Ditën e sotme kryedemokrati Sali Berisha ka zhvilluar një bashkëbisedim me fermerët e qarkut të Beratit.

Por gjatë bashkëbisedimit, disa prej fermerëve i vunë në dukje Berishës pakënaqësitë që kishin me drejtimin e Partisë Demokratike.

Njëri prej fermerëve, teksa mori fjalën kritikoi Berishën për përjashtimin e Ervin Salianjit nga PD, duke theksuar se mendimi ndryshe nuk duhet të ‘vetëpërjashtohet’.

“Ne e quajmë Parti Demokratike që ka demokraci brenda vetes, ju keni dalë me atë sloganin dikush është vetpërjashtuar. Mendimi ndryshe nuk besoj të jetë i vetpërjashtuar. Jemi pak që të hapim konflikte brenda PD-së”, tha mes të tjerash fermeri.

Ndërkohë edhe një tjetër fermer ja vuri në dukje Berishës problemet e brendshme të PD-së, teksa i kërkoi kryedemokratit që të bënte çmos për bashkimin e mendimeve dhe ‘fraksioneve’ brenda PD-së.

“Që të forcohet Partia Demokratike mundësisht ato fraksionet dhe mendimet ti bashkojmë”, tha një tjetër fermer.

Rendit zhvillimet sipas orarit:
Ora 20:04
Berisha iu përgjigjet fermerëve: Kur unë denoncoja skandalet e qeverisë, Salianji hante dreka me Ergys Agasin! Përdori Suel Çelën për të kërcënuar demokratët

 

Kryetari i Partisë Demokratike, Sali Berisha, u është përgjigjur disa fermerëve që e kritikuan lidhur me përjashtimin e Ervin Salianjit nga PD, duke treguar arsyet e tij për këtë vendim.

Teksa tha se Salianji u vetëpërjashtua nga PD, Berisha deklaroi se ish-deputeti bashkëpunonte me kryeministrin Edi Rama dhe vartësit e tij.

Berisha deklaroi gjithashtu se në kohën që denonconte qeverinë dhe Ergys Agasin, Ervin Salianji drekonte me të. Po ashtu, sipas kryedemokratit, Salianji përdorte Suel Çelën për të mbledhur demokratët përmes kërcënimeve, në takimin që zhvilloi në Elbasan.

“Kjo parti që në themelim të saj dhe derisa të jetë gjallë do jetë 100 e hapur për mendime ndryshe, por çdo njëri duhet të dallojë mendimin ndryshe nga qëndrimi ndryshe. Qëndrimi ndryshe është tjetër.

Nëse ti, në forumet e kësaj partie shtron çfarëdolloj mendimi, kurrë nuk do ketë njëri pasojën më të vogël, por nëse bashkëpunon me kundërshtarin në mënyrë absolute nuk do jesh pjesë e kësaj partie.

Pas zgjedhjeve mbeta duke denoncuar farsën elektorale, në qoftë se ti del dhe ditën para zgjedhjeve bën thirrje që të votohet deputeti kundërshtar, ti je ndarë me këtë parti. Këtu nuk kemi të bëjmë më me mendim ndryshe. Ekspozohesh në fushatë me deputeten kundërshtare, ti ke bërë zgjidhjen tënde.

Nëse brenda 4 orëve, një Tv publikon për ty nga zyra e Edi Ramës 16 lajme në 4 orë, ti ke marrë një rol të gabuar. Asnjë njëri nuk do ketë kurrë pasojë për mendimin ndyrshe, por veprimi ndryshe është tjetër gjë.

Para se të dilte nga burgu më erdhi në zyrë dhe më kërkoi mendim. Më tha që për të dalë nga burgu këto 3 muaj duhet të firmos një dokument që nuk do vras Fatmir Xhafën. Gjykatësi kërkon garanci. I thash mos e firmos sepse pranon fajsësinë dhe ti nuk ke patur asnjë sherr personal me të.

Tjetra unë sulmoja Ergys Agasin si një nga figurat më të zeza, ndërsa ai drekonte me të. Në Elbasan, më merrnin demokratët dhe më thoshin që i kërcënonte Suel Çela. Nuk mund të përdorësh Suel Çelën për të rreshtuar demorkatët pas vetes. Që në këtë moment i kam thënë je i vetpërjashtuar”, tha mes të tjerash Berisha.

R.Xh/Shqiptarja.com