3 orë protestë/ Militantët breshëri kapsollësh drejt policisë, Basha-Ramës: Dëgjoje popullin më 8 qershor (VIDEO)

Ish-deputeti demokrat Bardh Spahia ka ngritur pretendimet se protestuesit sot janë plagosur nga plumbat. Por pas publikimit të grafisë së tij, e cila vërteton se ai është plagosur nga një fishkezjarre, ai është penduar dhe ka ndryshuar postimin. Më pas ai ka ndryshuar postimin duke hequr fjalët "Nga gazi lotsjellës në plumba".

13 të lënduar në protestën e opozitës morën ndihmën mjekësore në kohë.

Ministria e Shëndetësisë dhe Mbrojtjes Sociale informon se pranë Spitalit Universitar të Traumës, mbrëmjen e sotme janë paraqitur 10 punonjës të policisë, me plagë dhe dëmtime të shkallëve të ndryshme, të shkaktuara nga goditjet prej lëndëve piroteknike.

Po prej lëndëve piroteknike, kanë mbërritur në urgjencë dhe kanë marrë menjëherë ndihmën e parë mjekësore edhe 2 qytetarë në spitalin e Traumës, pjesëmarrës në protestë.

Ndërsa 1 protestues po merr trajtimin e duhur mjekësor në urgjencën e Qendrës Spitalore Universitare “Nënë Tereza”.

Disa efektivë mbetën të plagosur nga shpërthimi i kapsollave dhe fishekzjarreve, duke marrë dëmtime në kokë dhe trup. Të tjerë u goditën me mjete të forta.

Ekipet e Urgjencës Kombëtare dhe spitaleve universitare kanë qenë në gatishmëri të plotë gjatë të gjithë protestës së zhvilluar mbrëmjen e sotme.

Dy efektive të dëmtuar tek Kuvendi duke marrë ndihmën e shpejtë

Oficerët e policisë të plagosur:
1.    A.Ç 31 vjeç lënduar në kokë dhe afër syrit 
2.    E.B 32 vjeç, lënduar në shpatull 
3.    I.A 23 vjeç
4.    GJ.GJ 26 vjeç
5.    ZH.B 37 vjeç
6.    J.C 38 vjeç
7.    N.S 27 vjeç
8.    F.M 32 vjeç
9.    G.M 31 vjeç
10.    S.B 37 vjeç

Protestuesit e plagosur:
1.    E.P 29 vjeç, lënduar në këmbën e majtë 
2.    J.M 42 vjeç

Ish-deputeti demokrat Bardh Spahia bëri një deklaratë kontradiktore nga spitali i Traumës ku tha se policët janë lënduar për shkak se janë vënë në protestë pa veshje mbrojtëse ndërsa nga ana tjetër deklaroi se ata nuk ishin dëmtuar vërtetë por kanë bërë një shfaqje para ministrit Lleshaj.

"Si e keni pas rastin ta shini policët vihen përballë një turme protestuesish të revoltuar. Dalin të paveshur me veshje mbrojtëse. Shumica e policëve sapo ka ikur ministri kanë dalë nga krevatet. Plagët e tyre nuk ishin të rënda. Protestuesit janë të plagosur seriozisht, janë persona që kanë vuajtur në kurriz sulmet me urdhër të Lleshajt dhe Ramës. E vetmja mënyrë për të përballuar këtë situatë është revolta e cila sa vjen dhe shtohet. Kjo qeveri i ka orët e numëruara, Revolta njeh një përshkallëzim të jashtëzakonshëm. Qytetarët shqiptarë që kanë humbur shpresën kanë zgjedh të përballen dhe revolta është pak. Nëse nuk vendosin të reflektojnë përgjigjen do e marrin nga qytetarët e thjeshtë", tha Spahia.

Nga spitali i Traumës, ku ka vizituar të plagosurit në protestën e sotme, ministri i Brendshëm Sandër Lleshaj i ka bërë thirrje liderit demokrat Lulzim Basha që të distancohet nga dhuna.

"Sapo përfundova një vizitë te punonjësit e policisë dhe protestuesit e plagosur. Është për të ardhur keq për këtë sulm të dhunshëm ndaj policisë. Përpjekja për të krijuar dhunë është e dështuar. I bëj thirrje edhe Bashës, si personi i cili ka prodhuar 4 të vrarë dhe dhjetra të plagosur, të distancohet nga dhuna, ta izolojnë atë. Të gjithë të plagosurit kanë mbetur të lënduar nga mjetet piroteknike", tha Lleshaj.

Opozita do të mbajë protestën e ardhshme, ditën e shtunë në datë 8 qershor, ora 19:00.

