Princesha e Japonisë martohet me të dashurin jo mbretëror! Gjithçka rreth historisë që na kujton dashuritë e mëdha të 'pamundura' të 'gjakut blu'

Tokio-Princesha Japoneze Mako është martuar me të dashurin e saj jombretëror të kolegjit Kei Komuro në një ceremoni të qetë, duke shënuar kështu largimin e saj nga familja mbretërore.

Çifti u regjistrua në zyrën vendore rreth orës 10 a.m, me orën lokale ditën e Martë, sipas Agjencisë Mbretërore Household, duke hequr dorë nga madhështia e shumicës së dasmave mbretërore.

Mako, e cila mbushi 30 vjeç gjatë fundjavës, deklaroi fejesën e saj me Komuro para katër vjetësh. Por bashkimi i tyre është kundërshtuar prej vitesh nga mosmiratim publik dhe nga një skandal lekësh në të cilën është përfshirë e ëma e Komuro-s.

Me qëllim që të qetësojë publikun, Mako refuzoi një pagesë një milion dollarë nga qeveria, të cilës asaj i takonte meqë po largohej nga mbretëria.

Në një konferencë për shtyp, Mako u shfaq së bashku me bashkëshortin e saj përpara një grupi gazetarësh. Të sapomartuarit kërkuan falje për çdo shqetësim apo problem të shkaktuar nga martesa e tyre dhe shprehën mirënjohje për ata të cilët i mbështetën.

“Për mua Kei është shumë i rëndësishëm, një ekzistencë e pandashme”- tha Mako, e veshur me një fustan pastel dhe perla.

“Deri më sot, kam qenë  e kufizuar në shprehjen e ndjenjave të mia, dhe ka pasur disa keqkuptime për këtë shkak”- tha ajo. “Ka qenë thjesht një spekulim. Jam ndjerë e frikësuar prej saj, dhe kam ndjerë gjithashtu trishtim.”

Komuro shprehet se katër vitet e fundit është ‘’keqinformuar”, por nga ana tjetër ai falënderon personat të cilët i kanë mbështetur gjatë periudhave të vështira.

“Unë e dua Znj. Mako. Kjo është një jetë e filluar nga fillimi, dhe do të dëshiroja që të kaloja jetën time i lumtur me personin që e dua.”- tha ai. “Mako dhe unë duam të ndërtojmë një familje të shëndetshme. Në të njëjtën kohë, unë do të dëshiroja të bëja të pamundurën për të mbështetur Mako. Momentet e bukura, momentet e pakëndshme, ne do të dëshironim të ishim bashkë dhe do të jemi të pandashëm nga njëri tjetri.”

Të sapomartuarit do të lëvizin në qytetin e New York-ut, ku Komuro punon një një kompani ligjore.

Si mbesa e perandorit, Mako nuk është në linjë trashëgimie për fronin- Ligji japonez mbi trashëgiminë vetëm për meshkujt e ndalon atë nga froni. Po ashtu, sipas ligjit japonez, anëtarët femra të familjes mbretërore duhet të heqin dorë nga titujt e tyre dhe të largohen nga pallati nëse martohen me një njeri të thjeshtë.

Mako, e cila tashmë nuk do të njihet më si princeshë, nuk është femra e parë e cila po lë familjen mbretërore japoneze. Më e fundit e cila e ka bërë këtë ka qenë halla e saj, Sayako, vajza e vetme e Perandorit Akihito, kur ajo u martua me planifikuesin urban Yoshiki Kuroda në vitin 2005.

Cifti kishte planifikuar të martohej në vitin 2018, por martesa e tyre ishte shtyrë sërish. Familja mbretërore u shpreh se shtyrja u bë për shkak të “mungesës së përgatitjes”, por disa dyshojnë se kjo erdhi për shkak se e ëma e Komuro nuk arriti të kthente 36.000 $ të cilat ajo i mori hua nga ish i fejuari i saj.

