Pas ultimatumit të Kim/ Kushtetuesja nis nga puna, betohet gjyqtari i 6-të Përparim Kalo, Presidenti Meta: Ka ende punë! Soreca dhe Gjonaj: Arritje e reformës

Për betimin e anëtarit të 6-të të Gjykatës Kushtetuese Përparim Kalon ka reaguar ambasadori i BE-së, Luigi Soreca.

Ai thotë se me bërjen funksionale të gjykatës është një arritje për qytetarët dhe reformën në drejtësi.

“Sot Z. Përparim Kalo u betua përpara Presidentit Ilir Meta si anëtari i 6-të i Gjykatës Kushtetuese. Ne e përgëzojmë dhe i urojmë punë të mbarë atij dhe të gjithë anëtarëve pasi gjykata tani është plotësisht funksionale. Një arritje e konsiderueshme për qytetarët e Shqipërisë dhe reformën në drejtësi”, shkruan ambasadori i BE në Tiranë në Twitter.

Pas bërjes funksionale të Gjykatës Kushtetuese ka reaguar dhe Ministrja e Drejtësisë Etilda Gjonaj. Përmes një postimi në Facebook ajo shkruan se ky është një hap domethënës drejt plotësimit të reformave dhe kushteve për anëtarësimin në BE.

"Këtë fund viti e mbyllim me një lajm shumë të mirë për konkretizimin e rezultateve të Reformës në Drejtësi! Gjykata Kushtetuese tashmë funksionale me 6 anëtarë! Një hap domethënës përpara që i shërben Shqipërisë në avancimin e reformave, por njëkohësisht plotëson të gjitha prioritetet e vendosura për negociatat për anëtarësim në BE. Falenderim BE-së dhe SHBA-së për mbështetjen e pakursyer" - shkruan Gjonaj.

Nga Elbasani, Presidenti Ilir Meta foli mbi ngritjen e Gjykatës Kushtetuese duke u shprehur se pas bërjes funksionale, duhet monitoruar puna e saj. Sipas tij, ka ende punë për të bërë derisa Gjykata të bëhet totalisht funksionale pasi kujtojmë se Kushtetuesja ka 6 anëtarë, nga 9 që kërkohen. Ai akuzoi maxhorancën se bllokoi 3 herë KED për të kapur Kushtetuesen, ndërsa tha se roli i saj është i rëndësishëm, duke kujtuar rastin e Kosovës ku vendimi i gjykatës rrëzoi qeverinë.

Paraditen e sotme, gjyqtari Përparim Kalo bëri sot betimin në Presidencë dhe merr zyrtarisht detyrën. 

"Gjykata Kushtetuese ka qenë dhe duhet të jetë institucioni më i rëndësishëm në vend. Presidenti ka bërë çdo përpjekje që Shqipëria të mos mbetej pa Gjykatë Funksionale por ka ende punë për ta plotësuar. Plotësimi i Gjykatës Kushtetuese është thelbësore.Shpresoj që të gjithë anëtarët e kësaj gjykate të kenë përgjegjshëmri maksimale për t ëkuptuar rëndësinë e këtij institucioni për të mbrojtur demokracinë dhe interesin kombëtar. Do mbështes pavarësinë e këtij institucioni" - u shpreh Meta.

Ndërkohë Presidenti Ilir Meta deklaroi se funksionimi i Gjykatës Kushtetuese është një proces i rëndësishëm duke sjellë dhe në vëmendje vendimin e Kosovës e cila rrëzoi qeverinë Hoti.

"Nuk ekziston asnjë tërheqje nga ana e presidentit nga ana e procesit. Çdo spekultim për të krahasuar situatën aktuale me atë kur ndodhi përplasja e Presidentit të kaluar dhe ish drejtuesit të KED, atëherë kishim një përpjekje për të kapur në mënyrë kriminale dhe mafioze, për të kapur një anëtar të presidentit nga mazhoranca. Presidenti ka vepruar gjithmonë në mënyrën më të shpejtë të mundshme kur KED ka vepruar për të plotësuar vakancat. KED u bllokua 3 herë dhe kjo ishte e qëllimshme. Dua të falenderoj Bundestagun që vendosi si kusht bërjen funksionale të Gjykatës Kushtetuese. Është një proces që vazhdon por mbi të gjitha ne duhet të monitorojmë funksionimin e saj në të ardhmen. Në Kosovë pati një zhvillim shumë interesant" - tha Meta.

Më datë 21 dhjetor, Gjykata Kushtetuese nxori aktgjykimin për ankesën e Lëvizjes Vetëvendosje lidhur me votën e deputetit, Etem Arifi, e cila ishte vendimtare për krijimin e Qeverisë së drejtuar nga Avdullah Hoti.

Vendi pritet të shkojë në zgjedhje brenda 40 ditësh, meqë Gjykata Kushtetuese ka kontstatuar që vota e deputetit, Etem Arifi, pro krijimit të Qeverisë Hoti, ka qenë e pavlefshme.