Ish-kreu i grupit parlamentar të LSI Petrit Vasili ka mbyllur protestën i vetëm në selinë e LSI, ndryshe nga protestat e mëparshme kur kryetarja e LSI, Monika Kryemadhi është bashkuar me liderin demokrat për të mbyllur tubimin nga selia e PD.

"Edi Rama shënoi orët e fundit e tij. Ai do të na khejë në monizëm me vetëm një parti. Ai sot u kthye në vendin e krimit në Lezhë ku pak ditë më parë ka firmosur 300 milionë euro grabitje. Të majtë dhe të djathtë nuk e duan monizmin. Ndaj sot jemi të gjithë pa asnjë kthim prapa. Rama është një kryeministër i paligjshëm. Shqiptarët do luftojnë dhëmbë për dhëmbë me kriminelët. Mirënjohje pa fund për qytetarinë që treguat. Prandaj ashtu si kishim këtë herë akoma më shumë në protestën tjetër do i japim fund kësaj krize", u shpreh Vasili.

Lideri demokrat Lulzim Basha rreth orës 22:00 mbylli në selinë e PD-së protestën e shtatë të opozitës joparlamentare kundër qeverisë, duke paralajmëruar se tubimet nuk do të ndalen nëse kryeministri Edi Rama nuk shkon në zgjedhje të parakohshme. Basha paralajmëroi se protesta e radhës do të jetë më e ashpër se çfarë ndodhi sot. "Dëgjoja zërin popullit në protestën e ardhshme", tha lideri demokrat. Kryedemokrati nuk caktoi një datë për tubimin e radhës, por theksoi se kjo është një betejë e popullit që nuk do të ndalet.

Basha tha se policia plagosi protestuesit, kur nw fakt siç u faktua edhe nga spitali, njëri prej tyre mbeti i palgosur rëndë në këmbë nga shpërthimi i mjeteve piroteknike që hodhën vetë militantët.

"Së pari dua t’u falenderoj nga zemra për qytetarinë dhe shpirtin e qëndresës dhe vendosmërinë që kishit sot. Ishte më e madhe që ka parë Shqipëria dhe Evropa. Vëllezër dhe motra, qindra mijë prej jush në në këtë protestë sollët me vete, energjinë dhe vendosmërinë tek e nesërmja e re që po lind. Mesazhi i qartë dhe i prerë është se Rama dhe banda e tij kriminale, mund të mbajnë me dhunë pushtetin e tij.

Edi Rama dhe banda e tij ta harrojnë se Shqiptarët do lejojnë mbajtjen e pushtetit me dhunë. Ne kemi bërë gjithçka që asnjë punonjës i policisë të mbetej i plagosur, nuk e kam fjalën për ata horra që hodhën gaz. Pavarësisht përpjekjeve tona, përgjigja e horrave ishte dhunë dhe kanë plagosur disa protestues. I them Ramës dhe sejmenit të tij zuzar dhe sadist që të heq dorë nga dhuna. I them se ai do të marr përgjigjen e duhur. Është mahniste për një popull të tërë të bashkuar kështu, me vlerën e qartë Evropiane. Ne nuk do të hedhim asnjë hap pas, e sotmja është dita e fundit që unë i drejtohem me forcën e argumenteve pasi fjalët po mbarojnë. Në protestën e ardhshme nuk do të ketë më fjalë, por fjalën do ta keni vetëm ju. 

Largohu, ose ndryshe ndjeja zërin popullit në protestën e ardhshme. Hapi rrugë votës së lirë. Zgjedhje të lirë dhe të ndershme. Lërë sovranin të flasë me votë, ose dëgjoja zërin popullit në protestën e ardhshme. Ta bëjmë Shqipërinë si gjithë Evropa. Zoti ju bekoftë. Kështu të gjithë edhe më të vendosur supë më supë me njëri-tjetrin, ballëlartë, le ta çojmë këtë betejë drejt fitores së popullit.  Mirë u takofshim në protestën e ardhshme", tha Basha duke ju drejtuar simpatizantëve që e shoqëruan në selinë e Partisë Demokratike.

Përveç protestuesve, policia i ka bërë thirrje edhe liderëve politikë edhe medies, që të distancohen nga zona ku janë shfaqur tensione për shkak të hedhjes së hërëpashershme të kapsollëve.

Ish-kryeministri Sali Berisha ka inkurajuar protestuesit që të vijojnë qëndresën. Ai thotë se do të vijojë protesta deri në fitore. Ish kryeministri e ka cilësuar Ramën si të ngordhur dhe se shumë shpejt do ta përmbysë.

“Protesta do të vazhdojë deri në fitore. Protesta do të vijojë deri në rrëzimin e regjimit që e ka shndërruar Shqipërinë në vendin ku çdo 3 ditë zhduket një fëmijë; që e ka shndërruar në epiqendër të krimit dhe drogës.  Antimitingjet e Ramës ngjasojnë me kortezhe të përmortshme. Rama është politikisht i ngordhur”, shprehet Berisha. 

