Ermal Hasimja, i cili prej disa javësh po kryen e rolin e "shkesit" politik, duke tentuar të bashkojë në llogore të vetme të gjitha partitë opozitare, foli në protestën mbrëmjes së sotme të Partisë Demokratike.

Ndërkohë që Sali Berishën e kishte përballë, Hasimja u bëri thirrje qytetarëve, që ndër shumë arsye të tjera, të protestojnë edhe për mbrojtjen e prokurorëve të SPAK dhe gjyqtarëve të GJKKO, të cilët po godasin korrupsion në nivele të larta, si dhe atë të kryer nga ish-zyrtarë të lartë të shtetit, përfshirë vetë krydemokratin.

"Njerëz të lirë të këtij vendi, njerëz të ndershëm dhe sidomos ju intelektualë, asnjë ndryshim nuk ka ardhur ndonjëherë nga kafeneja dhe divanate e rehatshme të shtëpive. Nëse mendoni se politika është e pisët, keni të drejtë, atë e mendoj unë, është sepse të ndershmit largohen dhe u hapin rrugë të pandershmëve. Vendi më i sigurt për një anije është porti, por anijet nuk janë bërë për të qëndruar në port. Nëse nuk ju pëlqejnë partitë që janë, krijoni partitë tuaja. Bashkohuni me ne që të kërkojmë kushtin minimal të demokracisë, zgjedhje të lira dhe të ndershme. Bashkohuni me ne për të mbrojtur ata gjykatës dhe prokurorë të ndershëm që i nxorën bojën këtij sistemi të kalbur",- tha Hasimja.


Lajmi kryesor:

LIVE TV- Protesta e PD, militantët sulmojnë me molotovë Kryeministrinë dhe Kuvendin, nuk kursejnë as xhaminë e Namazgjasë! Shpërndahen me gaz lotsjellës