Pronarët e Premier League të pezmatuar, futbollistët marrin hapin tjetër për të mos ulur pagat

Nisma e bamirësisë së futbollistëve të Premier League ka trembur akoma më shumë pronarët e klubeve, të cilët po këmbëngulin për uljen e pagave. Një sërë lojtarësh, me më shumë emër, të mërkurën lancuan nismën e tyre për të kontribuar në luftën kundër koronavirusit, duke ndihmuar sistemin e shëndetësisë.

Siç raporton Daily Mail, nisma e Harry Kane, Marcus Rashford dhe Kevin De Bruyne që pritet të mbështetet nga shumë futbollistë të tjerë, ka për qëllim që t'i dhurojë sistemit të shëndetësisë në Angli një shifër prej 20 milionë paundësh. Kjo nisi pas këmbënguljes së lojtarëve për të mos pranuar uljen e pagave të kërkuara nga klubet, të cilët pretendojnë se gjenden në vështirësi financiare pas krizës që ka sjellë COVID-19.

Më herët shoqata profesioniste e futbollistëve në Angli doli me pretendimin se nuk pranon që të ulen pagat pasi paratë që përfitohen do të shkojnë vetëm në xhepat e pronarëve të tyre të pasur. Gjithmonë sipas tyre më mirë do të ishte që paratë të shkonin për bamirësi, diçka e cila deri më tani nuk ka mbetur në kuadrin e fjalëve.

Gjithsesi pas Southampton West Ham është bërë klubi i dytë në Premier League, që arrin marrëveshjen me futbollistët për uljen e pagave. Raportohet se të njëjtën gjë pritet të lajmërojë edhe Manchester City, por ndërkohë për të gjithë klubet do të mbahet një takim të mërkurën me shoqatën e futbollistëve, e cila duket e vendosur për të mos hequr dorë nga pretendimet e tyre.

Ne.k./Shqiptarja.com

TAG:
• pagat
• premier league
• Koronavirus
• futbollistët