Kur u pyet mbi deklaratat e sotme të Stoltenberg që kërkonte dialog nga palët, Berisha u përgjigj: “Sigurisht dialog, por Rama nuk njeh gjuhën e dialogut, por gjuhën e dajakut. Në lidhje me ndikimin rus, Stoltenberg e di që Rama i ka dhënë naftën mikut të ngushtë të Putinit, edhe bankat”, nënvizon Berisha. 

Luftë me ujë breshërisë së kapsollëve nga militantët, policia detyrohet të përdorë gazin lotsjellës. Militantët kanë hedhur në drejtim të policisë kapsollë dhe mjete të forta shpërthyese. Qindra fishekzjarrë të shpërthyese nga militantët që i drejtonin kapsollët dhe sendet shpërthyese direkt në drejtim të efektivëve. Policia hodhi fillimisht ujë me presion ndaj tyre nga autoboti, por nuk pati tërheqje nga ana e protestuesve. Kjo bëri që policia të detyrohet të hedhë gazin lotsjellës.

Jo vetëm të rinj, por edhe fëmijë të moshave 10-12 vjeç, janë parë përpara kuvendit, duke u përpjekur të shkaktojnë tensione. Ata kanë hedhur kapsolla duke u përpjekur të heqin me forcën edhe gardhin metalik të vendosur aty nga forcat e policisë. Ndërsa vetë liderët e opozitës nuk janë parë përpara Kuvendit. Fakti që sulmet me kapsolla janë bërë nga fëmijët, edhe forcat e policisë të mos ndërhyjnë për t'i larguar me forcë për të mos cënuar sigurinë e tyre.

Policia i ka bërë thirrje të drejtëpërdrejtë liderit demokrat Lulzim Basha që të ndalojë incidentet, por ai nuk është parë pranë protestuesve. 

"Ruani qetësinë, ruani gjakftohtësinë. Mos hidhni lëndë piroteknike, fishekzjarre, kapsolla, tymuese dhe sende te forts në drejtim të punonjësve të Policisë. Hedhja e kapsollave, sendeve te forta  dhe lëndëve piroteknike po  rrezikon jetën e punonjësve të Policisë

Të nderuar organizatorë të tubimit: 
I nderuar zoti  Lulzim Basha dhe z. Gazmend Bardhi Merrni masa të menjëhershme që protestuesit te nderpresin veprimet e dhunshme. Po demtoni e rrezikoni jeten e punonjesve te policise.

Si organizatorë të protestës, jeni përgjegjës përballë ligjit për mbarëvajtjen paqësore të tubimit, ndaj menjëherë merrni masa që protestuesit të ndalojnë hedhjen e kapsollave dhe lëndëve piroteknike, sendeve te forta në drejtim të Policisë", thuhet në thirrjen e policisë.

Një protestues para Kuvendit është plagosur. Ai ka pësuar dëmtime të forta në pjesën e gjurit. Disa protestues të tjerë janë afruar pranë tij duke i lidhur këmbën që të ndalohet gjakderdhja. Dëmtimet e tij kanë ardhur për shkak të kapsollave që janë hedhur pak më parë në zonën para Kuvendit.

Kjo eshte nje copë e fishekzjarrit që eshtë nxjerrë nga këmba e protestuesit, çka tregon se ai eshte lenduar nga shperthimi i mjete pirroteknike qe militantet leshuan ndaj policise.

Grafia e kembes se protestuesit te plagosurit, pjeset e mjeteve shperthyese te mbetura ne kemben e tij

Edhe Ministria e Shëndetësisë dhe Mbrojtjes Sociale informoi se qytetari me inicialet E.B., 29 vjeç, i lënduar gjatë protestës ka marrë ndihmën e duhur mjekësore në spitalin Universitar të Traumës. Nga ekzaminimet e kryera, përkatësisht radiografia e kërcirit dhe këmbës, rezulton normale, pa dëmtime të strukturave. Nga plaga e marrë, mjekët kanë nxjerrë cifla mjetesh piroteknike.

Aktualisht 29-vjeçari ka përfunduar trajtimin dhe është në gjendje të mirë shëndetësore.

Teksa kanë mbërritur përpara parlamentit, protestuesit e opozitës kanë krijuar disa momente tensioni duke hedhur tymuese, flakadanë dhe kapsolla në drejtim të godinës së Kuvendit. Ajo që bie në sy është fakti se personat të cilët janë munduar të krijojnë incidente janë të rinj të cilët kanë hequr edhe bluzat duke i vënë në kokë për të mos u identifikuar.

Policia në këtë protestë, ndryshe nga ato më para ka zhvendosur kordonin e sigurisë ndërkohë që në gatishmëri është parë edhe autoboti i ujit, i cili do të përdoret në rast se situata do të agravojë.