Komuro e hodhi poshtë, duke bërë dhe një deklaratë 28 faqesh në fillim të këtij viti, duke deklaruar se e ëma e tij besonte se lekët ishin një dhuratë dhe se ishte gati të paguante për të zgjidhur keqkuptimin. Por thashethemet e tabloideve filluan të kërkojnë në këtë mënyrë çdo aspekt të jetës dhe familjes së tij.

Disa japonezë nuk e shohin djalin e thjeshtë me një prind si të merituar për princeshën; disa media e kanë cilësuar atë si një “kërkues-ari” të pabesueshëm.

Spekulimet mbi Mako janë vërtetuar këtë muaj, ku pallati mbretëror zbuloi se ajo vuan nga nje çrregullim kompleks i stresit post traumatik. “Princesha ndihet pesimiste dhe e ka të vështirë të ndihet e lumtur për shkak të frikës së qëndrueshme se jeta e saj mund të shkatërrohet.”- ka thënë psikiatri i Princeshës Mako, Tsuyoshi Akiyama, drejtor i Qendrës Mjekësore NTT.

Komuro e ka lënë Japoninë për të studiuar në shkollën e Drejtësisë në Neë York në 2018 dhe është kthyer në Shtator për dasmën. Ai u kthye në Japoni i veshur sportiv me flokë të gjatë të lidhura bisht duke u bërë objekt diskutimi për mediat. Tabloidet shpërndanë fotot e flokëve të 30- vjecarit Komuro nga cdo cep, ku disa e kanë krahasuar atë me flokët e lidhura të samurajit. Në mediat sociale, disa e mbështetën atë për pamjen e tij, ndërsa disa të tjerë e konsideruan si të papërshtatshme për dhëndrin e nuses mbretërore. Komuro e preu bishtin e tij përpara dasmës.

Një jetë e qetë mbas largimit nga mbretëria

Largimi i Mako dhe Komuro nga familja mbretërore është krahasuar me një çift tjetër të famshëm – atë të Meghan Markle dhe Princi Harry.

Fejesa e Markle me Princin Harry të Britanisë ngjalli polemika kur u njoftua për herë të parë në Nëntor të vitit 2017. Disa besonin se një aktore amerikane e divorcuar dhe dyracore nuk kishte vend brenda familjes mbretërore britanike.

Me kalimin e kohës, tabloidet britanike mbi çiftin u bënë aq toksike sa Harry lëshoi një deklaratë në Nëntor 2016, duke dënuar "valën e ngacmimeve" që Meghan duhej të duronte. Përfundimisht, çifti u largua, duke lënë familjen mbretërore britanike në Janar 2020.

Por ndërsa dalja “dramatike” e Mako-s nga familja mbretërore është deri diku e krahasueshme me “Megxit” , termi i përdorur për largimin e çiftit britanik, ngjashmëritë përfundojnë aty- është shprehur Ken Ruoff, drejtor i Qendrës për Studime Japoneze në Universitetin Shtetëror Portland.

“Anëtarët e familjes mbretërore britanike rriten mes pasurisë së madhe. Dhe ata gjithashtu shpenzojnë shumë kohë duke mbledhur drejtpërdrejt para për qëllime të ndryshme bamirësie, kështu që e dinë se si funksionon. Kështu, kur Harry dhe Meghan shkuan në Shtetet e Bashkuara, duke treguar histori të ndryshme për familjen mbretërore, ata arritën të fitonin miliona e miliona dollarë”, tha Ruoff.

“Unë do të parashikoja se nuk ka pothuajse asnjë mënyrë që Mako dhe burri i saj i ardhshëm të sillen po në të njëjtën mënyrë pasi të martohen. Në fakt, mendoj se ajo që do të ndodhë është se ata thjesht do të zhduken."

K.T./KT/Shqiptarja.com

TAG:
• Japoni
• Tokio
• Perandori i Japonisë