Lufta/ Ushtria izraelite: Lideri i Hezbollahut, Nasrallah është vrarë! Grupi militant libanez hesht! Izraeli bombardime në Bejrut

Bombardimet në Liban

Parlamenti iranian reagoi ashpër pas bombardimeve të Izraelit në Liban orët e fundit, ku është njoftuar nga IDF edhe vrasja e kreut të Hezbollah, Hassan Nasrallah.

“Krimet e fundit të regjimit sionist në Liban, të kryera me mbështetjen e Shteteve të Bashkuara, nuk do të mbeten pa përgjigje”, tha sot zëdhënësi i Komisionit të Sigurisë Kombëtare dhe Politikës së Jashtme të Parlamentit iranian, pas një takimi urgjent të komisionit, për sulmin e Izraelit në jug të Bejrutit, të premten e 27 Shtatorit.

Sipas IRNA, Ebrahim Rezai tha më tej:

"Anëtarët e komisionit e quajtën të mjerueshme heshtjen e organizatave ndërkombëtare dhe vendeve që pretendojnë se janë mbështetës të të drejtave të njeriut. Ata theksuan se Izraeli duhet të përballet me një përgjigje praktike, vendimtare dhe të dhimbshme".

Tani Izraeli konfirmon se është në gatishmëri të lartë për një konflikt më të gjerë, pas njoftimit për vrasjen e liderit të Hezbollahut, Hassan Nasrallah.

"Shpresojmë që kjo të ndryshojë veprimet e Hezbollahut", tha nënkoloneli Nadav Shoshani në një konferencë shtypi të raportuar nga media, duke iu referuar vrasjes së Nasrallah. "Ne kemi parë Hezbollahun të kryejë sulme kundër nesh për një vit. Është e sigurt të supozohet se ata do të vazhdojnë të kryejnë sulmet e tyre kundër nesh, ose se do të përpiqen ta bëjnë", shtoi ai.

IDF publikon tabelën e komandantëve dhe liderit të vrarë të Hezbollah

Teksa situata në Liban është bërë e paqëndrueshme, pasi Izraeli vijon bombardimet e pandërprera deri në Bejrut dhe kufirin jugor, duke lajmëruar edhe vrasjen e kreut të Hezbollah, Hassan Nasrallah, të tjera lajme jo të mirë vijnë për organizatën.

Përveç kreut të Hezbollahut libanez, Hasan Nasrallah, IDF njoftoi sot (28 Shtator) se u “eliminuan” numri tre i Hezbollahut, Ali Karaki, komandant i organizatës në Libanin jugor dhe oficerë të tjerë të lartë të krahut ushtarak të lëvizjes islamike.

Ushtria izraelite më herët kishte njoftuar edhe vrasjen e disa komandantëve dhe kreut të Njësisë së Raketave të Hezbollah.

Në mëngjesin e sotëm u raportuan 6 të vrarë dhe rreth 200 të plagosur nga bombardimet, por shifrat ndryshojnë nga ora në orë.

Foto: Hassan Nasrallah

Izraeli tha sot se ka vrarë udhëheqësin e Hezbollahut Hassan Nasrallah. Një burim iranian konfirmoi vdekjen e liderit të grupit të Hezbollahut  Nasrallah për gazetën italiane ‘La Repubblica’ ndërkohë nuk ka asnjë reagim nga grupi militant libanez, i cili ka zgjedhur në këto momente të heshtë.

Hezbollahu nuk ka konfirmuar as vrasjen e  komandantëve të tjerë të grupit të mbështetur historikisht nga Irani në bastisjet e djeshme në kryeqytetin libanez Bejrut.

Para njoftimit të ushtrisë izraelite, mediat ndërkombëtare raportuan se nuk kishte asnjë kontakt me Nasrallah për orë të tëra.