Ndërsa drejtuesit politikë të opozitës nuk janë parë përpara Kuvendit, ndërkohë që pak më parë lideri demokrat bëri thirrje për të marshuar drejt godinës së seancave plenare.

Pas Jorida Tabakut, një tjetër ish-deputete e opozitës është shfaqur në protestë me barkun e rrumbullakosur. Ajo është ish-deputetja e LSI, Klajda Gjosha e cila në nisje të protestës është parë krah përfaqësuesve të tjerë të opozitës.

Gjosha e cila është në pritje te fëmijës së dytë, e pyetur nga gazetarët se si ka mundësi që del në protestë tha: Nuk trembem nga asgje dhe askush! Njesoj si une, jane dhjetëra nëna të tjera shtatëzane dhe me fëmijë për dore. Ne fund te fundit kjo është kauzë për fëmijët tani dhe jemi të vendosur t'i shkojmë deri në fund!

Ish-kryeministri Sali Berisha është shfaqur në protestën e sotme të opozitës. Ai është parë me dy gishta lart në mes të tymit të krijuar nga flakadanët e hedhur nga protestuesit.

Lideri demokrat Lulzim Basha ka përmbyllur fjalimin e tij përpara kryeministrisë dhe i ka bërë thirrje protestuesve ta ndjekin drejt parlamentit. Ai i ka kërkuar atyre që të ndezin dritat e celularëve, duke i quajtur ato drita shprese, për të marshuar më pas drejt sallës së seancave plenare.

Teksa kryetarja e LSI, Monika Kryemadhi ndodhet në një vizitë jashtë vendit, është Petrit Vasili ai që udhëheq protestën e Lëvizjes Socialiste për Integrim. Vasili thotë se ky është paralajmërimi i fundit se po të dojë mund të rrëzojë edhe 20 Edi Rama.

“Mijëra njerëz janë në shesh, kanë ardhur nga çdo cep i vendit, për ti dhënë përgjigje kujt do që do të kthejë Shqipërinë në çifligun e tij. Në dy javët e fundit, kanë grabitur mbi 400 milionë euro nga xhepat e qytetarëve”, u shpreh Vasili. Sa i përket skenarit të opozitës, Vasili u shpreh: “Fuqi e pafund e qytetarëve dhe hap pas nuk ka. Këto paralajmërime janë të fundit. Kjo fuqi merr përpara edhe 20 Edi Rama”, tha ai.

Kur militantët partiakë hodhën në breshëri kapsollë ndaj kryeministrisë, lideri demokrat Lulzim Basha u jepte zemër atyre duke mos thënë në asnjë moment të tërhiqen nga këto veprime. Kapsollë të shumtë, tymuese e mjete të tjera pirroteknike të hedhura në drejtim të kryeministrisë dhe pranë efektivëve që ruajnë institucionin në kordonin e parë. Më tej mbështetësit e opozitë joparlamentare çanë gardhin e hekurt që vihet para efektivëve. Nga ana e organizatorëve pati angazhim për të shmangur përplasjet mes militantëve dhe efektivëve,  mes të cilëve ishte edhe Sahit Dollapi, i cili në protestën e 11 majit u shoqërua nga policia dhe më tej u la i lirë. Policia bëri thirrje të vazhdueshme me megafon ndaj organizatorëve që të mos lejojnë dhunën, të distancohen nga dhuna.

Por kryedemokrati Lulzim Basha nga përfundimi i fjalimit të tij, u kujtua edhe për efektivët e policisë, të cilët rrezikohen nga veprimet e dhunshme të miliantëve. Kryedemokrati tha se i njeh shumicat prej tyre, duke kujtuar kohën kur ka qenë ministër i Brendshëm.

"Vëllezër e motra mos lëndoni asnjë oficer dhe efektiv policie. Mos prekni asnjë oficer policie. Vëllezër dhe motra, mos i prekni me dorë, sepse hiq dy a tre servilë të inkriminuar. Edhe pse buzët e tyre nuk e thonë dot, mendjet e tyre e mendojnë. Unë i njoh këta burra dhe gra, kam punuar me ta, kemi mundur drogën, kemi hequr vizat. Ata nuk flasin por shpirti i tyre këndon: Rama Ik", tha Basha.

Gjithë fjalimi i Lulzim Bashës para kryeministrisë është shoqëruar me momente të shpërthimit të kapsollëve. Por në një moment të caktuar, militantët nisën të hedhin në breshëri kapsollë ndaj kryeministrisë. Më tej u hodhën edhe tymuese, dhe mjete të tjera pirroteknike, ndërsa nuk mungoi thirrja e policisë për ruajtje të qetësisë dhe distancim nga këto elementë që në radhë të parë dëmtojnë vetë efektivët në kordonin e parë tek Kryeministria.

