Pas OFL-së, qeveria strukturë speciale për goditjen e njerëzve të korrupsionit, zbulohet plani për gjurmimin e pasurive

TIRANË- Pas goditjes së njerëzve të krimit, përmes bllokimit të pasurive, izolimit fizik dhe sanksioneve ekonomike, bazuar në aktin normativ anti-krim që po zbatohet nga OFL-ja, qeveria ‘Rama’ po planifikon të godasë njerëzit e korrupsionit. Një sektor i posaçëm, i ngjashëm me Operacionin Forca e Ligjit, do të ngihet për të zbuluar dhe hetuar pasuritë që rrjedhin nga veprimtaria e korrupsionit. Njësia e re speciale parashikohet në dokumentin qeverisë për strategjinë kundër korrupsionit për periudhën 2020-2023. Njësia parashikohet të funksionojë gjatë vitit 2021, ndërsa rezultatet e hetimit rreth pasurive të korrupsionit do t’i referojë në SPAK.

Plani i qeverisë parashikon gjithashtu ngritjen e një njësie tjetër qendrore vetëm për hetimin e krimit ekonomik financiar. Struktura e dytë do të përbëhet nga 20 oficerë të përzgjedhur nga studentët e ekselencës, të cilët do trajnohen në Akademinë e Sigurisë. Strategjia parashikon edhe ngritjen e skuadrave të përbashkëta hetimore për hetimin e veprave penale në fushën e korrupsionit. Skuadrat e përbashkëta hetimore parashikohen edhe në ligjin për SPAK. Në dokument parashikohet gjithashtu një monitorim proaktiv dhe i vazhdueshëm i medias së shkruar dhe elektronike, rrjeteve sociale, për denoncimin e korrupsionit.

Strategjia anti -korrupsion parashikon edhe monitorimin e institucioneve si dhe rezultatet për goditjen e korrupsionit në nivele të larta si dhe konfiskimin e pasurive të zyrtarëve. “Rritja e efektivitetit të hetimeve (që ndër të tjera, përfshinin hetime financiare dhe procedura të gjurmimit të pasurive) pritet që, ndër të tjera, të rrisë numrin e kërkesave për sekuestrim të paraqitura nga Prokuroria në Gjykatë”, thuhet në dokument.

Lufta kundër korrupsionit është një nga pesë kushtet kyçe të vendosura nga BE për avancimin e Shqipërisë në rrugën e integrimit. Brukseli ka disa vite që kërkon krijimin e një historiku me hetime, akuza penale dhe dënime përfundimtare të zyrtarëve të lartë për korrupsionin. Ndërkaq, Departamenti Amerikan i Shtetit e ka konsideruar korrupsionin si një rrezik për sigurinë kombëtare.

( Kliko këtu për të lexuar planin e ri të qeverisë për të ndaluar korrupsionin)

B.K./b.ha./Shqiptarja.com

TAG:
• edi rama
• spak
• ofl