Pamja e këpucëve të çara të Pedro Netos gjatë ndeshjes së Portugalisë ndaj Spanjës në Kupën e Botës 2026 ngjalli kureshtje te shumë tifozë. Megjithatë, prerja në pjesën e pasme të këpucëve nuk është as çështje mode dhe as dëmtim i rastësishëm, por një zgjidhje mjekësore për një problem të njohur te sportistët.

Sulmuesi portugez është vetëm një nga futbollistët që ka përdorur këtë metodë. Më parë, lojtarë si Daniele De Rossi, Philippe Coutinho, Eljif Elmas dhe Mats Hummels janë parë me këpucë të modifikuara për arsye shëndetësore.

Sipas specialistit të kirurgjisë së këmbës, Massimiliano Mosca, këpucët moderne të futbollit kanë një pjesë të pasme shumë të fortë, e cila te disa lojtarë ushtron presion të vazhdueshëm mbi tendinën e Akilit. Ky presion mund të shkaktojë inflamacion dhe dhimbje kronike, veçanërisht te futbollistët që kanë predispozitë anatomike.

Ky problem lidhet me të ashtuquajturën 'Sindroma Haglund', një gjendje që prek pjesën e pasme të thembrës dhe nëse nuk trajtohet, mund të çojë në deformim të kockës së thembrës dhe dhimbje të vazhdueshme.

Për këtë arsye, shumë futbollistë zgjedhin të presin pjesën e pasme të këpucëve, duke eliminuar presionin mbi zonën e prekur dhe duke lehtësuar dhimbjet gjatë ndeshjeve dhe stërvitjeve.

Ndërkohë, jo të gjitha prerjet në këpucë lidhen me të njëjtin problem. Mbrojtësi gjerman Mats Hummels, për shembull, është parë me prerje në pjesën e përparme të këpucëve, pranë gishtave. Në raste të tilla, modifikimet bëhen për të lehtësuar deformimet e gishtave, metatarsalgjinë, kufizimin e lëvizjes së gishtit të madh ose kompresimin e nervave të shputës.

Edhe pse këto modifikime mund të duken të pazakonta, ato janë një zgjidhje praktike që u mundëson futbollistëve të vazhdojnë të luajnë në nivelet më të larta, pavarësisht problemeve kronike që lidhen me këmbët.

Sindroma Haglund