Më tej turma ka nisur t'i drejtohet policisë duke tentuar të heqë kordonin e gardhit metalik  para kryeministrisë.

Lideri demokrat Lulzim Basha ka bërë thirrje për një minutë heshtje për nder të besimtarëve myslimanë të cilët argjërojnë.

"Një minutë heshtje për vëllezërit dhe motrat tanë që argjërojnë. Bashkojmë lutjet tona që zoti ta bekojë këtë komb", tha Basha.

Një efektiv policie, A. Çelmeta 31 vjeç ka pësuar dëmtime në kokë nga një kapsollë që është hedhur përpara kryeministrisë. Ai ka humbur ndjenjat dhe është dërguar në spital ku po merr edhe ndihmën e parë mjekësore. Miliantët e opozitës hodhën njëherazi pa pushim një numër të madh kapsollësh drejt kryeministrisë duke rrezikuar efektivët në kordonin e parë.

Fjalimi i liderit demokrat Lulzim Basha para kryeministrisë çeli zyrtarisht protestën e shtatë të opozitës në orën 19:45. Fjala e kryedemokratit u shoqërua jo vetëm me ovacionet e mbështetësve që në kor thërrisnin "Rama ik", por edhe me zhurmën e vuvuzelave dhe shpërthimeve të disa kapsollëve.

Vazhdimisht gjatë fjalimit të tij, lideri i opozitës jokuvendore kërkoi mbështetjen e militantëve dhe simpatizantëve në tubim, që të therrasin "Rama ik". "Le ta dëgjojë tek bunkeri ku është fshehur. Bëjeni ta dëgjojë gjithë bota tani: Rama ik", ju drejtua Basha.

Më tej ai vazhdoi të radhisë sipas tij, arsyet përse duket larguar nga pushteti kryeministri Edi Rama.

"Zonja dhe zotërinj, të rinj dhe të reja që keni vërshuar në këtë marshim të paparë. Keni derdhur në shesh energji dhe vendosmëri. Dua t'iu shpreh mirënjohjen time dhe kam nderin dhe pirvilegjin të flas në emër të gjithë shqiptarëve të mbledhur të vendosur. Ky bashkim popullor është bashkimi i shqiptarëve të vjedhur, të shtypur, të dhunuar, të nëpërkëmbur, të tradhtuar nga një kryebandit që ka hyrë në histori si hajduti më i madh. Le ta dëgjojë zërin tuaj e gjithë bota tani. Sot endet nëpër Shqipëri kufoma politike e njeriut më të urryer që nga diktatura. Rama u kap duke vjedhur votat e shqiptarëve. Sot ai duhet të ishte para drejtësisë për të dhënë llogari. Rama ik është në buzët e çdo fëmije sepse Edi Rama i pushoi prindërit nga puna, i mbylli bizneset dhe i nisi në kurbet", u shpreh Basha.

Flamujt gjerman, të SHBA-ve, të Shqipërisë, PD-së e LSI-së, mbizotërojnë në protestën e opozitës para kryeministrisë.

Protestuesit e PD të mbledhur përpara kryeminitrisë kanë qëlluar sërish me bojë dhe flakandanë në drejtim të saj, gjatë kohës që lideri demokrat Lulzim Basha mbante fjalën e tij.

Sekretari organizativ i Partisë Demokratike, Sait Dollapi është shfaqur në protestën e shtatë kombëtare të opozitës kundër qeverisë.

Kjo është hera e parë që Dollapi shfaqet në një protestë që pas asaj të 11 majit. Ai u shoqërua nga policia, ku pësoi lëndime duke u shtruar në spitalin e Traumës pasi u rrëzua teksa vrapoi për t'ju larguar policisë para Parlamentit të Shqipërisë, ku kishte shpërthyer dhuna e mbështetësve të opozitës kundër policisë dhe institucioneve, me bomba molotov dhe mjete të forta. 

Por duket se tashmë është një një gjendje të mirë dhe qëndron në radhën e parë të protestuesve përpara kryeministrisë. Nga filmimet e bëra nga media në protestën e 11 majit, Sait Dollapi u pa teksa qëlloi me mjete të forta ndaj policisë.

Por këtë radhë, teksa simpatizantët çanë gardhin metalik para efektivëve tek kryeministria, Sahit Dollapi pati angazhim për të shmangur përplasjet mes militantëve dhe efektivëve

Kapsollë të shumtë, tymuese e mjete të tjera pirroteknike u hodhën në drejtim të kryeministrisë dhe pranë efektivëve që ruajnë institucionin në kordonin e parë, ndërsa më tej mbështetësit e opozitë joparlamentare çanë gardhin e hekurt që vihet para efektivëve.

