borxh afro 6,314 euro.

 

TË ARDHURAT VJETORE PËR BANOR
Viti 2025   11,260 euro
Viti 2026   11,899 euro
Diferenca     +639 euro
 
BORXHI PUBLIK NË RAPORT ME PBB
Viti 2025     54.1%
Viti 2026     53.6%
Rënia           -0.5%
 
PRODHIMI I BRENDSHËM BRUTO
Viti 2024      25 mld euro
Viti 2025   26.9 mld euro
Viti 2026    28.3 mld euro