Nga luftimet mes Izraelit dhe Hezbollahun

Hezbollah i është përgjigjur me raketa Izraelit, pas bombardimeve të mbrëmshme në Bejrut nga IDF, ku dyshohet se mund të jetë vrarë edhe lideri i organizatës Hassan Nsasrallah, në një lajm ende të pakonfirmuar zyrtarisht.

Një raketë tokë-tokë e lëshuar nga Libani së fundmi goditi një zonë të hapur në Izraelin qendror. Kjo është bërë e ditur sot (28 Shtator) nga Forcat Mbrojtëse të Izraelit.

IDF thotë se sipas protokollit, sirenat nuk kanë rënë në asnjë qytet, pasi raketa është drejtuar në një zonë të hapur. Raketa me sa duket ra në det, megjithëse IDF thotë se detaje të tjera janë duke u konstatuar.

Më parë, raportuan mediat izraelite, Hezbollah kishte marrë përgjegjësinë për sulmin me raketa këtë mëngjes në veri të Izraelit.

Në një deklaratë, e para e lëshuar sot, organizata shiite tha se kishte lëshuar një breshëri raketash Fadi-1 në Kibbutz Kabri në Galilenë Perëndimore.

Bombardimet në LIban

Spitalet në periferitë jugore të Bejrutit do të evakuohen pas sulmeve të rënda izraelite në zonë.

Kjo u njoftua nga Ministria libaneze e Shëndetësisë, e cila u bëri thirrje spitaleve në zonat jo të prekura që të ndalojnë pranimin e rasteve jo urgjente.

Një deklaratë nga ministria u bën thirrje spitaleve që nuk janë prekur nga sulmet izraelite, që të "ndalojnë marrjen e rasteve jourgjente deri në fund të javës së ardhshme, për t'u lënë vend pacientëve nga spitalet në periferitë jugore të Bejrutit, të cilët do të evakuohen për shkak të zhvillimeve në agresion".

Ministria e Shëndetësisë nuk ka dhënë ende një raport të përditësuar të sulmeve.

Pas Hamasit ka reaguar edhe Teherani zyrtar. Ministri i Jashtëm i Iranit i ka quajtur "të egra" "kërcënimet" e kryeministrit izraelit Benjamin Netanyahu, i cili paralajmëroi Kombet e Bashkuara për aftësinë e vendit të tij për të goditur Iranin.

"Është një turp historik që një vrasës i madh vjen në Kombet e Bashkuara dhe helmon Asamblenë e Përgjithshme me gënjeshtra të neveritshme dhe kërcënime të egra për të pushtuar vende të tjera dhe për të vrarë më shumë njerëz", i tha Abbas Araghchi Këshillit të Sigurimit.

Informacionet nga fronti i luftës dhe pas bombardimeve të fundit në Bejrut flasin edhe për vdekjen e kreut të Hezbollah, Hassan Nasrallah, por ende e pazyrtarizuar. Izraeli theksoli mundësinë që ai të kishte vdekur, teksa burime nga hezbollah thanë se lideri i tyre është i paarritshëm.

Të paktën 6 persona u vranë dhe 91 të tjerë u plagosën në bombardimet e mbrëmjes së djeshme në Liban, ku IDF tha se goditi një bazë të organizatës armike.

Pamje nga bombardimet në LIban

Ushtria izraelite njoftoi se kishte "eliminuar komandantin e njësisë raketore të Hezbollahut në Libanin jugor".

Ky është “terroristi Muhamed Ali Ismail”, lexohet në një deklaratë të publikuar në Telegram. Zëvendësi i tij, "terroristi Husein Ahmad Ismail, u vra gjithashtu në operacion. Komandantët dhe operatorët e tjerë të Hezbollahut u eliminuan së bashku me ta".

Hamasi dënoi "përshkallëzimin dhe agresionin sionist" kundër popullit libanez, duke u bërë thirrje "kombeve arabe dhe islamike" të veprojnë dhe "të zmbrapsin këtë agresion brutal". Këtë e raporton Al Jazeera.