Lideri demokrat Lulzim Basha i është bashkuar protestuesve në selinë e PD, për të marshuar drejt kryeministrisë, rreth orës 19:30, teksa kishte lajmëruar se protesta do niste në orën 19:00,

Nga selia e Lëvizjes Socialiste për Integrim, dolën ish-deputetët Petrit Vasili, Luan Rama, Floida Kërpaçi, Nora Malaj, Erisa Xhixho dhe Endrit Braimllari. Pa lideren e tyre, kryetaren e LSI-së Monika Kryemadhi, ata morën marshimin së bashku me mbështetësit e LSI-së drejt kryeministrisë për bashkimin në protestë. 

Deri në këtë moment, nuk ishte bërë asgjë publike në media, se kryetarja e LSI-së Monika Kryemadhi do të mungonte në këtë tubim të shtatë të opozitës kundër qeverisë. Megjithatë, kjo është hera e dytë, që Kryemadhi i mungon protestave. Edhe në një nga 7 protestat para kryeministrisë, ajo nuk ishte pasi zyra e shtypit njoftoi në moment të fundit ditën e protestës, se kryetarja e partisë ndodhej në një vizitë zyrtare në Shtetet e Bashkuara të Amerikës. Këtë radhë Shqiptarja.com mësoi se Kryemadhi ndodhet sërish jashtë shtetit, por nuk ka një njoftim zyrtar nga zyra e shtypit për vendndodhjen e saj dhe nëse bëhet fjalë për ndonjë vizitë zyrtare apo jo.

Degët e Partisë Demokratike nga rrethet dhe njësitë në Tiranë i janë bashkuar protestës para kryeministrisë duke ardhur të organizuar me grupe. Nuk mungon në këtë protestë edhe grupi i banorëve të zonës së "Astirit" të njohur pas protestave kundër projektit të Unazës së Madhe. Ata janë mbështetur nga PD-ja dhe LSI-ja në kauzën e tyre, dhe sa herë që ka protesta, nuk kanë munguar duke i dalë edhe ata në mbrojtje tubimit përmes së cilit kërkohet rrëzimi i qeverisë Rama. Banorët janë të veshur me jelekë portokallinj duke marrë shkas nga protestat që pati Franca me jelekverdhët.

Sali Lushaj, ish-truproja i Sali Berishës në kohën kur ishte kryeministër, ka marrë sërish pjesë në protestën e shtatë të opozitës kundër qeverisë. Lushaj është babai i këngëtarit të muzikës Rep, Arkimed Lushaj, njohur me emrin skenik "Stresi", i cili aktualisht ndodhet në burg i arrestuar për disa vepra penale.

Sali Lushaj merr pjesë për të disatën herë në protestën e PD-së, i kthyer tashmë në bensik të kauzës së opozitës për rrëzimin e kryeministrit Edi Rama.

Ndryshe nga radhët e tjera, Partia Demokratika ka zgjedhur si mënyrë të veçantë për të kërkuar largimin e kryeministrit Edi Rama, disa tollumbace të bardha. Në to shkruhet "Rama Ik". Nga fotot që sjell fotoreporteri Antonio Çakshiri, shihet momenti kur tollumbacet janë lëshuar në qiell, ndërsa në tarracën e kryeministrisë qëndrojnë forcat speciale të policisë për të garantuar mbarëvajtjen e protestës së opozitës jokuvendore. Ndërkohë, podiumi ku do të mbajë fjalën kryetari i PD-së Lulzim Basha para kryeministrisë, është i rrethuar me yje të verdhë, simbolin e flamurit të Bashkimit Evropian. Ndërkohë të rinjtë e Forumit Rinor të PD-së kanë vendosur në krah shirita të bardhë në shenjë "paqeje" për të mos lejuar përplasjes mes protestuesve dhe forcave të policisë. Ata vendosen si mburojë para kordonit të policisë.

Kreu i PD-së në Fier, Luan Baçi teksa organizonte simpatiznatët e opozitës në autobusë për të ardhur në protestën e Tiranës është shprehur se kryeministri, Edi Rama duhet që të japë dorëheqjen.

"Aksioni opozitar është në vazhdimësi. Rama bën mirë të japë dorëheqjen dhe të lërë presionet dhe shantazhet. Të lërë retorikën e tij të sëmurë burg, burg,burg se nuk i tremb dot qytetarët shqiptarë. Është mirë të mbledhë mendjen e të japë dorëheqjen për të mirën e PS dhe të qytetarëve shqiptarë. Protestat do të vijojnë, kjo e sotmja është më e fuqishme. Do të vijojmë deri në rrëzimin e tij dhe nuk ka asnjë shans të shkojë në zgjedhjet e 30 qershorit."

Përsa i përket listave të komisionerëve të PD-së një ditë më parë Baçi është shprehur: E dinim që nuk do ti pranonin. Shkuam për të parë sa serioz ishin në punën e tyre. Edhe ata janë të bindur që nuk do të shkojnë dot në 30 qershor. Do të japin dorëheqjen dhe do ti hapin rrugë një qeverie teknike dhe një qeverie që do të garantojë zgjedhje të lira dhe të ndershme.

Kur kanë mbetur rreth dy orë e gjysmë nga nisja e protestës së opozitës, lideri demokrat Lulzim Basha ka bërë një thirrje në rrjetet sociale një thirrje për pjesëmarrje në protestë. 

"Asnjë hap pas për çlirimin e vendit nga e keqja! Sonte në ora 19:00 të gjithë në shesh!", shkruan Basha

Kanë filluar të nisen drejt Tiranës autobusët e parë të organizuar nga opozita me mbështetës nga rrethet.

Përpara 'Selisë Blu' në qytetin e Beratit janë grumbulluar dhjetra mbështetës të PD-së e LSI- ku më pas janë nisur me autobusë drejt Tiranës për të protestuar në orën 19:00.

Ndërkohë raportohet se edhe nga Kukësi dhe qytetet e tjera kanë nisur organizimet për të ardhur në protestën e Tiranës. Disa prej simpatizantëve kanë mbushur autobusët e organizuar nga PD-ja ndërsa disa të tjerë kanë zgjedhur që të udhëtojnë drejt Tiranës me automjetet e tyre.

Ish- deputetja e Partisë Demokratike Albana Vokshi ka reaguar me anë të një postimi në rrjetin e saj social pak para protestës së thirrur nga opozita në orën 19:00.

Vokshi në reagimin e saj ka theksuar se opozita nuk do të bëjë asnjë hap pas nga ajo që quan 'çlirimin e vendit nga krimi'.

Në postimin, Vokshi ka shpërndarë edhe disa foto me fëmijë duke bërë me dije se në protestë do të ketë edhe fëmijë.

Postimi i Vokshit:
Sot, në protestë, për #fëmijët tanë, ora 19.00 para Kryeministrisë.

Asnjë hap pas, në betejën tonë për ta çliruar vendin nga vargonjtë e krimit, trafikut, korrupsionit.

Asnjë hap pas, për një vend ku politika të ketë në qendër kujdesin për fëmijët; ku të drejtat ligjore e kushtetuese të tyre të respektohen e të mos cënohen nga askush.

Për një Shqipëri plot shpresë për të ardhmen e fëmijëve tanë.

Për Një Shqipëri Si Gjithë Europa. Para Kryeministrisë. Ora19.00. Për Shqipërinë Si Gjithë Europa.

Ish-deputeti i Partisë Demokratike ka reaguar para protestës ku u bën thirrje mbështetësve të opozitës që në orën 19:00 të dalin në tubim për Shqipërinë.

Salianji reagimin e tij e nis me fjalët e Faik Konicës dhe më pas e mbyll duke thënë se do protestohet përpara selisë të së keqes, për liri dhe dinjitet.

Reagimi i Salianjit:

“Skllavëria si çdo pësim tjetër, pasi rëndon ca kohë në kurriz, bëhet në fund një zakon i pëlqyer, dhe ata që e mbajnë mbi zverk e durojnë me gëzim! Ata jo vetëm s’marrin vesh çdo me thënë liri por ndjejnë urrejtje për mbrojtësit e lirisë dhe ushqejnë respektin më të thellë për tiranët” thoshte Konica.

Sot larot e krimit nuk lenë kuisje pa përdorur për të mbrojtur pushtetin personal dhe milionat e Ramës dhe kopesë së tij kriminale, përballë kanë një popull që për liri ka sakrifikuar gjakun e mijëra martirëve, larot e krimit le ta gëzojnë mbi zverk nënshtrimin, qytetarët do të luftojnë për liri, liria për të zgjedhur është themelore.

Zgjedhjet janë dita kur populli vendos se kush meriton të zgjidhet mbi bazën e ofertave politike dhe jo dita kur pushteti do të imponojë me farsa formale se cilët do të vjedhin dhe diktojnë jetën e qytetarëve për 4 vitet e ardhshme! Sot, ora 19:00 të gjithë përpara selisë të së keqes, për liri, për dinjitet, për Shqipërinë si Evropa!"

Ish-deputeti i Lëvizjes Socialiste për Integrim, Petrit Vasili përmes një video të postuar në rrjetet sociale ku disa të rinjë protestojnë ka dhënë disa mesazhe pak orë para se të nisi tubimi i opozitës joparlamentare.

Vasili shkruan se të rinjtë i kërkojnë Europës që t’i vërë vizën kryeministrit Edi Rama dhe jo Shqipërisë.

Reagimi i Vasilit:

“Edi Rama = Votime moniste dhe jo zgjedhje.

Edi Rama = Shqiptare te izoluar nga bota.

Edi Rama ik = Zgjedhje te lira dhe te ndershme

Edi Rama ik = Shqiptaret qytetare te hapur ndaj gjithe botes.

Ndaj të rinjtë i kërkojnë edhe Evropës qe ” Ti vere vizen Edi Rames dhe jo tu vere vizat shqiptareve”.

Një ditë pas Tiranës, ku u prezantua kryebashkiaku Erion Veliaj si kandidat për zgjedhjet e 30 qershorit, PS prezantoi sot në Lezhë, Pjerin  Ndreun. Në fjalën e tij kryeministri Edi Rama deklaroi se me 30 qershor do bëhet ndarja e së shkuarës nga e ardhmja në vend. Ai bëri thirrje qytetarëve të votojnë për Pjerin Ndreun për t'i hapur rrugë zhvillimit të qytetit të Lezhës i cili deri më sot është lënë në harresë nga pushteti lokal.

Rama tha se zgjedhjet do quheshin të paligjshme vetëm nëse një parti politike do ndalohej të futej në zgjedhje, por jo kur do pushtet në tavolinë dhe vendos të dalë rrugëve. Ai foli edhe për projektin e rrugës Milot-Balldren duke thënë se ndërtimi i saj do zëvendësojë autostradën e vdekjes , e cila i ka marrë jetën shumë njerëzve por edhe një zhvillimi të turizmit në në vend.

Kreu i qeverisë nuk la pa përmendur edhe kodin penal për të gjithë ata që do përpiqen të cenojnë zgjedhjet, të cilët do shkojnë pas hekurave dhe do t'i ndalohet edhe hyrja në SHBA dhe BE.

Vetë Pjerin Ndreu deklaoi se në 30 qershor do besëlidhemi për Lezhën për ta shpëtuar atë nga drejtimi i dobët. Ai thumboi edhe deklaratën e pak ditëve më parë të liderit demokrat i cili u betua për Kishën e Laçit, duke thënë se në Kishën e Laçit shkojnë ata që duan të pastrojnë shpirtin.

Pjerin Ndreu tha se në 30 qershor Lezha do transformohet dhe do matet edhe me Tiranën e me Fierin.

Kur vetëm pak orë na ndajnë nga protesta e 7 kombëtare e thirrur nga opozita, ka ardhur një reagim nga kryetarja e Lëvizjes Socialiste për Integrim, Monika Kryemadhi.

Kryemadhi ka deklaruar se Shqipëria ka nevojë për protestë dhe u bën thirrje mbështetësve që të dalin në tubimin e thirrur prej opozitës.

Reagimi i plotë:

Sot më shumë se kurrë, Shqipëria ka nevojë për forcën e protestës qytetare, ka nevojë që të gjithë bashkë të dëshmojmë se e ardhmja e fëmijëve tanë nuk mund të jetë peng i papërgjegjshmërisë së Edi Ramës!

Sot është dita e qytetarëve.

Prandaj të gjithë bashkë, pa asnjë dallim në jemi të rinj apo të moshuar, burra apo gra, nga fshati apo nga qyteti, nga Jugu a nga Veriu, me apo pa parti, të majtë apo të djathtë, të jemi bashkë në protestën e shpresës, sepse e keqja po shembet dhe se e nesërmja bëhet më e mirë, vetëm kur qytetarët i dalin zot fatit të tyre!

Shqipëria pa varfëri dhe me punë të ndershme, pa korrupsion e në luftë me krimin e organizuar, pa drogë e oligarkë, por me njerëz që e duan familjen dhe atdheun e konsiderojnë shtëpinë e tyre, është më e rëndësishme, më e madhe dhe më e fortë se Edi Rama dhe klani i tij kriminal!

Sot më shumë, sot më të vendosur, sot më të fortë, sot më të bashkuar!

Partia Demokratike kërkon leje marshimi deri në mesnatë duke nisur prej orës 19:00 para Kryeministrisë, policia e Tiranës miraton lejen deri në ora 21:00.

Rreth 1300 efektivë pritet të jenë në gatishmëri të vendosura në institucionet e rëndësisë së veçantë përfshi Kryeministrinë, Kryesinë e Kuvendi, Parlamentin dhe Ministrinë e Brendshme.

Ndërsa prej orës 17:30 do të nis dhe bllokimi i qarkullimit në Bulevardin kryesor e më pas prej orës 18:30 minuta edhe akset që lidhin Bulevardin me Unazën.

Pjesë e kordonit të sigurisë janë kangjellat metalike, autoblindat e shpërndarjes së turmave me presion uji si dhe afro 350 efektivë të Gardës së Republikës.